Musiqi teatrlarının tamaşalarına baxış

MDB teatrşünasları Sankt-Peterburqa toplaşır

Aprelin 1-dən 7-dək Sankt-Peterburqda "Arlekin" Beynəlxalq festivalı çərçivəsində MDB dövlətləri musiqi teatrlarının tamaşalarına baxış keçiriləcək. Festivalda iştirak məqsədi ilə Rusiya Teatr Xadimləri İttifaqı və Musiqili Teatrların Beynəlxalq Assosiasiyasının dəvəti ilə aprelin 1-də Dövlət Musiqili Komediya Teatrının direktoru Əliqismət Lalayev Sankt-Peterburqa yollanıb. Teatrın mətbuat xidmətindən deyildiyinə görə, festival çərçivəsində Sverdlovsk Dövlət Akademik Musiqili Komediya Teatrının səhnəsində qoyulan rejissor N.Çusovanın quruluşunda "Dahi Yekaterina" (bəstəkar - S.Dreznin, libretto - M.Roşin, A.Anno, M.Saltıkov), K.Strejnevin quruluşunda "www.silikonlu axmaq qız.net" (bəstəkar - A.Pantıkin, libretto - K.Rubinski), "Ölü canlar" (bəstəkar - A.Pantıkin, libretto - K.Rubinski) və "Pişik" (bəstəkar - V.Baskin, R.Kiplinqin "Öz-özünə veyillənən pişik" əsərinin motivləri əsasında) tamaşaları nümayiş olunacaq.

Festivalın sonuncu günü - aprelin 7-də isə Sankt-Peterburq Aktyor Evində "Rusiyanın müəllif müzikli - XXI: biz hara gedirik?" mövzusunda "dəyirmi masa" planlaşdırılır. Əməkdar incəsənət xadimi, fəlsəfə doktoru Əliqismət Lalayevin də qatılacağı "dəyirmi masa"da Moskva və Sankt-Peterburqun aparıcı teatr tənqidçiləri, musiqili teatrlar üçün libretto yazan müəlliflər, Rusiyanın digər musiqili teatrlarının nümayəndələri iştirak edəcəklər. Festival çərçivəsində nümayiş olunacaq tamaşalar, eyni zamanda, Rusiya müəlliflərinin son on ildə yazdığı yeni əsərlər müzakirə olunacaq.

Z.Rüstəm

Ayna.- 2011.- 2 aprel.- S.20.