"İncəsənət tariximizin pillələri"

Bakıda bu adda sərgi açılıb

Muzey Mərkəzində Mədəniyyət və Turizm Nazirliyinin təşkilatçılığı ilə "İncəsənət tariximizin pillələri" adlı sərginin açılışı olub. APA-nın məlumatına görə, sərginin təşkilində məqsəd Azərbaycan xalqının 1940-1980-ci illərdə yaşadığı tarixi dövrün özəlliklərini göstərən, sənət tarixində özünəxas yer tutan nadir sənət incilərinin mərhələli surətdə nümayişidir. Mədəniyyət və Turizm Nazirliyi incəsənət şöbəsinin sektor müdiri Qalib Hüseynov sərgidə çıxışında bildirib ki, eyniadlı sərgi nazirlik tərəfindən 2010-cu ildə də keçirilib: "Həmin sərgidə Azərbaycan Milli İncəsənət Muzeyinin fondundan seçilən, 20-ci əsrin əvvəllərindən 1940-cı ilədək yaradılan əsərlər nümayiş olunub". Rəssamlar İttifaqının katibi Ağəli İbrahimov qeyd edib ki, ekspozisiyada nümayiş etdirilən əsərlər Azərbaycan Milli İncəsənət Muzeyi və Azərbaycan Dövlət Rəsm Qalereyasının fondlarından seçilib. Sərgilənən əsərlər sırasında Mikayıl Abdullayev, Böyükağa Mirzəzadə, Tahir Salahov, Toğrul Nərimanbəyov, Nadir Əbrürrəhmanov, Xalidə Səfərova və digər rəssamların əsərləri var. Sərgi noyabrın 28-dək davam edəcək.

Ayna.- 2011.- 26 noyabr.- S.20.