"Dialoq Avrasiya" Platforması çərçivəsində ailə problemləri

Ötən ilin sonlarında "Dialoq Avrasiya" Platforması çərçivəsində Türkiyə Respublikasının Antalya şəhərində "Ailə dini, ənənələri və müasirliyi öz ətrafında birləşdirən dəyər kimi" mövzusunda beynəlxalq konfrans keçirilmişdir. Bu tədbirə dünyanın 53 ölkəsindən 650 nümayəndə qatılmışdı. Azərbaycan nümayəndə heyətinə Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova, xalq yazıçısı Anar, "525-ci qəzet"in baş redaktoru Rəşad Məcid, Televiziya və Radio Milli Şurasının sədri Nuşirəvan Məhərrəmli, "Dialoq Avrasiya" Platformasının Azərbaycan üzrə sədri Mustafa Saatçı, professorlar İlham Məmmədzadə, Akif Musayev, Şahlar Əsgərov, Akif Abbasov, Qulu Məhərrəmli, Cəfər Cəfərov, Malik Cəbrayılov, Məhərrəm Qasımlı, ADU-nun kafedra müdiri Samir Həmidov, Ənvər Abbasov, Qafqaz Universitetinin prorektoru Məmmədəli Babaşlı, Lider televiziyasının nümayəndəsi Tofiq Abbasov və başqaları daxil idilər.

Konfrans öz işinə noyabrın 26-da Antalya şəhərinin "Rixos Tekirova" istirahət mərkəzində başladı. Konfransın plenar iclasında çıxış edən Jurnalistlər və Yazarlar Fondunun başçısı Mustafa Yeşil ailə modelinin mühafizə edilib saxlanmasının zəruriliyini vurğuladı.

"Dialoq Avrasiya" Platformasının sədri Nurlan Orazalin diqqəti konfransın əhəmiyyətinə yönəltdi.

Plenar iclasda Azərbaycan Respublikası Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova, Rusiya Elmlər Akademiyası Şərqşünaslıq İnstitutunun direktoru Rostislav Rıbakov və başqaları da çıxış etdilər.

Plenar iclasdan sonra tədbir üç bölmədə davam etdirildi. İki gün ərzində həmin bölmələrdə 60-a yaxın məruzə dinlənildi. Yaxşı haldır ki, məruzələrin müzakirəsi və münasibət bildirilməsi üçün də vaxt müəyyənləşdirilmişdi. Bundan başqa, bu və ya digər məruzələr qabaqcadan ayrı-ayrı ölkələrdən olan mütəxəssislərə rəyə göndərilmişdi. Bölmələrdə həmin şəxslərin rəyləri də dinlənildi. Ekspertlər kimi AMEA-nın Fəlsəfə, Sosiologiya və Hüquq İnstitutunun direktoru, professor İlham Məmmədzadə, AMEA-nın İqtisad İnstitutunun əməkdaşı Aqil Əsədov, Qafqaz Universitetinin müəllimi Əbülfəz Süleymanov çıxış etdilər.

Ayrı-ayrı bölmələrdə Türkiyədən Aytəkin Sırın "Mənəvi nöqteyi-nəzərdən kütləvi informasiya vasitələri və ailə", Litvadan Vanda Birute Qinevidcenin "Müasir ailə", Rusiyadan Rostislav Rıbakovun "Ailəyə təsir göstərən müxtəlif ideologiyalar", Seneqaldan Fatou Sarr İfanın "Seneqalda ailə və kasıblıq", Qazaxıstandan Mayra Kabakovanın "Müasir qazax ailəsində dəyərlər və ənənələr", Hindistandan Ənvər Alamın "Dini dövlət və qadın hüquqları", İsveçrədən Hans Ukonun "Ənənədən müasirliyə: nəyi əldə etdik və nəyi itirdik?", Avstraliyadan Rozmari Consonun "XXI əsrdə - informasiya əsrində təhsil, ailə, ənənələr və dəyərlər" və s. mövzularda məruzələri maraqla qarşılanmışdır.

"Dialoq Avrasiya" Platforması çərçivəsində keçirilən beynəlxalq tədbir noyabrın 28-də yekunlaşdırıldı.

Qazaxıstan Yazıçılar İttifaqının sədri, qurumun başqanı Nurlan Orazalin son iki ildə görülmüş işlərlə bağlı hesabat verdi. Təlimata uyğun olaraq, yeni başqanın seçilməsi ilə bağlı təkliflər irəli sürüldü və ukraynalı tarixçi alim və ictimai xadim, professor Vladimir Sergeyçuk növbəti iki il üçün qurumun sədri, Jurnalistlər və Yazıçılar Vəqfinin sabiq başçısı Harun Tokak həmsədr seçildilər. Platformada Avrasiya tələbə layihəsinin on protokolu imzalandı. Həmin protokollara uyğun olaraq, 2011-ci ildə "Dialoq Avrasiya"nın üzvü olan ölkələr arasında tələbə mübadiləsinin həyata keçirilməsi qərarlaşdırıldı. Bundan başqa, növbəti ildə Avrasiya Pedaqoji klubunun yaradılması, Avrasiya Yazarlar Birliyinin toplantısının keçirilməsi, müasir qələm layihəsi və "Böyüklərin dünyasında uşaqlar" mövzusunda konfransın keçirilməsi nəzərdə tutuldu.

Konfrans Ailə Akademiyasının yaradılması kimi mühüm təklifi irəli sürdü ki, bu, gənclərin psixoloji baxımdan müdafiə olunmasına, onların ailə həyatına hazırlanmalarına kömək olacaqdır.

Tədbirin sonunda çıxışlar oldu. Azərbaycanın xalq yazıçısı Anar öz çıxışında "Dialoq Avrasiya" Platformasının son dərəcə xeyirxah və gərəkli istiqamətdə iş apardığını söyləyərək əlavə etdi: "Hər savaşın sonunda bir barış var. Ermənistan Respublikası ölkəmizin ərazisinin xeyli hissəsini işğal etmişdir. Bu dövlətin günahı üzündən bir milyondan artıq qaçqınımız var. Azərbaycan dövlətinin bütün səylərinə baxmayaraq, Ermənistan rəhbərləri sülhə doğru addım atmaq istəmir, işğalçılıq siyasətindən əl götürmür, danışıqlar masası arxasında oturmur, yaxud oturduqda da bu danışıqları pozurlar. Ermənistanın öz məkrli siyasətindən əl götürməsi, onun da nümayəndələrinin belə böyük bir tədbirə qoşulması məgər pis olardı?".

Dialoq Avrasiya" Platforması çərçivəsində keçirilən "Ailə dini, ənənələri və müasirliyi öz ətrafında birləşdirən dəyər kimi" mövzusunda beynəlxalq konfrans başa çatdı. İştirakçılar konfransın işindən və nəticələrindən son dərəcə razı qaldılar və nikbin bir əhvali-ruhiyyə ilə Antalya şəhərindən ayrıldılar.

Akif ABBASOV,

pedaqoji elmlər doktoru,

professor,

Mustafa SAATÇI,

"Dialoq Avrasiya" Platformasının

Azərbaycan üzrə sədri

Azərbaycan müəllimi.- 2011.- 14 yanvar.- S.14.