Gəncədə Nizami muzeyi, Qubada tarix muzeyi uçub

Ölkədə 51 muzey binası - əsaslı təmirə möhtac

Ölkənin 41 şəhər və rayon muzeyinin yeni müasir standartlara cavab verən bədii tərtibata ehtiyacı var. Bu barədə Mədəniyyət və Turizm Nazirliyinin 2010-cu il ərzində gördüyü işlər haqqında hesabatında vurğulanır. AYNA nazirliyin rəsmi saytına istinadən hesabatda açıqlanan bir sıra məqamları oxuculara çatdırır.

Ağcabədi, Daşkəsən, Göyçay, Hacıqabul, Göygöl, İsmayıllı rayonunun Lahıc, Qazax, Qax, Lerik, Lənkəran, Şəki tarix-diyarşünaslıq, Mingəçevir şəhərinin tarix muzeyi və digər muzeylərin ekspozisiyalarında təkmilləşdirmə işləri aparılmayıb, eksponatlar bərpa edilməyib, müasir tələblərə uyğun mövzu-ekspozisiya planları hazırlanmayıb.

Sənəddə qeyd edilir ki, ölkənin 51 tarix-diyarşünaslıq muzeyinin binalarında illərdən bəri əsaslı təmir aparılmayıb. Bu səbəbdən muzeylərin fəaliyyəti müasir tələblərə cavab vermir (Ağcabədi, Daşkəsən, Qazax, Lerik, Mingəçevir, Neftçala, Sabirabad, Salyan, Şəki).

Mingəçevir, Şirvan tarix-diyarşünaslıq muzeyləri çoxmərtəbəli yaşayış binalarının birinci mərtəbəsində yerləşir, mühəndis kommunikasiya sistemlərinin sıradan çıxması muzey sərvətlərinə təhlükə yaradır.

Gəncə və Lənkəran tarix-diyarşünaslıq muzeylərinin yerləşdikləri binalar dövlət tərəfindən qorunan tarixi-memarlıq abidələridir, amma onların bərpası üçün konkret tədbirlər görülmür.

Quba tarix muzeyinin binası qəza vəziyyətinə düşdüyündən nazirliyin müvafiq əmrinə əsasən bağlanıb. Gəncədə Nizami Gəncəvi xatirə muzeyinin binası uçub, eksponatlar isə mədəniyyət evində və məscid binasında yerləşdirilib", - deyə hesabatda bildirilir.

X.SƏFƏROĞLU

Ayna.- 2011.- 5 fevral.- S.20.