Emin Ağalarovun yeni albomu satışa çıxıb

Əksər mahnıların müəllifi sənətçi özüdür

Gələn həftədən Böyük Britaniyada gənc bəstəkar və müğənni Emin Ağalarovun "Wonder" adlı albomunun satışı başlayacaq. Albomda yer almış 12 mahnıdan 9-nun müəllifi Emin Ağalarov özüdür.

Artıq London metrostansiyalarının girişləri, ictimai nəqliyyatın hərəkətinin gur olduğu yerlərdə gənc bəstəkar və müğənninin posterləri asılıb.

Açıqlamasında bu albomun İngiltərədə yazıldığını deyib: "Wonder" orada proqress olunub. Mən bu albomdakı əksər mahnıların müəllifiyəm. Bu alboma həyatımın 2 ilini, musiqiyə isə son 15 ilimi sərf etmişəm. Mənim üçün uğur insanlar tərəfindən mahnılarımın, səsimin tanınmasıdır".

Emin Ağalarovun "Obvious" hiti bu günlərdə Britaniya radiostansiyalarının hitparadlarında lider mövqedədir. Britaniyanın BBS-2 radiostansiyası bu mahnını hər gün bir neçə dəfə səsləndirir. Bu günlərdə isə Emin Ağalarov "Obvious" mahnısını Britaniyanın İTV telekanalında da canlı ifa edib. Onun "Wonder" diski artıq bir sıra ölkələrdə, o cümlədən Rusiya, Ukrayna və təbii ki, Azərbaycanda musiqisevərlərə təqdim edilib. Bəstəkar və müğənninin hədəfi indi digər ingilisdilli ölkələrdir.

Emin Ağalarov yaxın 2-3 ayı Böyük Britaniyaya səfər etmək niyyətində olduğunu deyir:

"Düşünürəm ki, bu çox mühüm bazarlardan biridir və bunu bütün Avropa izləyir. Əgər sən buradakı radiolardasansa, insanlar sənin mahnılarını sevir və musiqilərini tanıyırlarsa, onda sənin mahnıların avtomatik olaraq Almaniya, Fransa, İspaniya və sair Avropa ölkələrinin radiostansiyalarında səsləndirilir. Bu günlərdə mənim "Obvious" adlanan mahnım BBS radiosunun mərkəzi pley-listinə daxil olub. Onlar mənim mahnımı səsləndirir. Bu mahnını 60 milli regional stansiyalar səsləndirir. Ötən həftə isə İngiltərədə səsləndirilən 25 mahnının içində olub".

Musiqiçi yeni albom barədə də düşünür. Doğrudur, hələlik yeni albomda Azərbaycan haqqında və ya Azərbaycan bəstəkarlarının mahnılarının yer alacağı planlaşdırılmır. Amma gələcəkdə Azərbaycan haqqında mahnılar oxusa, o, mütləq Müslüm Maqomayevin repertuarına müraciət edəcək.

Emin Ağalarov hazırda belə planlarının olmadığını deyir: "Əgər sual Azərbaycanın xaricdə tanıdılması məqsədi ilə verilirsə, mən bunu mahnılarla yox, daha çox Azərbaycandan olmağım barədə dialoqlarla edəcəyəm. Mən azərbaycanlıyam və ingilis dilində, beynəlxalq dildə mahnılar ifa edirəm. Bu mahnıları özüm bəstələyirəm və bu mahnılar başqa müəlliflərin deyildir. Növbəti albomdan desək, burada yenə də mənim öz bəstələdiyim mahnılar olacaq".

Emin Ağalarov 2006-cı ildə buraxdığı "Still" adlı debüt albomu ilə böyük səhnəyə qədəm qoyub. 50 min tirajla satılan həmin albom o zaman Rusiya üçün inanılmaz rəqəm idi. Ardınca, 2007-ci ildə "Incredible", 2008-ci ildə "Obsession", 2009-cu ildə "Devotion" adlı albomlarını buraxan sənətçinin son işi isə "Wonder"dir. Bu albom Azərbaycan dinləyicilərinə ötən ilin dekabrında təqdim olundu.

Z.Rüstəm

Ayna.- 2011.- 2 aprel.- S.21.