"O sevgini parçalamaq olmaz"

Aygün Kazımovanın "fikri-zikri yalnız işdir"

Gündəmdə yenilikləri ilə qalmağa çalışan xalq artisti Aygün Kazımova daha bir yenilik üzərində düşünür. Bu yenilik yanvarın 26-da - onun doğum günündə olacaq. Yeni təqvimdə də planları genişdir. Bu günlərdə başladığı işləri gələn il tamaşaçılarla bölüşəcək:

- Yanvarın 26-da doğum günümdür. Həyatımla maraqlanan, məni sevən insanların qarşısına, hər zaman olduğu kimi, bu dəfə də yeniliklə çıxacağam. Özü də ilk addım mən tərəfdən olacaq.

- İlin sonuna doğru Türkiyə ilə bağlı planlarınız açıqlandı. Türk şou-biznesinə qatılmağın mümkün olmadığının aydınlaşdığı bir zamanda siz düşüncələri nəylə dəyişə bilərsiz?

- Əsas işim Türkiyədə davam edir. Hazırda Yeni il çəkilişlərinə görə vətəndəyəm. Buradakı işləri qoyub gedə bilməzdim. Orada da sağ olsunlar, məni yaxşı anladılar. Baxmayaraq ki, müqaviləmiz var, onlar kiminlə çalışdıqlarını yaxşı bilirlər. Yeni ildə ata vətənimə qayıdacağam. Azərbaycan mənim ana, Türkiyə isə ata vətənimdir. İşıq görürəm. Güclü, etibarlı komanda ilə işləyirəm, inşallah, gələn aylarda niyə bizim sənətçilərin oranın sənət mühitinə qatıla bilmədiklərini açıqlaram. Hələlik çoxları Azəri Günelin adını çəkir. Qeyd edim ki, Güneli şans Türkiyəyə apardı. İbrahim Tatlısəsin dəstəyi ilə tanındı, proqramlara çıxdı. Hətta icazəsiz bizim mahnıları da oxudu, "əcəb edirəm" də dedi. Brilliant xanımın, mənim, Nazpəri xanımın mahnılarını oxudu, lakin davamı gəlmədi...

- Bizdən bir çoxları "qatılıb", lakin onların gördükləri iş Türkiyə səhnəsində "görünmür".

- Yəqin ki, onlar lazımınca işləməyiblər. Hər şey qarşıya qoyulan məqsəddən asılıdır. Təkcə "Kral" televiziyasında klipin yayılması, xahişlə proqrama çıxmaq hər şey demək deyil axı. Mən orda elə səviyyədə olacağam ki, özüm istəməyəcəyəm, məni onlar istəyəcək. Xahişlə, minnətlə arzu edəcəklər.

- Orda da qadın qısqanclığını müşahidə etmisiniz?

- Mən orada hansı proqramda, toplantıda iştirak etmişəmsə, qadın qısqanclığının şahidi olmamışam. Qadın seyrçilər məni sevgi ilə izləyiblər.

- Seyrçi sevə bilər, ora sənətçilərini nəzərdə tuturam.

- Sənətçilərlə, belə deyək də, hələlik "toqquşmalarımız" olmayıb. Hələ üzə çıxmıram. Hazırda çalışma prosesindəyik. Birinci çıxacaq mahnım sadə bir çıxış da ola bilər. Sadə geyimdə, gözə çarpmayan makiyajda ola bilərəm...

- Türkiyə şou-biznesini illər öncə, hətta 90-cı illərdə sınamışdınız. Lakin o vaxt özünüz imtina edib geri döndünüz...

- O vaxt lazım olan komanda yox idi. Ən böyük səbəbim İlqarənin balaca olması idi. Onu dayələrin ümidinə qoyub gedə bilməzdim. Başqa şərtlər var idi. Orda çox qalmalı idim, İlqarə də yanımda ola bilməzdi, çünki məktəbdə oxuyurdu. Öz vəziyyətimdən də məmnun deyildim. İlqarəni etibar edəcəyim insan yoxuydu. İkinci dəfə də belə bir addım atdım, yenə İlqarəni düşünüb geri çəkildim. İndi qızım böyüyüb, mənə dəstəkdir. Artıq planları bir yerdə cızırıq, mahnıları birlikdə dinləyirik. Daha problem olmaya bilər, istədiyi vaxt təyyarəyə oturub yanıma gələ bilər.

- Müsahibələrinizin birində deyirsiniz ki, 7 il "qış yuxusunda" olmusuz. Bu qədər vaxt itkisinə heyfsilənmədiniz?

- Yox, heyfsilənmirəm. 10 istəkdən 9-u uğurlu olub, biri uğursuz olursa, bunu uğursuzluq kimi qəbul etmək düzgün deyil. Olmaz. Bu illər ərzində özümün və ətrafımdakıların istəmədiyi Aygün oldum. Bunu görüb-eşidirdim. Bunu da bacardım. Keçdim başqa mərhələyə.

- Yenidən sizi duetlə gördük. Yenə də heç kimin gözləmədiyi duet ortağı... Bəlkə də sizin yerinizə başqası olsa, bu duet üçün uzun müddət düşünərdi...

- Göghanın mahnısını eşitdim, canlı yayımda özümü saxlaya bilmədim. Mənim ağlıma nə gəldisə, onu etməliyəm. Üstəlik gözəl bir şou da alındı. Bəstəkar, aranjimançı, söz yazarı birgə iştirak etdiyimiz proqrama telefon vasitəsilə qoşuldular. Mən özümü saxlaya bilmədim və təklif etdim. Utanmadım, özümə ayıb bilmədim. Elə adamlar var ki, insanlar özlərinə sığışdırmır, lakin mən onunla fəxr edirəm. Bəzən mənə deyirlər "sən Aygünsən, bunu etməməlisən". Mən özümdə kompleks görüb o addımı atmıram, fikrimdən dönmürəm. Bilirəm ki, bunu etməsəm, onlardan biri olaram. Sonra görürəm ki, düzgün etmişəm.

- Bəs indiyədək nəyə ömrünüzdə "yox" demisiniz? Nəyəsə məhdudiyyət var?

- Ömrümdə indiyədək nəyəsə "yox" dediyim olmayıb. Və yaxud da "Yox ki, yox!" şablon cavab olsa da, bizim "yox"umuz birdir. Elə bir qorxulu fikir də ağlımdan keçməyib ki, "yox" deyəm.

- Çalışdığınız heyət niyə məhz sizi seçdi. Səbəbi necə izah etdilər?

- Yox, onlar məni seçmədilər. Mən onları seçdim. Əvvəlcə klip çəkilişi üçün onlarla görüşdüm. Sonra onların işə münasibətini gördüm, yaxşı mənada havalandım. Və düşündüm ki, potensialımı daha geniş arenaya çıxarmalıyam. Oradakı iş ilə buradakı iş arasında fərq çoxdur. Burda bütün işləri özüm görürəm. Düşünürəm, plan cızıram. Ətrafımdakılar isə, sadəcə, həyata keçirirlər. Orda hər kəs öz işini görür. Sənin işin, sadəcə, mahnı oxumaqdır. Təsəvvür edin, bir mahnı seçimi üçün 300-dən artıq mahnı dinləmişəm.

- Bunların maddi qarşılığı var?

- Təbii ki, bunların hamısı, istədiklərim, tərəfimdən ödənilir. Sonra isə görək nə olacaq. Riskdir. Mənim həyatım özü də bir riskdir. Bu açıqlamanın özü də riskdir. Siz elə bilirsiniz ki, onlar hər sənətçi ilə işləməyə can atır və ya bəyənirlər? Artıq o şirkətə 10-15 zəng də olub, onlara verilən cavabları da var. Çoxu da işləmək üçün yox, maraq üçün zəng edib. Nədir, kimlərdir, neçəyə çəkiblər? Qiymətləri öyrəniblər, onları qane etməyib. Onlar da deyiblər ki, biz Azərbaycandan bir sənətçi ilə çalışırıq. Onlar perspektiv görmədikləri sənətçi ilə çalışmazlar.

- Aygün Kazımovanın həyatında bu gün ancaq iş var?

- Ancaq iş, bəli. Çünki girişdiyim işə sevgini parçalamaq olmaz. Onda alınmayacaq. Ona görə də bu gün bütün fikrim-zikrim ancaq işimə yönəlib.

Xatun

Ayna.- 2011.- 24 dekabr.- S.21.