"Mən onu xoşlamıram, qulaq da asmıram"

Aygün Bayramova sənətə baxışlarını açıqladı

Xalq artisti Aygün Bayramova muğamda sintezin əleyhinə deyil. Amma elə məqamlar olur ki, irad bildirir, qəbul etmədiyi məqamlar var. Bir neçə həftə əvvəl Heydər Əliyev Sarayında Cənubi Amerikadan olan musiqiçilərlə muğam ifaçılarının ifa sintezini isə bəyənib:

- Bizim o musiqiçilərlə ilk layihəmiz hələ 2007-ci ildə olmuşdu. Birgə albom çıxdı və yaxşı qarşılandı. Orda mənim, Alim Qasımovun, Arif Babayevin, Zabit Nəbizadənin ifası var. Disk İsveçdə çox yüksək səviyyədə buraxıldı...

- Bəs, Sevda Ələkbərzadənin ifasında xalq mahnılarının sintezi necədir?

- Şəxsən mən onu xoşlamır, qulaq da asmıram. Elə mahnılar var ki, onu o şəklə salmaq olmaz. Bu, tək mənim fikrim deyil. Sənət adamlarının, adi tamaşaçıların da fikirlərini eşitmişəm, onlar da qəbul etmirlər. Kim qəbul edir, özü bilər. Şəxsən mənim xoşuma gəlmir ki, o mahnılar elə tərzdə oxunsun. Sintezi baxır hansı formada, hansı tərzdə edirsən.

- Bakıya gəldikdən sonrakı illərdə həyatınızda daha çox nələr dəyişib?

- Ağdamdan Bakıya gələndə 16 yaşım ancaq olardı. Valideynlərimdən ayrı yaşamaq mənim üçün çox çətin idi. Bakı mühitinə çox gec öyrəşdim. Çətin olurdu, darıxırdım. Sonradan tədricən özümü sakitləşdirdim. Bir də ki, mən 9 yaşımdan oxumağa başlamışam. Bilirdim ki, böyüyəndə bu yolu seçəcəm, ona görə də buna hazır idim. Özü də mən iki dəfə Bülbül adına musiqi məktəbinə qəbul olmuşam, amma fikrimdən daşınıb getməmişəm. Üçüncü dəfə münsiflər dedilər, bu daşı ətəyindən tök, gəlib oxumaq lazımdır. Onlar məni görəndə artıq əsəbiləşirdilər. Mən Fikrət Əmirov, Şövkət Ələkbərova, Vasif Adıgözəlov, İslam Rzayev, Arif Babayev kimi sənətkarların qarşısında çıxış edib bu sənətə gəlmişəm. Amma bu gün xalq artisti fəxri adını qazanmağa qədər keçdiyim yol mənə asan başa gəlməyib. Çoxları elə bilir ki, fəxri ad aldın, vəssalam, hər şey bitdi, işləməsən də olar. Əksinə, o fəxri adı qoruyub saxlamaq olduqca məsuliyyətli işdir.

- Təbii ki, bu sənətə gəldiyinizə görə peşmanlığa əsas yoxdur. Amma bu illər ərzində həyatınızda nəyinsə dəyişməsini istədiyiniz olubmu?

- Əlbəttə, peşman deyiləm. Xoşbəxtəm ki, bu yolu seçmişəm. Hərdən fikirləşirəm, görəsən, xanəndə olmasaydım, nə sənətin sahibi olardım? Bu sualı tez-tez özümə verirəm. Amma yenə də deyirəm, yox, Allah bu istedadı mənə veribsə, deməli, mən elə xanəndə olmalıymışam.

- Bir müddət sizi "Xalq ulduzu" müsabiqəsində münsiflərin arasında gördük. Sonra qəfildən layihədən ayrıldınız. Gah dedilər, təqdimat xoşunuza gəlməyib, gah dedilər, Aybəniz Haşımova ilə nəsə problem yaşanıb. Səbəb nə idi?

- Bu barədə danışmaq istəməzdim. Amma söz düşmüşkən, aydınlıq gətirim. Mən hansısa bir işə başlamazdan öncə vaxt istəyirəm və fikirləşirəm. Bu layihəyə birinci dəfə dəvət alanda da fikirləşmək üçün 4-5 gün vaxt istədim. Layihəni də ciddi qəbul etmişdim. Çox gözəl başlamışdı. Birinci "Xalq ulduzu" yüksək səviyyədə keçdi. Bəlkə ikinci də yaxşı keçdi. Amma qalanları belə də... Artıq birinci layihədən sonra ora getmək istəmirdim. Vaxtım olmurdu. Sonra ikinci dəfə dəvət aldım. Sözün düzü, bir az könülsüz getdim.

- Bəyənmədiyniz nə idi?

- Deyim də. İkincini də, fikirləşdim ki, birtəhər yola vermək olar. Amma üçüncü layihədə fikrim qəti idi ki, daha getməyəcəyəm. Başqa-başqa fikirlər, sözlər eşidirdim. Nə isə. Mənə aid olmayan fikirlər idi.

- Layihə barədə idi?

- Layihə barədə də fikirlər olurdu. Çoxlu zənglər gəlirdi. Birinci "Xalq ulduzu"nda da müəyyən ifaçıların qohum-əqrəbaları zəng edirdi ki, "niyə mənim uşağımı tənqid edirsiz? Filankəs o birindən yaxşı oxuyurdu" və s. Ancaq layihədən ayrılmağımın birinci səbəbi vaxt məhdudiyyəti oldu. Üçüncü "Xalq ulduzu"nda da "saqqızımı oğurladılar". Amma könülsüz gedirdim. İnanın, o bir həftə seçim ərzində hər dəfə otağa girəndə istəyirdim deyəm ki, məni üzrlü hesab edin, gedirəm. Bu, mənim səmimi sözlərimdir. Layihə rəhbərlərinin hörməti, xoş münasibəti bir az qarşımı kəsirdi, düzü. Beləcə, seçim mərhələsi də qurtardı.

- Amma nəsə oldu ki, siz fikrinizi qətiləşdirdiniz. Çünki layihə efir həyatına da başlamışdı.

- Başlasa da, mən artıq birinci efir günü studiyada qəti qərarımı verdim. Qəti qərara gələndə də heç kim məni yolumdan döndərə bilməz.

- Canlı efirdə yalnız bir gün göründünüz. Həmin gün nə baş verdi?

- Yox, sadəcə, qəti qərara gəldim. Səhəri də zəng vurub qərarımı layihə rəhbərlərinə dedim. Bir həftəlik əziyyətimi də halal elədim. Çünki o seçim turları olduqca çətin mərhələdir. 800-900 adamın hərəsinin ağzından bir avaz gəlir. Onların arasında istedadlıları seçmək çox çətindir. Seçilmiş ifalara qiymət verməyə nə var ki?! Bunlar yenə elə bildilər mən gələcəm. Efir günləri də mənə zəng etdilər. ATV-dən də zəng vurdular. Dedim yox, gəlmirəm. Sonra da bir neçə nəfər mənə xəbər verdi ki, efirdə səni müzakirə edirlər. Mənim müzakirəyə ehtiyacım yoxdu. Mən Aybəniz Haşımovaya da öz fikrimi bildirdim. Hər halda efirdə demək ki, Aygün gəlmədi, düz eləmədi. Birincisi, mən uşaq deyiləm. Nə etmişəmsə, düz etmişəm. Sözümü onda dedim. O da dedi, "məni məcbur etdilər" və s.

- İndi Aybəniz Haşımova ilə münasibətiniz necədir?

- Bu barədə danışmaq istəmirəm.

- Aydın oldu... Aygün xanım, həqiqətən, 7 min manata toya gedirsiniz?

- Niyə də yox? Bunun aparaturası, tar, kamanı, başqa ifaçısı var. Elə adam var ki, 12 minə toya gedir. Söhbət bütün toydan gedirdi, 15 dəqiqədən yox. Bir də ki, xarici, türk müğənnilər Bakıya neçəyə gəlir? Onları toya da gətirirlər, konsertlərə də. Qiymətləri hamı çox gözəl bilir. Bizim ifaçıların nəyi əskikdir?.

Şəms

Ayna.- 2011.- 30 aprel.- S.20.