Səhnəyə Məcnun gəldi, Məcnun getdi

Opera solisti Baba Mahmudoğlunun 70 yaşı onsuz qeyd olundu

Milli operamızın unudulmaz solisti, Xalq artisti Baba Mahmudoğlu (Mirzəyev) sağ olsaydı, 70 illiyini özü qeyd edərdi. Onun doğmaları, həmkarları, sənətini sevənlər Muğam Mərkəzində bu əlamətdar günü onsuz qeyd etdilər. Mühəndis idi, sonra musiqi sənətinə gəlmişdi, operada ilk rolu "Leyli və Məcnun"da Zeyd oldu. Sonra baş rollara kökləndi. Deyildi ki, səhnədə Mahmudoğlu olmurdu, Məcnun olur, Kərəm olur, Qərib olur, Şah İsmayıl olur, İbn Səlam olurdu... Dünyaya da, səhnəyə də Məcnun gəldi, Məcnun getdi.

Bu bənzərsiz sənətçi barədə o da deyildi ki, ömrü boyu heç kəsin dalınca söz deməyib. Öz sənəti ilə məşğul olub, öz sənət dünyası ilə yaşayıb. Bir də o deyildi ki, bu mühitdə nadir bir hal olaraq çox yüksək intellektə malik olub. Evində böyük kitabxanası olub, hansı şəhərə getsə, kitab alarmış, öz sahəsinə dair çox kitab oxuyubmuş, həmkarları ilə oxuduqları barədə saatlarca söhbət edə bilirmiş. Dünya klassiklərini, dahi dramaturqları oxumağa onda hər zaman böyük daxili tələbat varmış.

Bir dəfə qəzetimizin ovaxtkı əməkdaşı, ictimai-siyasi mövzularda yazan Kamal Əli ilə təsadüfən bir toplantıda olmuşdu. Kamal onun etdiyi söhbətlərin dərinliyini duyub, onunla söhbətə girişir və maraqlı bir müsahibə ilə gəlmişdi. O müsahibəyə, onun muğam barədə mülahizələrinin dərinliyinə və səviyyəsinə görə redaksiyaya nə qədər zənglər oldu.

İnstitutu bitirib zavodda konstruktor-mühəndis işlədiyi vaxt - 1961-ci ildə Opera və Balet Teatrında "Gözəl səslər" müsabiqəsi keçirilir. Dostları ona bu müsabiqədə iştirak etməyi tövsiyə edirlər. Gedir. Maestro Niyazinin rəhbərliyi altında keçirilən bu mötəbər müsabiqədə 153 iştirakçı arasında birinci olur... İncəsənət İnstitutuna daxil olur. Operaya dəvət olunur və beləcə onun sənət yolu başlanır. Opera tamaşalarında onun adı olanda, onun Filarmoniya konsertlərində bilet tapılmazdı.

Baba Mahmudoğlu 2006-cı ilin dekabrında həyatdan getdi. O da deyildi ki, Baba Mahmudoğlu öz sənət həyatında xalq mahnılarımıza öz möhrünü vurub getdi. Yəni bu mahnıları özünə xas bir üslubda, heç kəsi təqlid etmədən oxudu, ondan başqa heç kəs bu əzəli mahnıları onun sayaq oxuya bilməz. Onun təşkil etdiyi "Dastan" ansamblı böyük auditoriya qazanmışdı. Yeganə sənətçi idi ki, öz yaradıcılığında aşıq musiqisinə bu qədər geniş yer verdi. Öz nikbin ovqatlı, fəlsəfi çalarlı, ürəkləri duyğulandıran sənəti ilə ellərimizi, dünya ölkələrini dolaşdı, sürəkli alqışlar qazandı.

O axşam Muğam Mərkəzinin ekranında onun ifalarını öz səsində dinlədik. Sənət dostları onun barəsində xoş sözlər söylədilər. Bir zaman onun ifasında dinlədiyimiz mahnılar ifa edildi. O axşam milli musiqi sənətimizin bir auditoriya çərçivəsində bayramı idi. Amma onsuz... Ruhu isə orada idi.

İsmayıl

Ayna.- 2011.- 29 yanvar.- S.20.