Muskomediyada yeni tamaşa

Musiqili Komediya Teatrının rus bölməsində Mark Kamolletinin "Xoşbəxt ailə oyunu oynayırıq və ya fransızsayağı qarnir" tamaşası hazırlanacaq. Teatrın mətbuat xidmətindən verilən bilgiyə görə, əsəri əməkdar incəsənət xadimi Əsgər Əsgərov səhnəyə qoyur.

Əsgər Əsgərov Mədəniyyət və Turizm Nazirliyinin apardığı islahatlar çərçivəsində Musiqili Komediya Teatrında hazırlanan yeni tamaşanın quruluşçu rejissoru təyin olunub. Bir neçə gündür tamaşanın məşqlərinə başlayıb. Tamaşanın musiqi rəhbəri əməkdar incəsənət xadimi Nazim Hacıəlibəyov, quruluşçu rəssamı Nabat Səmədova, ikinci rejissoru əməkdar artist Boris Qrafkindir. Teatrın rus truppasında təqdim olunan tamaşada aparıcı aktyorlar Nərgiz Kərimova, Nadejda Povelisina, Fərid Əliyev, Rauf Babayev, Emil Heydərov, Əliməmməd Novruzov, Svetlana Bulax, İzabella Sves, Marina Litvinenko, Yuliya Heydərova, Firuz Məmmədov, Rauf Babayev və başqaları çıxış edirlər.

Əsgər Əsgərov uzun illər Naxçıvan Dövlət Musiqili Dram Teatrında çalışıb, 1990-1996-cı illərdə teatrın baş rejissoru olub. Moskvada Mayakovski adına Akademik Dram Teatrının baş rejissoru A.Qonçarovun yanında təcrübə keçdikdən sonra Azərbaycan Dövlət Akademik Milli Dram Teatrında quruluşçu rejissor vəzifəsinə dəvət edilib. Bu teatrda Viktor Rozovun "Şadlıq sorağında", Nəbi Xəzrinin "Burla Xatun", Kamal Abdullanın "Hərdən mənə mələk də deyirlər...", Jan Batist Molyerin "Skapenin kələkləri", A.Kamyunun "Anlaşılmazlıq" əsərlərinə quruluş verib.

Ayna.- 2011.- 12 mart.- S.20.