Aşıq Ələsgərin 190 illik yubileyi qeyd olunub

Qonşu ölkələrdən də aşıqlar gəlmişdi

Bu il milli aşıq sənətinin çox şöhrətli ismi olan göycəli Aşıq Ələsgərin dünyaya gəlişinin 190 ili tamam olur və bu münasibətlə böyük aşığın xatirəsi bütün il ərzində ən müxtəlif məclislərdə anılmışdır. Dekabrın 14-də Heydər Əliyev Sarayında bu sıradan böyük ustadın 190 illik yubileyinə həsr olunmuş təbdir vardı. Yubiley mərasimi Mədəniyyət və Turizm Nazirliyinin və Azərbaycan Aşıqlar Birliyinin təşkilatçılığı ilə keçirilib. Mərasimdə çıxış edən mədəniyyət və turizm naziri Əbülfəs Qarayev xatırladıb ki, aşıq sənəti həm Azərbaycan xalq ədəbiyyatının, həm də ümumiyyətlə mədəniyyətimizin qədim tarixə və zəngin ənənələrə malik qollarından biridir. Bu sənətin inkişafına həmişə dövlət qayğısı olub, aşıqlarımız, bu sahədə çalışan digər ifaçılar fəxri adlara layiq görülüb, onların konsertləri üçün şərait yaradılıb. Qarayev deyib ki, 2011-ci ildə Azərbaycan aşıq sənətinin görkəmli nümayəndəsi, böyük ustad Aşıq Ələsgərin anadan olmasının 190 illiyi respublikanın bölgələrində geniş şəkildə qeyd edilib.

Çıxışlardan sonra Azərbaycanın müxtəlif bölgələrini təmsil edən aşıqlarla yanaşı, Türkiyə, Güney Azərbaycan, Rusiya və Gürcüstandan dəvət olunmuş aşıqlar da çıxış ediblər.

Aşıq Ələsgər saz sənətini Aşıq Alıdan öyrənib. Saz sənətinin populyarlaşmasında müstəsna xidmətləri var. Onun qoşmaları bu gün də yaşarıdır, öz təravətini itirməyib və zövqləri oxşayır.

Aşıq Ələsgər 1926-cı ildə dünyadan köçmüş, Göycə mahalının Ağkilsə kəndində torpağa tapşırılmışdır. Məzarı üstündə büstü qoyulmuşdu. İndi o kənddə azərbaycanlılar yaşamır. 1988-ci il deportasiyasında o kənd elliklə Azərbaycana köçməli oldu. Aşıq Ələsgərin qərib məzarı isə o torpaqdadır. Məzarın taleyi bilinmir. Yəqin ki, o da erməni vandalizminə məruz qalan minlərcə abidələrimizin taleyini yaşayıb.

Ayna.- 2011.- 17 dekabr.- S.20.