Firəngiz Əlizadə Motsart müsabiqəsində münsif idi

Bəstəkarın əsərini isə müsabiqə iştirakçısı səsləndirib

Bəstəkarlar İttifaqının sədri, xalq artisti, professor Firəngiz Əlizadənin bu günlərdə Avstriyanın Zalsburq şəhərində təşkil olunan X Beynəlxalq Motsart müsabiqəsində beynəlxalq münsiflər heyətinin üzvü kimi iştirak etmişdir.

Qurumun mətbuat xidmətindən AYNAya bildirildiyi kimi, dahi avstriyalı Volfqanq Amadeus Motsartın 255 illiyinə həsr edilən Zalsburqun "Mozarteum" konsert salonunda təşkil olunan müsabiqədə dünya ölkələrindən 32 yaşadək olan gənc musiqiçilər 4 kateqoriyada - violonçel, skripka, piano və bəstəkarlıq kateqoriyalarında məharətlərini göstəriblər. Mötəbər musiqi yarışmasında Firəngiz Əlizadə həm gənc pianoçuların, həm də bəstəkarların istedad və bacarıqlarını qiymətləndirən beynəlxalq münsiflər heyətində təmsil olunub.

"Mozarteum" Universitetinin rektoru Reynhart fon Qutzaytın rəhbərlik etdiyi münsiflər heyətində Pavel Qililov, Pol Qulda, Robert Levin, Jan Bernard Pomiye, Mariya Tipo, Fu Sonq kimi sayılıb-seçilən dünya musiqiçiləri yer alıblar. Berlin İncəsənət Akademiyasının təmsilçisi kimi müsabiqəyə qatılan Firəngiz xanım müsabiqə iştirakçılarının sənət göstəricilərini həm bəstəkar kimi, həm də müasir musiqi ifaçılığı üzrə ekspert kimi qiymətləndirib.

Pianoçuların müsabiqəsində 23 yaşlı italiyalı Federiko Kolli 1-ci yerə layiq görülərək, "Qran-pri" diplomu ilə təltif olunub. Koreyalı Çi He Çun 2-ci yerə, çinli Ksi Şi Vu isə 3-cü yerə layiq görülüb. Yubiley müsabiqəsinin təşkilat komitəsi qaliblər üçün dünya turnesi təşkil edəcək. Bəstəkarların müsabiqəsində isə Vyana təmsilçisi, 23 yaşlı Poul Qoldmayer 3 turdan ibarət yarışmanı uğurla başa vuraraq "Qran pri"yə layiq görülüb. Poul Qoldmayer gələnilki müsabiqə üçün yeni əsər bəstələmək sifarişini alıb.

Beynəlxalq müsabiqədə müşahidə olunan sevindirici məqamlardan biri də müasir musiqinin görkəmli təmsilçisi kimi Arnold Şonberq, Anton Vebern, İqor Stravinski, Sergey Prokofyevlə yanaşı, Firəngiz xanımın da əsəri skripkaçıların yarışmasında proqrama salınması ilə bağlıdır. Bu kateqoriyada yarışanlar ikinci turda Firəngiz Əlizadənin "Dastan" əsərini ifa ediblər.

Zəminə

Ayna.- 2011.- 26 fevral.- S.20.