Moldovada Azərbaycan Mədəniyyəti Günləri başa çatdı

Maraqlı tədbirlər bir-birini əvəz edib

Moldovada Azərbaycan Mədəniyyəti Günləri başa çatıb. Mədəniyyət və Turizm Nazirliyindən bildirilir ki, Mədəniyyət Günləri çərçivəsində bizim Rus Dram Teatrı "Müsyö Jordan və Dərviş Məstəli şah" tamaşası ilə Beltsı şəhərinin teatrsevərləri qarşısında çıxış ediblər.

Caz konserti də maraqla qarşılanıb. Tədbirin əvvəlində çıxış edən Azərbaycan Milli Konservatoriyasının rektoru, xalq artisti Siyavuş Kərimi qeyd etmişdir ki, Azərbaycanda caz musiqisinin tarixi, inkişaf yolları musiqinin bu növünə marağı daha da artırıb və bu sahədə istedadlı ifaçılar nəsli yetişib. 1000 nəfərə yaxın tamaşaçısı olan səhnədə sənətçilərimizin əsl peşəkar ifası tamaşaçıların böyük marağına, gurultulu alqışlara səbəb olub.

Müvəffəqiyyətlə yekunlaşan konsertdə Moldovanın mədəniyyət naziri Boris Fokşa, mədəniyyət və turizm nazirinin müavini Ədalət Vəliyev, Azərbaycanın Moldova səfiri Namiq Əliyev, Moldova Azərbaycanlıları Konqresinin Prezidenti Vüqar Novruzov, Türkiyə, Ukrayna, Belarus və Yaponiyanın Moldova səfirləri iştirak ediblər.

Moldovaya mədəniyyət və turizm nazirinin müavini Ədalət Vəliyevin rəhbərliyi ilə 50 nəfərlik heyət yollanmışdı. Heyətə Milli Konservatoriyanın rektoru, xalq artisti Siyavuş Kərimi, Teatr Xadimləri İttifaqının sədri, xalq artisti Azərpaşa Nemətov, Rəssamlar İttifaqının katibi, xalq rəssamı Ağəli İbrahimov, Dövlət Film Fondunun direktoru, Əməkdar incəsənət xadimi Cəmil Quliyev, Səməd Vurğun adına Azərbaycan Dövlət Rus Dram Teatrının kollektivi, Əfqan Rəsulov, Ruslan Hüseynov və Elvin Bəşirovdan ibarət caz qrupu daxil idi.

Mədəniyyət günləri çərçivəsində paytaxt Kişinyovun "Odeon" Mədəniyyət Mərkəzində Azərbaycan kinosu günlərinə start verilib. İlk gündə bizim kinematoqrafçıların son illərdə istehsal etdiyi "Çölçü" bədii filmi maraqla qarşılanıb. Həmin gün Çexov adına Moldova Dövlət Rus Dram Teatrında Azərbaycan Mədəniyyəti Günlərinin təntənəli açılış mərasimi keçiriləndə teatrın foyesində isə "Azərbaycan ənənələrin və müasirliyin qovşağında" adlı foto və turizm sərgisinin təqdimatı olub. "Odeon" Mədəniyyət Mərkəzində Azərbaycan kinosu günlərinə "Vəkil hanı?" bədii filminin nümayişi ilə yekun vurulmuşdur.

Ayna.- 2012.- 17 noyabr.- S.20.