Kino tənqidi niyə görünmür?

Kinorejissor Eldar Quliyev bunu mənfi hal sayır

"Kinodakı dirçəlişləri görürük. Amma kinonun inkişafı tək dövlətin ayırdığı maliyyədən asılı olmamalıdır. Hətta işıqçının dekorasiyalara hansı istiqamətdən yanaşması kinonun keyfiyyətinə təsir göstərə bilir. Məncə, kinoya öncə peşəkarların cəlb olunması məqsədəuyğundur. Bir də ixtisasartırma kurslarının olmasını vacib sayıram" deyən kinorejissor, xalq artisti Eldar Quliyev həm də insanlar arasında səmimiyyəti, etibarı vacib saydı.

Onun fikrincə, bu ənənənin təməli vaxtilə daha möhkəm qoyulmuşdu. Bunun nəticəsi olaraq meydana bu gün də sevə-sevə izlədiyimiz məşhur Azərbaycan filmləri çıxıb. Amma bu gün onun müşahidə etdiyi mənzərələr daha çox giley-güzar, dedi-qodularla yaddaşına köçürülür.

Eldar Quliyev deyir: "İncəsənətin bütün janrları içərisində ən asan başa düşüləni hələ ki kinodur. Amma kino özünün ilkin, başlanğıc məqsədindən bir qədər uzaqlaşıb". Rejissor kinonun belə bir duruma düşməsinin səbəbini tənqidin yoxluğunda, kinotənqidçilər filmlərə münasibət bildirməkdən çəkinməsində görür. Və bunun nəticəsi olaraq milli kino uçurumdan çıxara bilmir:

"Vaxtilə bölgələrdə kino çəkərkən sadə insanların da fikrini öyrənməyə çalışırdıq. Filmlərdən izlədiyiniz bəzi səhnələr var ki, ucqar bir kənd sakininin beyninin məhsuludur. Onları bu və digər vasitələrlə kinoya cəlb edir, bəhrəsini də görürdük".

Kinorejissor gələcəyə ümidlə baxır: "Bunlar məni daxilən narahat edən problemlər olduğundan üstündən asanlıqla keçə bilmirəm", - deyə o bildirdi.

Xatun

Ayna.- 2010.- 2 oktyabr.- S.20.