Sənətçiyə sığorta lazımdırmı?

Onlar bu xidmətin hansı növünü vacib sayır?

Sığorta xidmətlərindən faydalanan insanlar çoxdur. Bir çox dünya ulduzları kimi, bizim sənətçilər də sığortalanmağa dəb kimi baxmaqla yanaşı, sahib olduqları mülklərinin taleyini göz altına almaq üçün bu imkandan bəhrələnirlər. Avtomobili tez-tez qəza törədən sənət əhli böyük maddi itkidən yayınmaq üçün bu vasitəyə əl atır. Bir müddət əvvəl maşını yanan Xatirənin sığorta kağızı olduğundan itkisi az olub. Bu hadisədən sonra bir neçə həmkarı "ehtiyat tədbirinə" əl atıb.

Apardığımız kiçik araşdırma nəticəsində öyrəndik ki, nəinki sənətçilər, sadə insanlar daha çox avtomobillərini və evlərini sığorta edirlər.

Qeyd edək ki, xarici ölkələrdə sənətçilər əmlakları ilə yanaşı, bədənlərinin müxtəlif hissəsini də sığortaladıqlarını ictimaiyyətdən gizlətmirlər. Bizim mentalitet isə bu dəbin formalaşmasına imkan yaratmır. Sənət adamları ilə söhbətimizdə sığortadan danışdıq. Onların bu xidmətin hansı növündən bəhrələndiyini öyrəndik.

İlk ünvanımız yuxarıda adını çəkdiyimiz Xatirə oldu. 80 min manat dəyərində avtomobili yanaraq kül olduqda bundan təəssüflənsə də, sığorta şirkətinin ödəyəcəyi məbləği düşünüb, sonradan özünə təsəlli verib: "Hadisədən bir neçə gün sonra sığorta şirkətinin nümayəndələri avtomobilə baxış keçirdilər və dəyən ziyan hesablandı. Həmin pulla özümə yeni avtomobil almışam.

Xuraman Şuşalı da sığortanın insanın ümid yeri olduğunu düşünür və deyir ki, bu günə qədər bir neçə avtomobili idarə edib və onların hər biri vaxtlı-vaxtında sığortalanıb:

"Mənim dəfələrlə qəza keçirdiyim barədə xəbəriniz var. Hər dəyən ziyanı şirkət ödəyib və maliyyə itkim olmayıb. Bu səbəbdən də sığorta mənim üçün vacibdir.

İndiki maşınını da sığorta etdirdiyini deyən sənətçi əlavə etdi ki, paytaxtda bədən hissələrinin sığortası həyata keçirilsəydi, öncə gözlərini, sonra isə bütün bədənini sığorta etdirərdi.

Elza Seyidcahan isə evini sığorta etdirməsə də, maşınını artıq neçə ildir sığortalayıb və qeyd etdi ki, bədən hissələrindən saçlarını və gözlərini sığorta etdirməyi çoxdan düşünüb. Lakin bu imkan hələ real həllini tapmayıb.

Aygün Kazımova uzun illərdir sığortanın imkanlarından bəhrələndiyini deyir. Vurğuladı ki, avtomobili ilə yanaşı, paytaxtdakı mənzilini və Mərdəkandakı bağ evini sığortalayıb. Bu xidmətin hər bir insan üçün vacibliyindən danışaraq sonra qeyd etdi ki, tezliklə daha bir sığorta imkanından bəhrələnməyi düşünür:

"Yaxın gələcəkdə tibbi sığortadan istifadə etməyi düşünürəm. Bir məsələni də qeyd edim ki, mən bədən üzvlərinin sığortasına heç də pis baxmıram.

Bir çox müasir dəbləri sınaqdan keçirən Faiq Ağayev sığorta xidmətinə də biganə deyil. Bu xidmət yaradılan gündən avtomobilini sığortalayıb. Lakin evi barəsində hələ düşünür. İnsan üçün ən başlıca can sağlığının olduğunu deyir, tibbi sığortanı isə daha vacib sayır.

Məleykə Əsədova və Könül Kərimova əmlakın (maşın və ya ev) sığorta olunmasını müsbət hal kimi qiymətləndirsələr də, təəssüflə qeyd etdilər ki, bu xidmətdən indiyə qədər istifadə etməyiblər. Əvvəlcə vaxt darlığını səbəb gətirən sənətçilər, daha sonra sığortalanmağın şərtlərindən xəbərsiz olduqlarını bildirdilər. Məleykə Əsədova:

"Hərdən internetdə bu barədə məlumatları izləyirəm. Xarici sənətçilərin əksəriyyəti sığortanı vacib bildikləri yazılır. Lakin mən bu barədə hələ ciddi düşünməmişəm. Eyni zamanda yaradıcılıq işlərimin sıxlığı mənə bu imkanı vermir".

Söhbətdən bəlli oldu ki, Məleykə xanım mülkünü sığorta etdirməkdən daha çox, tibbi sığortaya maraq göstərir.

Bu günə kimi sığorta haqqında düşünməyən və heç bir sığorta şirkətindən yolu düşməyən Nazpəri Dostəliyeva bizim sualımızdan sonra sığorta haqqında düşünməyə başladı. Məleykə xanım kimi onu da mülk sığortası yox, tibbi sığorta daha çox maraqlandırır:

"Çoxları mənə gözəl gözlərimin olduğunu deyirlər. Əgər belə bir imkan olsaydı, əvəlcə gözlərimi sığortalayardım. Xaricdə də sənətçilər xoşa gələn bədən hissələrini bu cür qoruyurlar".

Tez-tez mənzil dəyişən Nadir Qafarzadə isə əmlakını sığortalamadığını söylədi. Bu barədə son günlərə kimi ciddi düşünməyib, lakin nəhayət, fikrini dəyişib. Avtomobil qəzalarının sıx baş verdiyini düşünən Nadir Qafarzadə bahalı maşının onu xərcə salmaması üçün sığorta imkanlarından mütləq bəhrələnəcəyini söylədi.

Xatun

Ayna.- 2012.- 12 may.- S.21.