"Miras" beynəlxalq kinofestivala çıxarılır

 

Film 15 nominasiyanın hamısına iddia edir

 

Rejissor Fariz Əhmədovun "Miras" sənədli filmi martın 12-19-da Moskvada XVIII Beynəlxalq "Svyataya Anna" kinofestivalının əsas müsabiqə bölməsində iştirak edəcək. Fariz Əhmədovun bildirdiyinə görə, Rusiya Kinematoqrafçılar İttifaqında təşkil edilən kinofestivalda 15 nominasiya üzrə 300-dən artıq bədii, sənədli və animasiya filmi əsas mükafatlara iddiaçıdır. Festival filmlərini 10 nəfərlik münsiflər heyəti qiymətləndirəcək.

"Miras" sənədli filmi ötən ilin oktyabrında Moskvada 30-cu Ümumrusiya Dövlət Kinematoqrafiya İnstitutu Beynəlxalq kino festivalında "Kinematoqrafiya sənətinə sədaqətə görə" diplomuna, Milli Maarif Kanalı tərəfindən isə rejissor işinə görə "Maarif" diplomuna, o cümlədən növbəti filmə görə qrand-pul mükafatına, dekabrda isə Polşada Beynəlxalq Zubroffka kino festivalında iştirak edib və festivalın II mükafatına layiq görülüb.

Fariz Əhmədov Azərbaycan Mədəniyyət və Turizm Nazirliyinin dəstəyi ilə Rusiya Dövlət Kinematoqrafiya Universitetində kinorejissorluq ixtisası üzrə, SSRİ dövlət mükafatı laureatı A.A.Proşkinin emalatxanasında təhsil alır. Filmin ssenari müəllifi Esmira Eyyub, quruluşçu operatoru Fərid Bağırov, montajçısı Firudin İsmayılov, səs rejissoru Elşən Aslanzadə, prodüserləri isə Rəşad Qasımov və Zakir Musayevdir. Film 2010-cu ildə "Bir addım" film studiyasında istehsal olunub və ilin sonunadək bir neçə nüfuzlu kinofestivala dəvət alıb.

 

 

Z.Rüstəm  

 

Ayna.- 2011.- 12 mart.- S.20.