Görüşdük nə çətin, ayrıldıq nə asan...

Emin Sabitoğlunun xatirəsinə

Elə bəstəkarlar var ki, iri həcmli janrlara yer ayırsalar da, mahnı janrına daha çox diqqət yetirir və bu janr onların az qala bütün yaradıcılığını əhatə edir. Belə bəstəkarlardan biri də Emin Sabitoğlu idi.

O, simfoniya, simfonik poema, "On min dollarlıq kef", "Bankir adaxlı" kimi musiqili komediyalar, 30-dan çox tamaşaya musiqi ("Unuda bilmirəm", "Məhv olmuş gündəliklər" və s.), "Bizim Cəbiş müəllim", "Gün keçdi", "Dədə Qorqud", "İstintaq", "Bəyin oğurlanması", "Təhminə və Zaur", "Həm ziyarət, həm ticarət" və s. kinofilmlərə musiqi bəstələmişdir. Eləcə də "Bakı, sabahın xeyir", "Uzaq yaşıl ada", "Bu gecə", "Şükriyyə", "Bəlkə", "Çay", "Ağ çiçəyim", "Dərələr", "Kəpənək", "Neyləyim" və s. mahnıların müəllifidir. Emin Sabitoğlunun dəfələrlə dinləməkdən yorulmadığımız bu və digər mahnıları Ş.Ələkbərova, Z.Xanlarova, M.Babayev, X.Abbasova, F.Kərimova, A.İslamzadə, Y.Rzazadə və digər böyük ifaçılar tərəfindən ifa olunmuşdur.

Onun hətta tamaşalara yazdığı mahnıları da sonralar, sanki tamaşalardan ayrılıb müstəqil mahnı həyatına qədəm qoyaraq dillər əzbərinə çevrilirdi. Emin Sabitoğlunun 75 illik yubileyinə həsr olunmuş xatirə gecəsində bunlar yada düşürdü.

O gecə görkəmli ziyalılarımız - Bəstəkarlar İttifaqının sədri, professor F.Əlizadə, Yazıçılar Birliyinin sədri, xalq yazıçısı Anar, xalq artisti, bəstəkar S.İbrahimova, Əməkdar incəsənət xadimi, musiqişünas Z.Qafarova Emin Sabitoğlunun ömür yolu ilə bağlı bir sıra məqamlara toxundular, eyni zamanda bəstəkarla bağlı səmimi xatirələrini bölüşdülər.

Bəstəkar haqqında çəkilmiş yeni sənədli filmin nümayişi də maraqla izlənildi. Azərbaycan Televiziyası tərəfindən lentə alınan bu filmdə bəstəkarın mahnılarının səslənməsi, özünün görüntüsü və öz səsi ilə mahnılarının ifasının göstərilməsi salona toplaşanları sanki keçmiş illərə qaytardı.

Diqqəti cəlb edən məqamlardan biri də bəstəkarın romanslarının səslənməsi oldu. "Dəniz deyir", "Çox yorğunam, kapitan", "Dəniz" romansları Anar Şuşalı və Beyəlxalq müsabiqə laureatı Fərid Əliyev tərəfindən ifa olundu. Xatırladaq ki, ilk dəfə ifa olunan bu romanslarda bəstəkarın yeni üslub cəhətləri özünü hiss etdirirdi.

Bədii dəyəri olduqca böyük olan, zəngin melodik və harmonik dili ilə zirvədə duran Eminin musiqisi, mahnıları bu günün musiqiçiləri üçün klassik örnəklərdir. Sevə-sevə dinlədiyimiz və bu gün də ifaçıların repertuarında yer tutan mahnıları dəyərini anlaya bilənlərə hər zaman böyük zövq bəxş edib. Onlar yaddaşlarda dərin iz buraxaraq daima yaşayacaq.

Fərdin MƏMMƏDLİ,

BMA, musiqişünas

Ayna.- 2012.- 9 noyabr.- S.20.