İlin I rübündə təhlükəsizlik və müdafiə sektorunda itkilər

"Doktrina" Jurnalistlərin Hərbi Araşdırmalar Mərkəzinin kütləvi informasiya vasitələri üzərində monitorinqinin nəticələrinə əsasən, 2011-ci ildə ölkənin təhlükəsizlik və müdafiə sektorunda itkilərin ümumi sayında kəskin artım hiss olunur. İlin birinci rübündə Azərbaycan təhlükəsizlik və müdafiə sektorunda itkilər 31 nəfər təşkil edib. Ötən müddətdə 30 nəfər yaralanıb (və ya xəsarət alıb).

Müvafiq dövrdə döyüş itkiləri (düşmən gülləsi) 5 nəfər, qeyri-döyüş itkiləri isə 26 nəfər təşkil edir. 2 nəfər naməlum səbəbdən, 2 nəfər qar uçqunundan, 2 nəfər bədbəxt hadisədən (dəm qazından boğulma), 3 nəfər avtoqəzadan, 4 nəfər xəstəlikdən, 9 nəfərsə qeyri-nizamnamə hadisələrindən həyatını itirib. 4 nəfər intihar edib. Həyatını itirənlərdən 28-i Müdafiə Nazirliyinin, 2-si Dövlət Sərhəd Xidmətinin, 1-i isə Daxili Qoşunların hərbi qulluqçusu olub.

İtkilərin ümumi siyahısı:

4 yanvar. 2010-cu ilin oktyabrında Tovuz RHK-dan çağırılmış 19 yaşlı əsgər Tural İbrahimov Müdafiə Nazirliyinin hospitalında vəfat edib (səbəbləri dəqiq deyil).

4 yanvar. DSX-nin Astara zastavasında 2010-cu ilin yanvarında Ağsu RHK-dan çağırılmış 19 yaşlı Niyaz İsrafilov avtomat silahdan atəş açaraq əsgər yoldaşı, Yevlax RHK-dan çağırılmış 19 yaşlı İdris İsmayılovu öldürüb. DSX-nin məlumatına görə, hadisə silahla ehtiyatsız davranma nəticəsində baş verib.

10 yanvar. SQ-in Qazax rayonunda yerləşən "N" saylı hərbi hissəsinin əsgəri, 15.10.2010-cu ildə Binəqədi RHK-dan çağırılmış Nurlan Telman oğlu Səfərov (1992) intihar edib.

15 yanvar. Naxçıvan MR-da əsgərlər - 2010-cu ilin oktyabrında Sumqayıt ŞHK-dan həqiqi hərbi xidmətə çağırılmış Elşad İsmayıl oğlu Bayramov (1991) və 2010-cu ilin yanvarında Babək rayonundan həqiqi hərbi xidmətə çağırılmış Təbriz Vəli oğlu Həmzəyev (1991) qar uçqununda həlak olublar.

17 yanvar. Ermənistan silahlı bölmələrinin Tərtər rayonunun Çiləbürt kəndi yaxınlığındakı mövqelərdən açdığı atəş nəticəsində əsgər, 2010-cu ilin oktyabrında Sumqayıt ŞHK-dan hərbi xidmətə çağırılmış Məmməd Rasim oğlu Azadəliyev (1990) şəhid olub.

25 yanvar. MN Təlim-Tədris Mərkəzinin zabiti, leytenant Rafael Elxan oğlu Yusifli kirayədə yaşadığı evdə dəm qazından boğularaq ölüb.

25 yanvar. Daxili Qoşunların əsgəri, Xaçmaz RHK-dan həqiqi hərbi xidmətə çağırılmış 18 yaşlı Əliyar Cəfərov vəfat edib. Onun xəstəlikdən dünyasını dəyişdiyi bildirilir.

25 yanvar. Ermənistan SQ bölmələrinin Ağdamın Cəvahirli kəndi yaxınlığındakı mövqelərdən açdığı atəş nəticəsində hərbi qulluqçu, leytenant Zamin Allahverdi oğlu Məmmədov (1985) şəhid olub.

29 yanvar. Goranboydakı hərbi hissənin əsgəri, 2011-ci il yanvarın 3-də Biləsuvar RHK-dan hərbi xidmətə çağırılmış Nuran Vahid oğlu Fərəcli (1992) dünyasını dəyişib. Səbəblər bəlli deyil.

3 fevral. MN Naxçıvan MR-dakı hərbi hissədə Tovuz RHK-dan çağırılmış Qaybalı Əli oğlu Məhərrəmovun avtomat silahdan açdığı atəş nəticəsində onun əsgər yoldaşı, Şərur RHK-dan çağırılmış Camal Etibar oğlu Abbasov həyatını itirmişdir. MN-in açıqlamasına görə, hadisə silahla ehtiyatsız davranış nəticəsində baş verib.

9 fevral. Ağdam RHK-dan çağırılmış SQ əsgəri Sarvan Vidadi oğlu Hüseynov Naxçıvandakı hərbi hissədə böyrək çatışmazlığından (MN versiyası) vəfat edib.

11 fevral. MN Təlim-Tədris Mərkəzinin şöbə rəisi, polkovnik Aydın Allahverdiyev yaşadığı evdə dəm qazından boğulmuşdur.

20 fevral. Müdafiə Nazirliyinin Göygöldəki hərbi hissələrinin birində baş verən hadisə zamanı 7 nəfər ölüb. Ölən hərbçilər 1991 və 1992-ci il doğumludur. Səbəblər barədə hələlik açıqlama verilmir. Siyahı belədir: Quliyev Naib Fəxrəddin oğlu (1992) - 2010-cu ilin aprelində Beyləqan RHK-dan hərbi xidmətə çağırılıb; Cavadzadə Cavid Vəkil oğlu (1991) - ötən ilin yanvarında Mingəçevir ŞHK-dan hərbi xidmətə çağırılıb; Suanverdiyev Nurlan Radfel oğlu (1991) - ötən ilin aprelində Ağdam RHK-dan hərbi xidmətə çağırılıb; Xocberov Ramazan Abdulla oğlu (1992) - ötən ilin aprelində Balakən RHK-dan hərbi xidmətə çağırılıb; Kərimov Əfqan Yaşar oğlu (1991) - 2009-cu ilin oktyabrında Balakən RHK-dan hərbi xidmətə çağırılıb; Hüseynov Əhməd Əhmədalı oğlu (1992) - ötən ilin yanvarında Ağcabədi RHK-dan hərbi xidmətə çağırılıb; Quliyev Zakir Etibar oğlu (1991) - ötən ilin yanvarında Bakının Yasamal RHK-dan hərbi xidmətə çağırılıb.

20 fevral. Ermənistan silahlı qüvvələri bölmələrinin Füzuli rayonu ərazisindəki adsız yüksəkliklərdə, Aşağı Seyidəhmədli və Aşağı Əbdürrəhmanlı kəndləri yaxınlığında yerləşən mövqelərindən Azərbaycan Silahlı Qüvvələrinin üzbəüz mövqelərini atəşə tutması nəticəsində 2009-cu ilin oktyabrında Neftçala RHK hərbi xidmətə çağırılmış əsgər Tural Murad oğlu Hüseynov (1990) şəhid olub.

23 fevral. Tovuz rayonunda baş vermiş yol qəzasında əsgər Ramin Əlisafa oğlu Cəbrayılov (1992) hadisə yerində keçinib.

9 mart. DSX-nin Göytəpə sərhəd dəstəsinin silah-sursat xidmətinin rəisi, mayor Raqif Qəniyev özünə xidməti silahdan atəş açaraq intihar edib.

14 mart. 2011-ci ilin yanvarında Sumqayıt ŞHK tərəfindən həqiqi hərbi xidmətə çağırılmış Müzəffər Rafiq oğlu Pirverdiyev (1990) Qazaxda yerləşən "N" saylı hərbi hissədə xəstəlikdən (pnevmoniya) vəfat edib.

15 mart. SQ əsgəri, 2010-cu ilin yanvarında Oğuz RHK-dan çağırılmış Orxan İlham oğlu Məmmədov (1991) özünü asaraq intihar edib.

20 mart. MN-in Tərtər rayonu ərazisində yerləşən hərbi hissəsində xidmət edən, 2010-cu ilin yanvar ayında Füzuli RHK-dan həqiqi hərbi xidmətə çağırılmış əsgər Elnur Mübariz oğlu Məmmədov (1991) düşmən tərəfindən atəşkəsin pozulması nəticəsində şəhid olub.

23 mart. Füzuli rayonunun Aşağı Əbdürrəhmanlı kəndi yaxınlığında erməni hərbçilərin açdığı atəş nəticəsində Tovuz RHK-dan çağırılmış müddətdən artıq xidmət edən hərbi qulluqçu Samir Hidayət oğlu Ağayev (1986) həlak olub.

26 mart. Bakı-Quba yolunun 28-ci kilometrliyində, Sumqayıt ərazisində yerləşən "Quba" kafesində Müdafiə Nazirliyinin "N" saylı hərbi hissəsinin giziri Azər Əsgərov (1984) "Makarov" markalı tabel silahı ilə Salyan rayon sakini Firuzə Əsədovaya (1989) bir dəfə atəş açaraq qətlə yetirib. A.Əsgərov daha sonra tapançadan başına atəş açaraq özünə qəsd edib. Gizir ağır vəziyyətdə Sumqayıt şəhər Təcili Tibbi Yardım Xəstəxanasına çatdırılsa da, onun həyatını xilas etmək mümkün olmayıb. Polisdən bildirilib ki, hərbçinin hadisəni törətməsinin motivi hələlik məlum deyil.

27 mart. Azərbaycan Silahlı Qüvvələrinin ikiyüksək rütbəli zabiti - MN "N" saylı hərbi hissəsinin qərargah rəisi, mayor Nəsimi Xankişiyev və rabitə bölüyünün rəis müavini, mayor Tahir Məmmədov Şəmkir rayonu ərazisində avtoqəza nəticəsində hadisə yerində keçiniblər.

31 mart. Müdafiə Nazirliyinin Naftalanda yerləşən "N" saylı hərbi hissəsində 2010-cu ildə Bakının Nərimanov Rayon Hərbi Komissarlığından həqiqi hərbi xidmətə çağırılmış Kamil Lətif oğlu Məmmədli (1991) vəfat edib (rəsmi səbəbi deyilmir).

Ayna.- 2011.- 9 aprel.- S.9, 10.