Ramil Qasımov: "Hər səhər yuxudan Koroğlu kimi oyanıram"

Və özünü Bakıda deyil, Çənlibeldə hiss edir

Martın 27-də Akademik Opera və Balet Teatrında Üzeyir Hacıbəylinin "Koroğlu" operası nümayiş olunacaq. Həmin gün Koroğlu obrazında beynəlxalq müsabiqələr laureatı, Musiqili Komediya Teatrının solisti Ramil Qasımov çıxış edəcək. 26 yaşında opera səhnəsində Koroğlu obrazını yaratmaq heç bir ifaçıya nəsib olmayıb. O isə Koroğlu obrazında çıxış edən ən gənc ifaçı olacaq. R.Qasımov "Koroğlu" operasında bu ilk çıxışı ilə bağlı deyir:

- Bəli, 26 yaşında Koroğlunu ifa edən ilk ifaçı mən olacağam. Musiqili Komediya Teatrının səhnəsində tamaşaya qoyulan "Məşədi İbad" operettasında Sərvər rolunun da ən gənc ifaçısı olmuşam. O vaxt on beş yaşım var idi və yadımdadır ki, müəllimim Mobil Əhmədov məni dirijor Nazim Əliverdibəyovun yanına gətirəndə çox təəccüblənmişdi. Dedi ki, axı bu, uşaqdır. Əlbəttə, rol üçün çox gənc olsam da, səs imkanlarım bu obrazın öhdəsindən gələ bildi. "Koroğlu" operasına gəlincə, bu təklif Opera və Balet Teatrının rəhbərliyindən gəldi və bu rol mənim üçün son dərəcə önəmlidir. Çünki bu əsər Azərbaycan musiqisinin şah əsərlərindən biri, deyərdim birincisidir. Dahi Üzeyir bəyin böyüklüyü ondadır ki, 1937-ci ildə bu operanı yazanda milliyyətçiliyini, azərbaycançılığını göstərmək üçün operada məhz milli folklor sənətini, aşıq yaradıcılığını tətbiq edib. Bir də, bu əsərdə Koroğlunun qəhrəmanlığı, onun qələbəsi eyni zamanda xalqın əzmidir, qüdrətidir. Odur ki, bütün o qəhrəmanlığı ifa vasitəsilə çatdırmaq üçün, sözsüz ki, məktəb olmalıdır. Mən də həmişə fəxr edirəm ki, Bülbül məktəbindən bəhrələnmişəm.

Əlbəttə, bütün bunlar müəllimim Mobil Əhmədovun sayəsində olub. O, beş il Azərbaycan professional vokal məktəbinin banisi dahi Bülbülün tələbəsi olub...

- Bildiyimizcə, bu tamaşanı Bülbülə həsr etmək qərarına gəlmişsiniz?

- Bəli, mənim ifa edəcəyim "Koroğlu" operası dahi Bülbülə həsr olunur. Bu tamaşanı ona görə Bülbülə ithaf edirəm ki, onun ruhu şad olsun, görsün ki, bu sənət, bu məktəb, bu nəsil yaşayır, davam edir. Qeyd edim ki, mən Avropa əsərlərinin burada təbliğinin çox əleyhinəyəm. Niyə? Zənnimcə, biz daha çox milli operalarımızı dünyada təbliğ eləməliyik. Necə ki, Bakı Musiqi Akademiyasında Puççininin, Verdinin klavirləri var, həmçinin milli operalarımızın notları dünyanın musiqi ocaqlarında olmalıdır. Biz alnıaçıq, üzüağ hər yerdə - istər Böyük Teatrda, istər La-Skala Teatrında, istərsə də dünyanın müxtəlif musiqi məkanlarında "Leyli və Məcnun", "Koroğlu, "Şahsənəm", "Sevil", "Nizami", "Vaqif", "Natəvan" və digər operalarımızı nümayiş etdirə bilərik. Çünki bu əsərlərimizdə Azərbaycanın milli koloriti təcəssüm olunur.

- "Koroğlu" operası artıq 70 ildən artıqdır ki, repertuardadır. Məlumdur ki, bu vaxta kimi başda Bülbül olmaqla, böyük sənətkarlarımız bu operada yaddaqalan Koroğlular oynayıblar. Bu böyük məsuliyyətli işin öhdəsindən gəlmək çətin olmaz ki?

- "Koroğlu" obrazını uğurla yaradan sənətkarlardan biri, SSRİ xalq artisti Lütfiyar İmanovla yaş fərqimiz çox olsa da, yaxın münasibətlərimiz var idi. O, səs imkanlarıma yaxından bələd idi və hər görüşümüzdə qeyd edirdi ki, səndən gözəl Koroğlu olar. Sadəcə, o vaxt səsim buna imkan versə də, yaşım az idi. Obraz yaradılanda faktura da böyük əhəmiyyət kəsb edir. Artıq səsimlə yanaşı fakturam da buna imkan verir ki, bu obrazı yaradım. Deməli, qismət martın 27-nə imiş...

- Hazırlıq necə gedir? Koroğlunun mübariz əhval-ruhiyyəsini artıq özündə hiss edirsənmi?

- Hər səhər yuxudan Koroğlu kimi durur, gecə də Koroğlu kimi yatıram. Belə desəm, özümü Bakıda yox, Çənlibeldə hiss edirəm. Əhatəmdə də 7777 dəlim var. O dəlilərdən də biri elə mən özüməm. Yadımdadır ki, Mobil müəllim məni Tofiq Quliyev və Süleyman Ələsgərovun yanına aparanda Lütfiyar İmanov da onlarla idi. O dedi ki, Koroğlunu oxumaq üçün gərək sən onun 7777 dəlisindən biri olasan. Roluna o dərəcədə vurğun olmalısan ki, sən artıq səhnədə tamaşa getdiyi anda yox, elə məşqdə də özünü Koroğlu kimi hiss eləməlisən. Bu baxımdan, mən də hazırda Bakıdan çox "uzaqdayam". Hazırlıq prosesinə gəlincə, rejissor Hafiz Quliyevlə, dirijor Nazim Hacıəlibəyovla gərgin məşqlərimiz davam edir. Mən martın 27-də elə illərdir gördüyümüz Koroğlu geyimində səhnəyə çıxacağam. Bu obraz üçün yeni geyim hazırlatdırmadım, bu, mənim üçün çox önəmlidir.

- Gənc yaşda Koroğlu oynayan Ramil Qasımov daha hansı obrazda çıxış etmək arzusundadır?

- Sözsüz ki, arzularım çoxdur. Arzusu olmayan insanın yaşamağa stimulu olmur. Məsələn, istərdim ki, səsimlə opera lentə yazılsın. Bilirsiniz, düşünüb ifa eləmək lazımdır. Mən vokalçı ifadəsini heç qəbul etmirəm. Çünki ifaçı olmaq lazımdır. İfaçı da müxtəlif rənglər kimi olmalıdır. Onda daha maraqlı alınar. Rəşid Behbudovun böyüklüyü onda idi ki, hər şey oxuyurdu. Bu baxımdan, qeyd edim ki, mən "Biz Bakıdanıq" adlı estrada-simfonik orkestri, eyni zamanda "R&D", yəni "Ramil və onun dostları" adlı yeni şirkət açmışam. Azərbaycanın ən istedadlı və ziyalı gənclərini bir yerə cəm etməklə Vətənimizin onun hüdudlarından kənarda layiqli tanıdılmasına çalışacağıq. Məlumat üçün qeyd edim ki, artıq apreldə "Biz Bakıdanıq" estrada-simfonik orkestri ilə birgə Gəncədə "Səni tərənnüm edirəm, Azərbaycan!" adı altında konsert proqramı ilə çıxış edəcəyik. Gəncədən sonra bu proqramla Gürcüstanda da çıxış etmək niyyətimiz var. Bir də məqsədim budur ki, gələcəkdə "Koroğlu" operası Böyük Teatrda, La-Skalada mənim ifamda təqdim olunsun.

Z.Rüstəm

Ayna.- 2011.- 19 mart.- S.20.