"Yaradıcılıq illərim filmlərin kasad vaxtına təsadüf etdi"

Nicat Kazımov istedadının görünməyən tərəfindən danışdı

Gənc Tamaşaçılar Teatrında 21 ildir çalışan aktyor Nicat Kazımovu son illər rejissor kimi də təqdim edirik. Sənətçi rejissorluğa başlamasını təsadüfi sayır. Söhbətinə yaradıcılıq yolunun ilk pilləsindən başlayan aktyor deyir:

- Hər şey təsadüfün nəticəsidir. Hələ 1989-1990-cı illərdə xalq artisti Lütfi Məmmədbəylinin xalq teatrında dərnəyinə gedirdim. Hər zaman deyirdi ki, mən Gənc Tamaşaçılar Teatrının aktyoruyam. Əvvəllər bu söz pisimə gəlir, onun sözündən alınırdım. Sonralar həmin teatrda "Ərizə" tamaşasına baxdım və çox xoşuma gəldi. Elə o zamandan məni oraya dəvət etdilər. "Romeo və Cülyetta" tamaşasında baş rola dəvət aldım. 17-18 yaşında gənc olaraq bu rolda oynamağı çox istəyirdim. Ancaq müəyyən səbəblərdən o tamaşa alınmadı, buna baxmayaraq, həmin teatrda qalası oldum. Tamaşaların məşqində olurdum, ancaq tamaşalarda oynamırdım. Teatrın əvvəlki direktoru Kamal Əzizov məni yanına çağırdı ki, buradan maaş alırsan, ancaq tamaşalarda oynamırsan. Bunun cavabında isə "burada rejissor tanımıram", - dedim. Təbii ki, bu da gəncliyin şıltaqlığından irəli gəlirdi. Bəxtiyar Xanızadə, Vaqif Əsədov və teatrın direktoru oturub söhbət etdik. Səhəri gün isə Pantomima Teatrı açıldı. Sonra isə bir müddət orada çalışdım. 1996-cı ildə həmin teatrdan çıxdım. O zaman televiziyada aparıcı kimi çalışırdım. Daha sonra yaradıcılıq işlərimdə 4-5 ay fasilə oldu. Bir müddətdən sonra yenidən Gənc Tamaşaçılar Teatrına qayıtdım. Elə o zamandan da rejissor olaraq çalışıram.

- Aktyorluq fakültəsini bitirmişsiniz. Rejissor kimi çalışmaq həvəsi necə yarandı?

- Deyim ki, ikinci dəfə teatra qayıdanda direktor məni işə götürmək istəmirdi. Heç vaxt rejissor arzusunda olmamışam. Direktora təklif etdim ki, tamaşa hazırlayıb təhvil verəcəm, əgər xoşunuza gəlməsə, haqqımda istənilən qərarı verin. 1 həftə mənə vaxt verildi. O zaman "Tıq-tıq və tuk-tuk" tamaşasını hazırladım. Həmin gündən də məni işə götürdülər. Uzun zaman aktyor ştatında qaldım. 6-7 il olar ki, rejissor olaraq ştatdayam. Bununla yanaşı, həm də aktyor kimi işlərim var. Dünyanın ən məşhur rejissorları da peşələrinə məhz aktyorluqdan başlayıblar. Aktyorluğu bacarmayan, aktyorluğun bütün sirlərini bilməyəndən rejissor olmaz.

- Aktyor, rejissor, dublyaj - hamısı bir arada çətin deyil ki?

- Bütün bunlar rejissuranın qollarıdır. Aktyor, rejissor, dublyaj və eyni zamanda yazdığım pyeslər - "Ələddinin sehrli çırağı", "Tıq-tıq xanım" kimi səhnələşdirdiyim pyeslər teatr tamaşalarında oynanılır. Aktyor rəqs etməyi, oxumağı da bacarmalı, plastikadan anlayışı olmalıdır. Görünməyən tərəfim isə tikişi bacarmağımdır. Tamaşalara kostyum hazırlandığı zaman bütün aksessuarlara özüm diqqət yetirirəm.

- Son vaxtlar ekran həyatı görən filmlərdə aktyor oyununuza rast gəlinmir. Kino həyatına qatılmırsız?

- Filmlər azdır. Sonuncu çəkildiyim 3 il əvvəlki "Sirat körpüsü", "Daş atan" filmi olub. Yaradıcılıq illərim filmlərin kasad vaxtına təsadüf etdi. Daha çox teletamaşalara çəkildim. Ən çox sevdiyim işlər də məhz dövlət televiziyasında çəkilən tamaşalardır. "Mən sənin dayınam" buna misal göstərilə bilər.

- Rejissor olaraq film çəkmək istəyiniz olub?

- Belə təklif olub. Ancaq özümü hələ buna hazır saymıram. Kameranın qarşısında dayanmağı nə qədər gözəl bacarsam da, arxasında bir o qədər naşıyam. Əgər mən bir işi görürəmsə, o, mütləq təqdirəlayiq olmalıdır.

- Mətbuatda səs-küyə səbəb olan teatrın baş rejissoru Cənnət Səlimova ilə iş münasibətiniz necədir?

- Atam rəhmətə getdikdən sonra gözümdə hər şey dəyişdi. Anladım ki, bu dünyada heç nə dava-dalaşa dəymir. Ümumiyyətlə, hər zaman özümə deviz götürmüşəm ki, "Yaxşılıq etməyi bacarmıramsa, pislik etməyim". İndi Cənnət xanımla münasibətlərimiz normaldır, heç bir intriqadan söz gedə bilməz. Sadəcə, ola bilər ki, yaradıcılıqda bəzi nüansları bəyənməyək.

- Eşitmişik bir vaxtlar sizə teatrda tamaşalara quruluş vermək yasaq edilibmiş...

- Bəli. Münasibətlərimiz normallaşandan sonra mənə "Yatmış gözəl"i verdi. Hətta yeni teatr mövsümündə yeni tamaşa da verilir. Sadəcə, öyrənmişəm ki, öz istədiyim əsərlərə müraciət edim, Cənnət Səlimova isə öz istədiyi əsərlərə üstünlük verir. Bu məsələlərdə fikirlərimiz üst-üstə düşməyə bilər.

- Belə bir deyim var ki, Gənc Tamaşaçılar Teatrının aktyorları qocalmır. Siz necə düşünürsünüz?

- Əslində aktyor daxilən heç vaxt qocalmamalıdır. Qocalan aktyor artıq aktyor deyil. 80-90 yaşı olsa belə, daxilən uşaq qalmalıdır. İstər Milli Akademik Dram Teatrının aktyoru, istər Gənc Tamaşaçılar Teatrının aktyoru, istərsə də Kukla Teatrının aktyoru olsun.

- Eşitmişik övladlarınızın tamaşalarda oynamasına baxmayaraq, gələcəkdə onların aktyor olmağını istəmirsiniz. Səbəb?

- Cənnət xanımın xahişi ilə birinci dəfə böyük oğlum Mirsənan "Məkkəyə gedən yol" tamaşasında oynayıb. Övladlarımın hər ikisinin aktyorluğa böyük həvəsi var. Buna baxmayaraq, Azərbaycanda aktyor olmalarını istəmirəm. Keçdiyim çətin yolları istəmirəm ki, onlar da keçsin. Aktyor məvacibi ilə dolanmaq çox çətindir. Misal olaraq bu gün ailəmi saxlamaq üçün məcburən bir çox sahələrdə işləyirəm. Bizim aldığımız məvaciblə ailə saxlamaq mümkün deyil. Doğrudur, övladlarımın arxasında mən olacağam, baxmayaraq ki, mənim arxamda heç kim olmayıb.

- Bu yaşda səhnədə olması onları sənətə bağlamayacaq ki?

- Artıq yavaş-yavaş bu istəklərini söndürməyə, fikirlərini yayındırmağa çalışıram. Uşaqlarımın heç birinin aktyor olmasını istəmirəm. Əslində, atam da istəmirdi ki, mən bu sənətə üz tutum. Amma qismətimə aktyorluq yazıldı. Ona görə uşaqlar haqqında çox uzun danışmaq istəmirəm. Bəlkə eyni aqibət onları da gözlədi.

Xatun

Ayna.- 2011.- 17 sentyabr.- S.20.