Hacı İsmayılov "Mosfilm"də çəkilir

Film Azərbaycandan bəhs edir

Rusiyanın uzunömürlü kinostudiyası olan "Mosfilm"də Azərbaycan haqqında film istehsal olunacaq. Bu barədə danışan Akademik Milli Dram Teatrının aktyoru, xalq artisti Hacı İsmayılov bildirib ki, sözügedən film azərbaycanlı rejissor Murad İbrahimbəyov tərəfindən ekranlaşdırılır. "Qardaşım əvəzsizdir" adlı filmdə Hacı İsmayılov poçtda işləyən yaşlı bir kişinin rolunu canlandıracaq.

Aktyorun sözlərinə görə, filmin çəkilişləri İçərişəhərdə, Buzovnada və digər yerlərdə aparılacaq:

"Hazırda isə filmin çəkilişləri xaricdə davam etdirilir. Filmin çəkilişləri dövründə çox maraqlı səhnələr olub. Ümumiyyətlə bu, mənim Murad bəylə ilk işbirliyim deyil. Bu zamana kimi onun bir neçə filmində rol oynamışam və bütün filmləri maraqlı, baxımlı alınır. Ümumilikdə film azərbaycanlıların həyatından bəhs edir. Filmdə olduqca maraqlı faktlar yer alıb".

Aktyor xatırlatdı ki, film Maqsud İbrahimbəyovun ssenarisi əsasında çəkilir.

ŞƏMS

Ayna.-2010.-23 yanvar.-S.19.