İsrafilov Tbilisiyə və Milana yollanır

Gündəmdə gürcülər və italyanlarla əməkdaşlıq məsələsi var

Akademik Milli Dram Teatrı beynəlxalq əlaqələrini, dünya teatrları ilə əməkdaşlığını gücləndirmək fikrindədir. Teatrın mətbuat xidmətindən verilən xəbərə görə, direktor İsrafil İsrafilov K.Marcanişvili adına Dövlət Akademik Dram Teatrının baş müdiri Yekaterina Mazmişvilinin dəvəti ilə Tbilisiyə gedəcək, əməkdaşlıqla bağlı məsələlər müzakirə olunacaq. Yaxın zamanlarda K.Marcanişvili adına Dövlət Akademik Dram Teatrının bədii rəhbəri Levan Çuladzenin Akademik Milli Dram Teatrında tamaşa hazırlaması planlaşdırılır. Görüşdə bu məsələnin detalları ilə bağlı müzakirələr aparılacaq.

Tbilisidən qayıtdıqdan sonra İsrafil İsrafilovun Milana işgüzar səfəri planlaşdırılır. Sözügedən səfər 20-28 fevral tarixlərində reallaşacaq. Akademik Milli Dram Teatrının direktoru Milana "Pikkolo" teatrının rəhbəri Luka Ronkoni ilə görüşmək və əməkdaşlıqla bağlı bəzi məsələləri müzakirə etmək məqsədi ilə yollanır. 2012-ci ildə Luka Ronkoninin Akademik Milli Dram Teatrının səhnəsində Covanni Verqanın "Dişi canavar" əsəri əsasında tamaşa hazırlanması planlaşdırılır. Bu barədə danışıqlar və onun yeni tamaşaları ilə tanışlıq İ.İsrafilovun Milan səfərinin əsas məqsədidir.

Şəms

Ayna.- 2011.- 19 fevral.- S.20.