Son tamaşa Elçin Həmidovun xatirəsinə oynanılacaq

İyunun 29-da Azərbaycanın tanınmış aktyoru, əməkdar artist Elçin Həmidovun 53 yaşı tamam olur. Həmin gün aktyorun xatirəsinə Azərbaycan Dövlət Musiqili Komediya Teatrında "Hərənin öz ulduzu" tamaşası nümayiş olunacaq.

Teatrın mətbuat xidmətindən verilən məlumatda bildirilib ki, mərhum aktyor bu tamaşada uzun illər Nəzir obrazını ifa edib. Teatr kollektivi aktyorun xatirəsinə hörmət əlaməti olaraq, mövsümü Elçin Həmidovun sevimli tamaşası ilə yekunlaşdıracaq. Tamaşa Azərbaycan Dəniz Gəmçiliyi İdarəsinin Mədəniyyət Evində təqdim olunacaq.

Elçin Həmidov "Boşanaq, evlənərik" tamaşasında İkram, "Qarğa məndə qoz var"da Zərzibonskaya, "Qızıl gül"də Azay, "Beş manatlıq gəlin"də Nadir, "Özümüz bilərik"də Miriş, "Subaylarınızdan görəsiniz"də Mayıl, "Hərənin öz ulduzu"nda Nəzir, "Nəğməli Könül"də Mustafa, "Səhnədə məhəbbət"də ofisiant, "O olmasın, bu olsun"da Rza bəy, "Talelər qovuşanda"da Potuş rollarını ifa edib.

Teatrın bu mövsümdə ən uğurlu işləri sırasına daxil olan Qoqolun "Evlənmə" tamaşasındakı Yaiçnitsa obrazı Həmidovun səhnədə son rolu olub. Aktyor bu il martın 5-də vəfat etdi.

Ayna.- 2011.- 11 iyun.- S.20.