"Mədəniyyətimizi rüsvay etməyə heç kimin haqqı yoxdur"

Brilyant Dadaşova savadsız müğənnilərə fonoqramla evdə oxumağı tövsiyə etdi

Öz yeni albomunun hazırlıqları ilə məşğul olan xalq artisti Brilyant Dadaşova sonuncu albomu üzərində iki il iş getdiyini söylədi. Bunun böyük və zəhmət tələb edən iş olduğunu deyir. Albomu hazırlayan türk musiqi şirkəti onu tanıtmaq məqsədilə verilişlərə dəvətini təşkil etməyə başlayıb. Albom çıxandan sonra saçlarının rəngini dəyişən müğənni imicində yeniliklərin böyük rol oynadığını söyləyir:

- Albomum çıxandan sonra mən saçlarımın rəngini dəyişmişdim. Əks təqdirdə gərək iki il öncə disk hazırlanarkən olan fotosessiyadakı saç düzümündə və rəngində qalaydım. Yəni iki il saçlarımın rəngini dəyişməzdim. Mən isə səhnədə olan insan kimi dəyişməyi sevirəm. Gözləyə bilməzdim ki, disklərim satışa çıxana qədər saçlarımın rəngini dəyişməyim. Ona görə də indi məcburən diskin tanıtımı məqsədilə yeni fotosessiya etməli oldum. Çünki disklər satıldıqca hər dəfə yeni tiraj buraxılır. Və yeni tirajlarda yeni fotosessiya olacaq. Amma mənim üçün bu əsas deyil.

- Sizi hər zaman yeni imicdə, yeni saç düzümündə görürük...

- Məsələ ondadır ki, bu diskdə mən əsas gücümü mahnılara vermişəm. Təbii ki, səhnədə olan müğənni kimi mənim necə göründüyüm əhəmiyyətlidir. Mən həmişə əhval-ruhiyyəmə, təbiətə, hətta mövsümə uyğun olaraq görkəmimi dəyişirəm. Və ona görə də bu yeni fotosessiya məsələsi gündəmə gəldi.Bilirsiniz, səhnədə hər şey bir-biri ilə zəncirvari şəkildə bağlıdır. Həm sənət olmalıdır, həm də yaxşı zövq. Bunlar bir-birini tamamlamalıdır. Onu da deyim ki, bütün bu işləri özüm görməli oluram.

- İşinizdə sizə kömək edən bir kimsə yoxmu?

- Əslində Türkiyədə mənim işlərim bir az asanlaşdı. Asanlaşdı ona görə ki, heç olmasa şirkət iki klipimi çəkdi, diskin üz qabığını hazırladı. Ancaq mahnıların aranjimanlarında şəxsən özüm iştirak edirdim, çünki aranjimanların yüksək səviyyədə olmasını istəyirdim. Azərbaycanda isə belə işlə məşğul olan şirkət yoxdur.

- Son vaxtlar, elə indi də sizin çox aqressiv olduğunuz gözlərdən yayınmır. Bunun səbəbi?

- Deməzdim ki, son vaxtlar və hətta indi belə aqressivəm. Mən həmişə olduğum kimiyəm. Bu mənim təbiətimdir, sevinəndə gülürəm, xoşuma gəlməyən məqamlarda hirslənirəm. Bəzən ağlayıram. Niyyətimi gizləmirəm, fikirləşdiyimi dilə gətirirəm. Başqa cür ola bilmirəm. Məsələn, bu gün kefim o qədər də yoxdur. Bəlkə ona görə sizə aqressiv görünürəm. Mən mahnılarımı ifa edərkən obraza daxil olmağı bacarıram, çünki həmin an həmin sözlərin təsiri altında oluram. Ancaq həyatda obraza girə bilmirəm. Çünki həyatda olduğum kimiyəm. Albom çıxandan sonra Türkiyəyə daha tez-tez gedirəm. Orada mənə deyəndə ki, sən azərbaycanlılara bənzəmirsən, çox əsəbiləşirəm. Sən mənim burada aqressiv olduğumu deyirsən, ancaq mən orada daha çox aqressivəm. Çəkilişdən əvvəl elə cavab verirəm ki, onlar canlı efirdə bu sualı vermirlər. Onları sorğu-suala tuturam ki, bununla nə demək istəyirsiniz? Onlar deyirlər ki, səhnədəki azərbaycanlı müğənnilər ağır çəkilidir, siz isə onlara bənzəmirsiniz.

- Özünüzü eyni çəkidə saxlamağın sirlərini açıqlaya bilərsinizmi?

- Hamı bilir ki, mən neçə illərdir hər gün idmanla məşğul oluram. Burada genetikanın çox böyük əhəmiyyəti var. Mən heç bir yerimi sonradan düzəltməmişəm.

Əvvəldən necə olmuşamsa, indi də eləyəm. Düzdür, ana olandan sonra beş ilə yaxın ətli qalmışam. Sonra özümü arıqlatdım. Mən özümü heç vaxt gözəl hesab etməmişəm. Düzdür, gözəl olmağa çalışıram. Əlbəttə, gözəl olmaq istəyirəm. İstəyirəm tamaşaçıların zövqünü oxşayım.

- Bir müddət əvvəl səhnə fəaliyyətinizə ara vermişdiniz...

- Axı səhnə bir idarə deyil ki, çıxıb gedəsən, sonra da ora qayıdasan. Səhnə fəaliyyətinə, sadəcə, ara vermək olar. Mənim də belə bir qərar verməyim səbəbsiz deyildi. Çünki həmin müddət konsertlərin səviyyəsindən, oradakı atmosferdən xoşum gəlmirdi, ona görə də çəkilmişdim kənara. Düşünürdüm ki, əgər mən istədiyim kimi olmursa, o zaman istəmədiyim kimi də olmasın. Heç yerə getmirdim. Məsələn, teleproqramların bir neçəsi xoşuma gəlmir, birinə getsəm, digərləri inciyəcək məndən, ona görə də heç birinə getmirdim. Mədəniyyət aləmində çox pis bir atmosfer yaranmışdı. Ona görə də Mədəniyyət Nazirliyinin təşkil etdiyi konsertlərə də getmirdim.

- Türkiyə şou-biznesində sizə simpatiyası və antipatiyası olan həmkarlarınız varmı?

- Antipatiyası olanları bilmirəm.Ancaq bilirsiniz ki, Ajda Pekkanın bağ evində qonaq olmuşam, eyni zamanda o məni bir neçə dəfə balıq yeməyə dəvət edib. Orada olanda məni mütləq evlərinə dəvət edirlər, pianoda çalıb-oxuyuruq, həmin ifanı yazırlar. Mən görürəm ki, onlar Azərbaycan sənətçisi olaraq məni qeyri-adi qarşılayırlar. Təvazökarlıqdan uzaq olsa da, deməliyəm ki, Mətin Şəntürk, Mətin və Eda Özülkü də məni evlərinə, studiyalarına dəvət ediblər. Şükriyyə ilə birgə proqrama çıxdıq və o məndən ona müəllimlik eləməyi xahiş etdi.

- Ancaq sizi Türkiyə telekanallarında daha tez-tez görürdük.

- Çünki orada diskimi tanıtmalı idim. Siz tanıyırsınız, orada da disklərimi tanıtmalıyam. Türkiyədə on proqramdan birinə getməyə razılıq verirəm. Burada da mətbəx proqramlarını xoşlamıram, neçə dəfə çağırıblar getməmişəm. Baxmayaraq ki, çox reytinqli proqramlardır.

- Yaxın zamanlarda Azərbaycanda və ya Türkiyədə konsert vermək planınız?

- Hələlik belə bir şey planıma daxil deyil. Mən Brilyant Dadaşova olaraq bu işə çox məsuliyyətlə yanaşıram.

- Türkiyədə yaradıcılıqdan əlavə bir biznes işi qurmadınız ki?

- Yox, mən, ümumiyyətlə, nə Azərbaycanda, nə də Türkiyədə heç bir biznes işi qurmadım. Çox əfsuslar olsun ki bu zamana kimi qurmamışam və heç zaman da bizneslə məşğul olmamışam. Əslində mənim bizneslə məşğul olmağa heç vaxt pulum çatmaz. Biznes çox bahalı məşğuliyyətdir.

- Belə nəticəyə gəlmək olar ki, dünyada gedən iqtisadi böhran sizə də təsirsiz ötüşməyib...

- Maliyyənin mənə heç təsir etmədiyi vaxt var ki? Hər zaman maddi cəhətdən əziyyət çəkmişəm.

- Türkiyədə hər hansı bir televerilişdə proqram aparıcısı olmaq istəmirsiniz? Eşitmişik ki, Türkiyədə aparıcılıq və dizilərə çəkilmək təklifi almısınız.

- Alıb-almadığımı deməyəcəm. Hələ bilmirəm, ola bilər. Əslində burda da, orda da ola bilər.

- Türk Müzik Birliyi ilə işbirliyi davam edirmi?

- İşbirliyi deyəndə, sizin fikirləşdiyiniz kimi işləsəm, o zaman gərək təşkilati işlərlə məşğul olum. Mənim heç başımı qaşımağa vaxtım yoxdur. Təşkilati işlərlə dostumuz Cenk məşğul olur. Əslində onlar çox arzulayıblar ki, Azərbaycandakı təmsilçi mən olum, mən də razılaşdım.

- Ehtiyac olsa, plastik əməliyyata gedərsiniz?

- Ehtiyac olsa... Əlbəttə, ehtiyac olacaq. Vaxtım olsa, bu dəqiqə gedərəm. Bir ay heç bir verilişə çıxmayım, heç bir məclisə getməyim, o zaman əməliyyat etdirərəm. Gözlərimin çəkik olmasını xoşlayıram, burnumda sınıq var, onu düzəltdirərdim. Profilimdən məhz bu səbəbdən xoşum gəlmir.

- Bir müddət əvvəl sizi Türkiyənin TRT kanalında yayımlanan "Sən türkülərini söylə" yarışmasında seyrçi zalında gördük.

- Samir Piriyevi dinləməyə getmişdim. Mahnısını ifa etdikdən sonra çıxıb getdim. Çox kövrəlmişdim, qəhərlənmişdim.Samirin oxumağı ilə fəxr etdim. Əgər o müsabiqədə oxumağı bacarmayan biri olsaydı, ayağımın altına milyon da töksəydilər, getməzdim. Bizim mədəniyyətimizi, musiqilərimizi rüsvay etməyə heç kimin haqqı yoxdur. Oxuya bilmirsə, qaxılsın otursun evində. Fonoqram ilə evində oxusun, özü bilər. Getsin toylarda camaatı aldatsın, televiziyalarda tanış tapsın özünü tapşırtdırsın. Ancaq xaricə çıxıb sənin, mənim, bizim mədəniyyətimizi təmsil etməyə qürur duya biləcəyimiz adam lazımdır. Samir Piriyev orada türk mahnısını elə ifa etdi ki, bir türk müğənnisi o boğazları vura bilməzdi. Onların özündə bu mahnını bu səviyyədə oxuyan olmamışdı. Həmin verilişə çatmaq üçün maşını qırmızı işıqlarda sürürdüm. Elə orada dedim ki, "vay-vay, Samir, sənin yolunda mən cərimə verəcəm". Ancaq onun ifasından sonra artıq bunu fikirləşmədim.

- Bir müddət tez-tez pariklərdən istifadə edirdiniz. Buna səbəb nə idi?

- Hə, bir ara lap çox istifadə edirdim. Müxtəlif pariklərim var. Demək olar ki, dörd ilə yaxındır ki, istifadə etmirəm. Bir ara saçımın rəngini açanda yandırdım. Bir il qara saçla gəzdim ki, saçım bərpa olunsun. Xoşuma gələn parik olsa, bu gün də taxaram.

- Bu illər ərzində siz yaşınızın neçə olduğunu açıqlamadınız. Suallardan qaçırdınız. Məgər yaş kompleksiniz var?

- Ümumiyyətlə, kişili-qadınlı hamıda bir az yaş kompleksi var. Mənim 30 yaşım olanda çox ağlamışdım. Ağlayırdım və evdə deyirdim ki, artıq hər şey bitdi. Oğlumun beş yaşı olanda ağlayırdı ki, mən qocalacağam. Onu sakitləşdirə bilmirdim. Qocalmaqdan qorxmuram, oğlumu tez evləndirmək istəyirəm ki, nəvələrim olsun. Səhnənin öz qanunları var. Mən səhnədəyəm və həmişə yaxşı görünməyə çalışmalıyam. Ümumiyyətlə, qadından yaş soruşanları başa düşmürəm. Qadına göründüyü yaşı verərlər. Mən bunu qadınların nailiyyəti kimi qiymətləndirirəm.

XATUN

Ayna.- 2011.- 8 yanvar.- S.21.