Esmiralda Tağızadə:

"İstedadsız uşaq olmur"

Hər insan rəsm çəkə bilər

Esmiralda Tağızadənin rəsm əsərləri ilə qeyri-hökumət təşkilatı "Damla"nın keçirdiyi fərdi sərgisində tanış olmuşdum. Bu işlərin cazibəsi güclü idi. Hər mövzunu, hər istiqamətdə və hər materialda işləyə bildiyi hiss olunurdu. Onun pozanla çəkdiyi rəsmlər, kollaj və qrafikası xoş təsir bağışlayırdı. Onun özünün yaratdığı "Esmiralda" studiyasında isə diqqətimi ən çox çəkən Esmiralda xanımın Həcc ziyarətində olarkən çəkdiyi Məkkə motivi idi.

Bundan əvvəl Rəssamlar İttifaqının katibi Ağali İbrahimov bu rəssam-dizayner xanımın yaradıcılığı barədə müsbət fikirlər söyləmişdi:

"Esmiralda" studiyası ilə neçə illər sürən əməkdaşlığımız, birgə əməyimizin nəticəsi olan sərgilər olub. Hər yeniyetmənin, hər gəncin təxəyyülü ayrıca bir dünyadır. "Esmiralda" studiyası da, belə deyərdim, bu kiçik dünyaların aşkara çıxarılmasında yorulmadan çalışır, bizlər - orta və yaşlı nəsil isə onların kiçik dünyalarından özümüzçün nə isə bir yenilik götürürük".

Esmiralda Tağızadə yaratdığı studiya haqqında danışır:

- Bu təsviri incəsənət studiyası 2000-ci ilin sentyabrında yaradılıb. Məqsədimiz mümkün qədər çox sayda uşaq və yeniyetməni yaradıcılıq dünyasına cəlb etməkdir. Belə bir səhv fikir mövcuddur ki, uşaq istedada malik deyilsə, yaradıcılıqla məşğul olmağına deyməz. Fikrimcə, istedadsız uşaq olmur və rəsm çəkməyi hər bir insana öyrətmək mümkündür. Bunun üçün müəyyən fəndlər və çətin olmayan tapşırıqlar mövcuddur. Hər uşağın fərdi xüsusiyyətlərini, qavrama qabiliyyətini görmək və ona ətraf dünyanı özü üçün kəşf etməkdə yardımçı olmaq lazımdır. Səriştəsiz bir uşağın tədricən kamil bir insana çevrilməsini müşahidə etmək xoşdur.

Bu studiyanın yetirmələrinin isə uğurları az deyil. Öyrənirik ki, 2008-ci ildə Heydər Əliyev Fondunun keçirdiyi müsabiqəyə əsər seçimində studiyanın iki şagirdi - 8 yaşlı Nərgiz Şirəliyeva və 7 yaşlı Əyyub Mirzəyevin əsərləri müsabiqədən keçmiş 70 işlə bərabər Fransaya göndərilmişdir.

Şagirdlərin arasındayıq. Çox böyük maraqla işləyirlər, sanki işlərini başa vurub studiyadan evə yollanmaq fikrində deyillər. Həvəslə, maraqla işləyirlər. Esmiralda Tağıyeva deyir:

- Studiyanın kandarından içəri keçən hər uşaq mənim öz uşağım olur (gülür). Uşaqlar məni gözəl anlayırlar. Çox zaman valideynlər uşaqlarını bu studiyaya gətirəndə sadəcə övladlarının vaxtını maraqlı keçirməsini istədiklərini deyirlər. Amma uşaq az sonra rəsm çəkməyə o qədər aludə olur ki, bir çoxu sonra rəssamlıq peşəsinə üz tutur. Ən kiçik şagirdimizin 3, ən böyüyün isə 34 yaşı var. Bizim şagirdlərdən Qənirə Tatlıyeva həkim olmaq fikrindədir. Ona deyirəm ki, plastik cərrahiyyəni seçsə burda öyrəndikləri onun üçün faydalı olacaq. Bir dəfə sərgi qabağı Qənirənin əsərini Muzey Mərkəzinin girişinə böyüdülmüş şəkildə vurmuşdular. Bu, sərginin elanı idi. Və Qənirənin anası təsadüfən Muzey Mərkəzinin önündən keçəndə şəkli görüb çox həyəcanla mənə zəng vurdu. Qızının bu uğuru onu sevindirmişdi.

Esmiralda Tağızadəni Azərbaycanda ilk rəssam-dizayner xanım kimi tanıyırlar. Artıq 40 ilə yaxındır bu sənətdə çalışır. Daim yenilik axtarışında olduğunu bildirir. Onu da qeyd edir ki, ilk dəfə rəngli kağızda o işləyib.

Sevinc İsmayıl

Ayna.- 2011.- 12 fevral.- S.19.