"Arzulayıram ki, kiçik radiom olsun"

Tahir İmanov auditoriya ilə söhbət etmək istəyir

Aprelin 14, 15, 16-da "Planeta Parni iz Baku" KVN teatrı yeni proqramı ilə seyrçiləri Heydər Əliyev Sarayına toplayır. Kollektiv artıq iki günlük proqramı uğurla başa vurub. Teatrın rəhbəri Tahir İmanov səhnəyə çıxmadan öncə söylədi:

- Biz eyni vaxtda üç yubileyi - "Planeta Parni iz Baku" KVN teatrının 10 illiyi, "Parni iz Baku" komandasının 20 illiyi və beynəlxalq KVN hərəkatının 40 illiyini qeyd edirik. Sanki zaman dayanıb.

- Yeri gəlmişkən, "Planeta Parni iz Baku" KVN teatrının yubileyi Elçin Həmidovun xatirəsinə həsr edilir. Onun rollarını xatırlayırıq. O, necə insan idi?

- Mənim üçün hər şeydən əvvəl peşəkar bir insan idi. Həyata, dostluğa, varlı və kasıb, nazir və ya süpürgəçi olmasından asılı olmayaraq, ətrafdakılara öz səmimi münasibətilə seçilən insan idi. Elçin belə insan olub, sonradan isə istedadlı aktyor kimi tanındı. Deyərdi ki, məhz bizim teatr sayəsində məşhurlaşıb. Mən bilirəm ki, onun uzun illər işlədiyi Musiqili Komediya Teatrında bu sözlərə həsəd aparacaqlar, lakin fakt faktlığında qalır. Bu, Elçin Həmidovun sözləridir.

- Bu dəfə hansı yeniliklər var?

- Baxmayanlar üçün kiçik bir açıqlama vermək istərdim. Adətən sonda parodiya nömrəsi olur, bu il də bu var, lakin fantastika janrında.

- Bəs bu dəfə hədəf kimdir?

- Siyasi və ictimai xadimlərin parodiyası ölkədəki korrupsiyaya qarşı aparılan mübarizə ilə bağlıdır. Bu mövzuya məşhur "Məhəllə" səhnəsində də toxunulur. Estrada ifaçılarının parodiyasına gəldikdə, ilk dəfə olaraq bizim teatr bunu fantastika janrında, lakin yumor prizmasından göstərir.

- Nömrədə yadplanetlilər var?

- Xeyr, biz, sadəcə, zamanı dəyişmişik. Əminəm ki, bu nömrə yaddaşlarda çox qalacaq.

- Nömrələrinizdə adətən ikiüzlülük, korrupsiya, qorxaqlıq, bacarıqsızlıq kimi qüsurları ələ salırsınız. Yəni bu xətt davam edir?

- Biz ölkəmizə xidmət edirik və sonadək buna sadiq qalacağıq.

- İşləriniz barədə bəzi şərhlər xoş olmayan təəssürat oyadır...

- İndiyədək bizə həsəd aparırlar və təhqir edirlər, səhnələrimizi mənasız adlandırırlar, lakin mən heç vaxt buna cavab vermirəm. Biz bacarıqsızıqsa, onda neçə illərdir konsertlərimizə gələn insanlar kimdir? Biz Aydan düşməmişik, 20 il ölkəni beynəlxalq arenada təmsil edirik.

- Ümumiyyətlə, bu teatr və artıq baş ağrısı nəyinizə lazımdır? Axı çıxışlarınıza görə solo karyera qura bilərdiniz. Deyək ki, estradamızda Zadornov tipli yumorist demək olar yoxdur...

- Bu barədə danışmaq artıq gecdir. Heç bir KVN-çi deyə bilməz ki, nəyəsə təkbaşına nail olub. Bu, komanda oyununun nəticəsidir. Məsələn, bizim idmanda uğurlar yalnız təkbaşına mübarizələrlə bağlıdır, yəni "üz-üzə". İdmanın komanda növlərində, məsələn, futbolda bir uğur qazana bilmirik.

- Niyə axı, məsələn, üç qadın voleybol komandamız beynəlxalq yarışların finalına çıxa bilib və onlardan biri "Azərreyl" Kubokun qalibi olub.

- Bu, yeganə haldır. KVN üçün əmək, yumor və satiranın kollektiv növü yaxındır.

- Siz dəfələrlə qeyd etmişsiniz ki, yumora gülmək yox, fikirləşmək də lazımdır. Yumorun başlıca fəlsəfəsi?

- ABŞ-da məhkəmə zamanı şahid əlini Bibliyanın üzərinə qoyur və deyir: "And içirəm ki, həqiqəti, yalnız həqiqəti və həqiqətdən başqa heç nəyi deməyəcəm". Bu prinsip bizə də aiddir. Biz insanların gündəlik həyatda danışdıqlarını deyirik ki, buna da yalnız rəngarənglik, dramatik xətt verərək yumoristik səhnələrə çeviririk.

- Sizin üçün 10 il azdır, yoxsa çox?

- Həyatın yarısı kimi.

- Bu gün sizin teatr ilə 10 il əvvəlkinin arasında nə kimi fərq görürsünüz?

- Dil üslubu dəyişib. Biz tədricən milli dilə keçdik. Düzünü desəm, çox ağır idi, çünki hamımız rusdilli idik. Azərbaycan dili çox zəngin, gözəl və mürəkkəbdir, sözün doğrusu, indiyədək onu öyrənir və bundan utanmıram.

- Zaman da öz düzəlişlərini edir.

- Şübhəsiz, Aleksandr Vasilyeviç Maslyakovun bizə öyrətdiyi prinsiplər isə heç vaxt dəyişmir. Bunlar güldürmək, həqiqəti demək, tənqid etmək və təhqir etməməkdir.

- Yeri gəlmişkən, bu il onun da yubileyidir, 70 yaşı tamam olur.

- Mütləq əziz və sevimli insanı təbrik edəcəyik.

- Çıxışlarınızdan sonra təhdid və təhqirlərlə tez-tez üzləşmisiniz?

- Bunların hamısı olub və hətta qardaşımla birlikdə çemodanı götürüb ölkədən getmək istəmişik.

- Yaddaqalan çoxlu obrazlar - Eliş və Roşka, Ağanatiq, Sazoğlan, meyxanaçı, bağçılar... Onlar yubiley konsertində də varmı?

- Yubiley konserti öz-özlüyündə imtahan, yaradıcılıq fəaliyyətinin yekunlarıdır. Mütləq sevimli qəhrəmanlar olacaq, lakin yeni ampluada. Onlar arasında Ağanatiq və tamamilə yeni Şiraslan Gursəsli var. Vəssəlam, təfərrüatların hamısını açıqlamaq istəmirəm.

- Bir sual: neçə yaşınız var?

- Neçə verərsiniz?

- Təxminən 35.

- Təxminən elədir.

-Bunu əbəs soruşmuruq. Bəhram Bağırzadə deyib ki, 40 yaşından sonra KVN-də oynamırlar. Deməli, teatrınızın beş il ömrü qalıb?

- Yox, axı mən dedim təxminən. Mən bütün bu deyimlərdən uzağam. Yalnız bizi Yaradan əvvəlcədən nəyin necə olacağını bilə bilər. Zaman hər şeyi öz yerinə qoyur. Hazırda yalnız onu arzulayıram ki, kiçik bir radiom olsun və dinləyicilərlə danışım. İstək var, lakin imkan yoxdur. Bu, sponsorlara işarə deyil. Sadəcə, sizlərlə ürəkdən söhbət etmək istəyirəm.

Şəms

Ayna.- 2011.- 16 aprel.- S.21.