"Teatrı məhv etməyin..."

İsrafil İsrafilov primitiv əsərlə teatra üz tutanları qınadı

"Akademik Milli Dram Teatrında elə aktrisa var 6 il ərzində bir kitab belə oxumayıb. Bu aktrisa 6 ildir bu teatrda çalışır, ancaq fəaliyyəti dövründə bir əsər belə oxumadığını dedi. Eləsi də var ki, ona oxuması üçün pyeslər vermişəm, amma həmin pyesləri başqasına verib oxutdurub və ondan qeydləri götürüb mənə təqdim edir, kitabı oxuduğunu deyir. Aktyorların çoxu ancaq teatrın repertuarına salınan əsərləri oxuyublar. Burada əsəri qoyulmayan dramaturqu isə tanımırlar". Bu ağlamalı durumun örtüyünü Azərbaycan Akademik Milli Dram Teatrının direktoru İsrafil İsrafilov götürüb.

Direktor bildirib ki, bu teatrda uzun müddət eyni siyasət hökm sürüb. Ancaq teatrda yeni qanunları həyata keçirmək lazımdır: "Kimsə ortabab belə olmayan pyesini götürüb gəlir Dram Teatrına ki, onun əsəri səhnəyə qoyulsun. Mən bir az dözürəm, o müəllifləri inandırmağa çalışıram ki, bu əsər Dram Teatrında səhnəyə qoyula bilməz. Hələ dözürəm, ancaq görsəm ki, vəziyyət başqadır, o zaman həmin əsərləri mətbuata verəcəyəm. Necə ola bilər ki, sən primitiv düşüncənlə bu camaatı incidəsən. Teatrı məhv etməyin...".

İsrafilov bildirib ki, teatrın düşdüyü vəziyyətə səbəb həm dramaturgiya, həm də rejissuradır:

"Rejissorluğa gəlincə, hər kəsə tamaşa vermək olmaz. Ali diplomu və ya savadı var deyə, hamını Akademik Milli Dram Teatrının səhnəsinə buraxmaq doğru deyil. Çox nüfuzlu adamlar zəif əsərlər yazırlar və müxtəlif yollarla onu teatra sırıyırlar. Bunları demək məcburiyyətindəyəm. Deyim var, "desəm öldürərlər, deməsəm ölləm". Kimsə özünü pis edib, bunları deməlidir. Yaradıcılıq səviyyəsinin aşağı düşməsində birinci səbəb zəif dramaturgiya, ikinci səbəb isə rejissorluğun dilsizliyi olub. Rejissorun səhnə, üslub dili var. Rejissorun müəyyən bir dünyanı, insanları, cəmiyyəti anlayan, qiymətləndirən, bilavasitə bədii realizə işində onu müasirləşdirən istedad keyfiyyətləri var ki, bu mənada bizim rejissura əksər hallarda uduzur. Bu da həm mütəxəssisləri, həm də teatrları təmin etmir".

Teatrda yenidən işə başlayacaq aktyor heyətinə gəlincə teatr rəhbəri bildirib ki, Akademik Milli Dram Teatrı aktyor baxımından əziyyət çəkmir:

"Doğrudur, teatrımızda yaşlı və gənc nəsil aktyorlar arasında yaradıcılıq zəifliyi var. Ayrı-ayrılıqda hər nəslin aktyoru çox istedadlıdır. Ancaq problem ondadır ki, aktyor heyəti kollektiv, ansambl şəklində işləyə bilmir. Bu problemi də həll etməyə çalışacağıq".

Onun sözlərinə görə, nəzərdə tutulan müddətdə teatrda yaradıcı mühit formalaşdırılacaq: "Güman edirəm ki, bu problemlər həll olunacaq. Mən buna əminəm, bunu bacaracağıq. Görsəm ki, bacara bilmirəm, çıxıb gedəcəyəm...".

Akademik Milli Dram Teatrında nəzərdə tutulan müsabiqə ləğv edilib. İ.İsrafilovun sözlərinə görə, əsaslı təmirdən sonra müasir standartlara cavab verən teatrda bütün repertuar dəyişəcək. Artıq köhnə tamaşalar nümayiş olunmayacaq və yeni mövsümdə yeni repertuar siyasəti həyata keçiriləcək: "Biz tamaşaçı qarşısına tam yeni repertuarla, yeni və müasir tamaşalarla çıxacağıq. Hazırlanması, səhnəyə qoyulması nəzərdə tutulan tamaşalarla yeni repertuar yaradılacaq".

Xatun

Ayna.- 2011.- 2 aprel.- S.20.