İki Azərbaycan rəssamının İsveçdə sərgisi açılır

Müseyib Əmirov və Eldar Babazadə yeni əsərlərini təqdim edirlər

İyunun 5-dən iyulun 10-dək İsveçin Uttersberq şəhər "Astli qalereyası"nda Azərbaycan rəssamlarının sərgisi keçirilir. Sərgi Azərbaycanın İsveç səfirliyinin təşəbbüsü ilə təşkil olunub. Sərgidə rəssamlarımızdan Müseyib Əmirov və Eldar Babazadə iştirak edirlər.

Müseyib Əmirov "Turan"a bildirib ki, bu sərgi üçün iştirakçılar hərəsi 10-dan çox əsərini İsveçə aparır. "Mən bu rəsmləri xüsusi olaraq o sərgi üçün çəkmişəm, odur ki, onlar tamamilə yenidir", - deyə Əmirov qeyd edir.

Eldar Babazadə isə rəsm əsərləri ilə yanaşı, metal üzərində işlərini də isveçlilərə təqdim edir.

"Astli qalereyası" 1968-ci ilin payızında Kepinq şəhərində təsis edilib. 1977-ci ilin mayında məşhur İsveç kolleksioneri və qalereyaçısı Astli Nyülen (Astley Nyülen) qalereyanı alıb və Uttusberq adlı yerdə dəmiryol stansiyasının boş qalmış köhnə binasına köçürülüb. Qalereyaya təkcə incəsənətlə maraqlanan isveçlilər deyil, xarici turistlər də baş çəkirlər.

Sovet heykəltəraşı - dissident Ernst Neizvestnı qalereyada öz sərgisini açdıqdan sonra bura daha da məşhurlaşıb. O, demək olar, hər yay Astli Nyülenin ona verdiyi atelyeyə gəlirdi. Heykəllər parkında E.Neizvestnı ilə yanaşı, Pyer Olofsson, Lras Enqlund, Takahaşi Naraha və bir çox digər heykəltəraşların əsərləri təqdim olunub. Astli Nyülen İsveçdə mədəniyyət sahəsində ən maraqlı insanlardan biri olub.

İsmayıl

Ayna.- 2011.- 4 iyun.- S.20.