Lyublin Rəqs Teatrı Bakıda çıxış etdi

Bu teatr öz mənşəyini müstəqil tələbə hərəkatından götürür

Lyublin Rəqs Teatrı öz məşhur "nano" tamaşalarını paytaxt sənətsevərlərinə nümayiş etdiriblər. Polyak rəqqaslar Azərbaycan Milli Dram Teatrının səhnəsində öz məharətlərini göstərdilər və alqışlar qazandılar. Giriş pulsuz idi. Lyublin Rəqs Teatrının ifasında "Nano" adlı tamaşanın təqdimatı Polşa Respublikasının Bakı səfirliyinin yardımı ilə mümkünləşib.

Sponsorlar: Polşa səfirliyi, bizim Mədəniyyət və Turizm Nazirliyi, Azərbaycan Dövlət Akademik Milli Dram Teatrı, Adam Mitskeviç İnstitutu və Lyublin Şəhər İcra Hakimiyyəti idi.

Verilən bilgiyə görə, Lyublin Rəqs Teatrı 2001-ci ildə yaradılmışdır. Müstəqil tələbə hərəkatından öz mənbəyini götürən bu qrup illər keçdikcə öz təkrarolunmaz, sonralar isə həm Polşada, həm xaricdə asanlıqla tanınan rəqs üslubunu yaradaraq, Polşada aparıcı müasir rəqs truppalarından birinə çevrilir. Öz artistik missiyasını ardıcıl olaraq həyata keçirən qrupun liderləri Lyublin Mədəniyyət Mərkəzində yerləşən yeni, peşəkar rəqs teatrının əsasını qoymuşlar.

Truppa dəfələrlə Polşada, Bıtom, Krakov, Kaliş, Varşava, Poznan, Lodz, Qdansk, Torun kimi şəhərlərdə və xaricdə, o cümlədən ABŞ, İsveçrə, Fransa, Macarıstan, Finlandiya, İspaniya, Litva, Rusiya, Almaniya, Avstriya, Tunis, Hollandiya, Belarus və Ukraynada beynəlxalq festivalların iştirakçısı olmuşdur.

"Nano" tamaşası haqqında onu söyləmək olur ki, "dünyada insanların 2 tipi var: insanların 2 tipinin mövcud olduğunu düşünənlər və bunu düşünməyənlər.

İnsanın kişi və qadın qismində mövcud olmasının, ümumiyyətlə, mənası varmı, əgər vardırsa, o nədən ibarətdir? Bəlkə "o-qadın" və "o-kişi" birlik, "Nano"ya oxşar bir şey təşkil edirlər?

"Nano" adi gözlə görünə bilməyən bir şey deməkdir. Əhəmiyyətsiz, xırda bir şey deməkdir. Nəhəng səylər, yaşanan emosiyalar və Günəş altında öz yeri uğrunda mübarizə ilə yanaşı, insan həmçinin də öz məhdudluğu ilə qarşılaşır, "divarın qabağında durur" və öz zəifliyini dərk edərək, başını divarlara vurur...

İsmayıl

Ayna.- 2011.- 21 may.- S.19.