Mixail Lobuxin "Yeddi gözəl" baletində

Məşhur aktyor tamaşada Bəhram şahı oynayır

Fevralın 10-da Azərbaycan Dövlət Akademik Opera və Balet Teatrında Qara Qarayevin "Yeddi gözəl" baletinin tamaşası təqdim olundu. Tamaşada Bəhram şah rolunu Böyük Teatrın aparıcı solisti - balet artistləri beynəlxalq müsabiqələrinin laureatı, Sankt-Peterburqun "Qızıl sofit" ali teatr mükafatının qalibi Mixail Lobuxin ifa etdi.

Rus baletinin tanınmış ulduzlarından olan M.Lobuxinin Azərbaycan Dövlət Akademik Opera və Balet Teatrının rəhbərliyi tərəfindən "Yeddi gözəl" baletinin tamaşasında rol ifası üçün dəvət olunması, bütünlükdə tamaşanın və əsas partiyalardan biri olan Bəhram şah rolunun bədii professional səviyyəsini daha da yüksəltmək zərurətindən irəli gəlirdi. Qeyd etmək lazımdır ki, tamaşaların bədii-yaradıcı səviyyəsini gücləndirmək üçün bu təcrübədən dünyanın bir çox aparıcı teatrları istifadə edirlər.

Xatırladaq ki, Mixail Lobuxin ötən il Azərbaycan Dövlət Akademik Opera və Balet Teatrının səhnəsində L.Minkusun "Don Kixot" baletinin tamaşasında çıxış etmiş və öz yüksək professional çıxışı ilə tamaşaçıların yaddaşına parlaq və unudulmaz iz buraxmışdı. Lobuxin yüksək artistizmə, balet texnikasına malikdir.

Mixail Lobuxin Bəhram şah rolunu həm də fevralın 21-də balet truppamızın Böyük Teatrın səhnəsindəki çıxışı zamanı da ifa edəcək. Tanınmış rusiyalı xoreoqraf, Q.Qarayevin "Yeddi gözəl" baletinin quruluşçu baletmeysteri Vasili Medvedev bu haqda fikirlərini bölüşərək deyir:

"Azərbaycan Dövlət Akademik Opera və Balet Teatrı rəhbərliyinin Mixail Lobuxinin "Yeddi gözəl" baletində iştirak etmək üçün dəvət olunması ilə bağlı qərarını bəyənir və alqışlayıram. Çünki o, dünya səviyyəsində parlaq bir balet ulduzudur və Lobuxinin iştirakı tamaşanın peşəkar səviyyəsini daha da zənginləşdirəcəkdir.

Tamaşada gözəllər gözəli rolunu ifa edəcək Kamilla Hüseynova (xalq artisti) ilə Mixail Lobuxin cütlüyünün birgə çıxışı çox maraqlı və gözəl alınacaqdır. Məlumdur ki, parlaq və istedadlı şəxsiyyətlərin iştirakı tamaşanın uğurunu təmin edən əsas cəhətlərdəndir və mən Kamilla Hüseynova və Mixail Lobuxini bu sıraya aid edirəm".

Zəminə

Ayna.- 2011.- 12 fevral.- S.20.