Fidan Hacıyeva müsabiqədə birinci oldu

Azərbaycanlı sənətçi İtaliyada uzunmüddətli müqavilə imzalayıb

Azərbaycan Dövlət Akademik Opera və Balet Teatrının solisti, əməkdar artist Fidan Hacıyeva İtaliya teatrlarında işləmək üçün keçirilən peşəkar vokalçıların beynəlxalq müsabiqəsində birincilik qazanıb. Bununla bağlı bu günlərdə İtaliyadan vətənə qayıdan Fidan Hacıyevanın özü danışdı. Solist deyib ki, müsabiqədə qalibiyyət ona İtaliyada uzunmüddətli müqavilə bağlaması ilə yekunlaşıb:

"Mən çox həyəcan keçirirdim, çox tanınmış simalar və gözəl səslər iştirak edirdi. İtaliya opera teatrlarında işləmək mənim çox böyük arzum idi və məqsədimə çatdım. İtaliya opera teatrlarının impressarioları ilə müqavilə bağladım. Müqaviləyə görə, İtaliyada "Karmen", "Aida" və "Trubadur" operalarında oynamalıyam. İtaliyanın opera peşəkarları səsimi bəyəndilər və mənim çox böyük potensialım olduğunu bildirdilər. Mənim üçün dünyada böyük bir karyera quracaqlarını dedilər. Müqavilə bağladığım agentlik çox böyük bir qurumdur və onlar bütün dünya ilə əməkdaşlıq edirlər. Öncə obrazlarımın italyan şəhərlərində nümayişi təşkil olunacaq. Bu sırada birinci yerdə Karmen obrazı dayanır".

F.Hacıyeva deyir ki, artıq hər ay İtaliyaya gedəcək və səfərləri çərçivəsində italyan dili və rejissorluq dərsi alacaq:

"Hər ay İtaliyaya gedəcəyimə baxmayaraq, əsasən burada olacaq və İtaliyaya ancaq tamaşalar zamanı gedəcəyəm. Artıq müqavilə həyata keçirilməyə başladıqdan sonra həmin agentlik dünya mətbuatının idarəçiliyini öhdəsinə götürəcək. Opera və Balet Teatrının rəhbərliyi tərəfindən mənə bildirildi ki, İtaliyada tamaşada oxuyub qayıtmalıyam. Bütün xərclərimi isə həmin agentlik çəkəcək".

Teatr solistinin sözlərinə görə, onun üçün ən əsas bu yarışmada qələbə qazanmağı olub:

"Müqavilə əsasında tamaşaların nümayişinə gələn ilin yanvarında başlamağı nəzərdə tuturuq. Bu müsabiqədə uğur qazandığım üçün özümü çox xoşbəxt hiss edirəm. Mənim çox böyük arzum var ki, La Skala səhnəsində "Aida", "Karmen" kimi operaları italyan dilində ifa edim və Azərbaycandakı dostlarımın hər biri mənimlə birgə bu sevincli gündə yanımda olsunlar".

F.Hacıyeva qeyd edib ki, dekabr ayı üçün Azərbaycanda da "Karmen", "Aida" operalarının nümayişi nəzərdə tutulur.

Z.RÜSTƏM

Ayna.- 2010.- 16 oktyabr.- S.20.