"Təbəssüm" "Günəşli şabalıd" festivalında

Ukraynada "Günəşli şabalıd" II Beynəlxalq Xeyriyyə Festivalına Azərbaycan rəqsi də qatılıb. Musiqili Komediya Teatrından verilən xəbərə görə, "Paytaxt günləri" çərçivəsində "Vitaminlər" rəqs qrupunun təşkilatçılığı ilə keçirilən festivalda ölkəmizi teatrda fəaliyyət göstərən "Təbəssüm" rəqs qrupu təmsil edib. Beş xarici ölkənin qatıldığı festivalın açılışı İvan Franko adına Dram Teatrında olub.

Azərbaycan milli rəqslərini ifa edən istedadlı rəqqaslar bu mötəbər festivalda etimadı doğruldaraq Ukrayna Mədəniyyət Nazirliyi, Kiyev şəhər meri və "Xoreoqrafiya birliyi"nin xüsusi diplomlarına layiq görülüb. Xatırladaq ki, bu layihə Ukrayna Mədəniyyət Nazirliyinin dəstəyi ilə şəhər merinin rəsmi tədbirləri silsiləsinə, eyni zamanda Kiyev günləri proqramına daxildir.

Ayna.-2011.- 4 iyun.- S.20.