Türklərin qədim rəqsinə həsr olunmuş yeni musiqi albomu

"Yallı"nın ilkin adı "Yola" olub

Bu yaxınlarda ABŞ-da "TÜRK DÜNYASI SINIRSIZ" layihəsi çərçivəsində qədim türk rəqsinə həsr olunmuş "YOLA,YOLA" musiqi albomu çıxıb. Bu layihə özlüyündə Türkdilli dövlətlərin bütövlüyü və birliyi ideyasını daşıyır. SD diskə toplanmış materiallar əsasında Tenqriliyin, Turanın və ümumiyyətlə dünya Türklərinin mədəniyyətinə aid müəyyən simvolları ehtiva edən bir video klip də əlavə olunub. Albomun realizə olunması 6 ölkədə - İsveçrə, Azərbaycan,Türkiyə, Böyük Britaniya, Almaniya, ABŞ-da həyata keçirilib.

Fərəhli haldır ki,bu SD albomunun prodüseri və nəğmədəki şeirlərin müəllifi - millətsevər aydınımız, türkoloq Sevinc Bağırovadır. Dekabrın 21-də Bakıdakı Nobel evində "YOLA,YOLA" musiqi albomunun təqdimatı idi.

Sevinc xanım uzun illərdir xaricdə yaşayır. Türk xalqlarının, eləcə də Azərbaycan türklərinin mənəvi dəyərlərini Amerika və Avropa ölkələrində tanıtdırmaq istəyi ilə çalışır. Bu sahə ilə bağlı çoxlu çalışmaları, layihələri var. Bildiyimiz kimi, YUNESKO və BMT-nin baş assambleyası 2010-cu ili "Mədəniyyətlərin yaxınlaşması ili" elan etdi. Bu qərar kontekstindəki ideya bir-birinə yaxın mədəniyyətlərin ümumi özəlliklərini ortaya çıxarmaq və çağdaş şərhini vermək idi. Sevinc xanım da bu ideyadan çıxış edib Türk dünyası üçün belə bir önəmli layihəsini üzə çıxarıb.

"Sevinc xanıma görə, qədim türklərin, eləcə də bu gün Azərbaycan türklərinin "Yallı" kimi məşhur olan rəqsinin ilkin adı "Yola" olub. Fəlsəfə doktoru Sevinc Bağırovanın bu təşəbbüsü "YOLA" (yəni "Yallı") rəqsinin yeni modern interpretasiyada nisbətən dirçəlməsinə və türkdilli ölkələrin birliyinə aparan yolda, kiçik olsa da, önəmli töhfədir. Onun bir istəyi də budur ki, bu qədim rəqs qorunaraq YUNESKO-nun xəzinəsində yer alsın. Biz də bu istəyə qoşuluruq.

Təqdim olunan layihə ilə bağlı, ümumiyyətlə, bu musiqi albomunun yaranması ideyası ətrafında Sevinc xanımın Türk dünyası - Turan, Tenqrilik, ortaq türk kültürü, dili ətrafında öz düşüncələri var. "Bu gün dünyada baş verən proseslər bizdə belə bir layihəni gerçəkləşdirmək düşüncəsi doğurdu. Bu proseslər türk xalqlarından tolerantlıq və tarixin qlobal gedişatına təkamüllü inteqrasiya tələb edir. Türkün humanist dəyərləri bizə türk mədəniyyətinin dil, ənənə, sənət və dünyagörüşü vasitəsi ilə gəlib çatmışdır. Nəyə görə məhz "YOLA" - bu rəqsin dəyəri nədir? Onun önəmi türklərin rəsmlərində özəlliklə vurğulanıb, tarixdə ən qədim rəqslərdəndir, bir mərasim rəqsi olaraq, "Yola", sadəcə, bir əyalətə yox, ümumən Türklərə məxsus olan bir rəqsdir və bu gün - münaqişə və müharibələr dönəmində bu, həddindən çox vacib və aktualdır. "Yola" - oyandırır, sağaldır, istiqamətləndirir, birləşdirir, ruhlandırır və tərbiyələndirir. "Yola" - Tenqriliyin bütün simvollarını əks etdirir. Melodiyası və hərəkətləri olduqca sadədir.

Əsərin musiqisini yeni aranjimanda türkiyəli bəstəçi Volqa Tamoz bir neçə versiyada təqdim edib. Diskə əlavə olaraq, birgə toplanmış materiallar əsasında informatika mütəxəssisi Zəhra Ağayeva tərəfindən bütövlükdə bütün türklərinin kültürünü "YOLA" rəqsində əks etdirən videoklip yaradıldı. "YOLA" rəqsində də əks olunmuş bu simvolların planetimizin bütün insanları üçün qlobal əhəmiyyəti var.

Pərvanə MƏMMƏDLİ

Ayna.- 2011.- 24 dekabr.- S.20.