"Fransa inciləri" Bakıda

400-dək nadir əsər nümayiş olunur

Milli İncəsənət Muzeyində "Fransa inciləri" mövzusunda sərgi açıldı. Heydər Əliyev Fondunun təşəbbüsü və dəstəyi ilə təşkil olunmuş bu sərginin açılışında Fondun prezidenti, millət vəkili Mehriban Əliyeva, ölkəmizdə səfərdə olan Fransa mədəniyyət və kommunikasiya naziri Frederik Mitteran, siyasət və incəsənət adamları, diplomatik korpusun rəhbərləri iştirak edirdilər.

Başqa ölkələrin paytaxtında da nümayiş etdiriləcək bu sərgi ilk dəfə Bakıda təqdim edilir. Sərgidə 2 ay ərzində Fransa incəsənətindən 400-dək nadir əsər nümayiş olunacaq. Bu sərgi Azərbaycan Milli İncəsənət Muzeyi, Dövlət Muzeyləri Birliyi-Böyük Saray tərəfindən, Luvr, Orse muzeyləri, Fransa Milli Kitabxanası, Milli Mebel və Milli Qobelen, Bove və Savonri manufakturaları, qəsrlər üzrə dövlət təsisatı, Versal sarayı və bir çox digər Fransa muzeylərinin iştirakı ilə təşkil olunub.

Mehriban Əliyeva belə bir sərginin təşkilində əməyi olanlara təşəkkürünü bildirib, Fransa ilə Azərbaycan arasında mədəni əlaqələrin inkişafında nazir Frederik Mitteranın xüsusi rolunu vurğulayıb. Bildirib ki, sərgidə nümayiş olunan xalçaçılıq, təsviri incəsənət örnəkləri, qravürlər və fotoşəkillər, dekorativ sənət əşyaları Fransanın ən möhtəşəm muzeylərinin kolleksiyalarından gətirilib:

"Versal sarayını, Luvr və Orse muzeylərini, Pompidu mərkəzini, Fransa Dövlət Kitabxanasını və digər çox məşhur mədəniyyət ocaqlarını bəzəyən 400-ə yaxın eksponat iki aydan çox paytaxtımızda təqdim olunacaq. Pussen, Deqa, Renuar, Tuluz-Lotrek, Sisley, Roden kimi dahi rəssamların və heykəltəraşların əsərləri ilə birbaşa tanış olmaq üçün bu, gözəl bir fürsətdir".

Birinci xanım Fransa ilə Azərbaycan arasında mədəni əlaqələrin tarixinə nəzərə salaraq, hələ XIX əsrdə məşhur yazıçı Aleksandr Dümanın Qafqaz səyahəti zamanı xan qızı Xurşidbanu Natəvan ilə görüşünü xatırladıb. Üzeyir Hacıbəylinin 1995-ci ildə Parisin "Femina" teatrında fransız dilində tamaşaya qoyulmuş "Arşın mal alan" operettası, Fransada vaxtilə nəşr olunan "Qafqaz" jurnalının redaktoru Ceyhun Hacıbəylini və Fransa ədəbiyyatına "Banin" imzası ilə daxil olan və ilk fransızdilli yazıçımız Ümbülbanu Əsədullayevanı xatırladıb. Mehriban Əliyeva:

"Fransanın bir sıra ali təhsil ocaqlarında Azərbaycan dili fakültələri fəaliyyət göstərir, yüzlərlə azərbaycanlı tələbə Fransanın ali məktəblərində təhsil alır. Bu ilin sonunda Parisdə Azərbaycanın Mədəniyyət Mərkəzi fəaliyyətə başlayacaq. Apreldə Parisdə Azərbaycanın müasir incəsənətini təqdim edən "Bakıya uçuş" adlı sərgi keçiriləcək. Ötən il Heydər Əliyev Fondunun dəstəyi ilə paytaxtımızda ilk fransızdilli məktəbin binasının inşası başlayıb. Heydər Əliyev Fondu Versal sarayının, Luvr muzeyinin və Strasburqun tarixi kilsəsinin bərpasında da iştirak edib".

Sərginin açılışında Fransanın mədəniyyət və kommunikasiya naziri Frederik Mitteran çıxış etmişdir.

Sərgidə təqdim olunan əsərlər fransız zövqü, fransız ideyaları və fransız kreativini əks etdirir.

İsmayıl

Ayna.- 2012.- 17 mart.- S.20.