İran xəttatlıq sərgisi

Sərgi üç gün davam etdi

Vəcihə Səmədova adına Sərgi Salonunda İran xəttatlıq-illüminasiya miniatür sərgisi açılıb. Sərginin açılışında Rəssamlar İttifaqının sədri Fərhad Xəlilov və İranın Azərbaycan səfiri Məmmədbağır Bəhrami də iştirak ediblər. Fərhad Xəlilov iki ölkə arasında mədəni əlaqələrin, o cümlədən rəssamlar arasında əlaqələrin inkişafını sevindirici hal kimi qiymətləndirib. Səfir isə iki xalqın çox böyük müştərək tarix və mədəniyyətinin olduğunu, xəttatlığın bu mədəniyyətin bir qolu olduğunu vurğulayıb.

Xəttatlıq (kalliqrafiya) ərəb əlifbası qrafikasının xüsusiyyətləri əsasında bədii yazı sənətidir. İslamda canlıları təsvir etmək yasaq olduğundan rəssamlığın bu növü İslam ölkələrində, o cümlədən orta yüzillərdə Osmanlıda, Azərbaycanda və İranda daha çox inkişaf etmiş bir sahəyə çevrilmişdi. Kitabların cildlərini, binaların və məscidlərin interyerini və bayır divarlarını, saxsı, metal, parça məmulatlarını ən müxtəlif xətt növləri ilə süsləmək xəttatların işi idi.

Bu sənətə bizim günlərdə Azərbaycanda maraq azalsa da, İran və Türkiyədə böyük maraq indi də qəlır. Xüsusilə də ərəb qrafikasından istifadə edilən İranda buna böyük önəm verilir. Xəttatlıq dekorativ-ornamental rəssamlıqla qovuşan bədii yazı mədəniyyəti olaraq İranda populyarlığını indi də qoruyub saxlayır.

İran xəttatlarının Bakı sərgisində 120 sənət əsəri təqdim edildi. Sərgi 3 gün davam edib.

Ayna.- 2011.- 12 fevral.- S.19.