Azərbaycan səhnəsi Yaşar Nurisiz qaldı

Aktyor II Fəxri Xiyabanda torpağa tapşırıldı

Azərbaycan səhnəsi Yaşar Nurisiz qaldı. Bənzərsiz aktyor idi. Öz üslubu vardı və yaratdığı obrazlar yaddaşlara köçürdü. Sənət həyatında çoxlu rollar oynamışdı. Onda sarkazm, kinayə, qrotesk güclü idi.

Yaşar Nuri nə vaxtdan bəri xəstəliklə əlləşirdi. Türkiyə həkimləri onun ömrünün uzadılması üçün mümkün olan hər şeyi etdilər. Lakin təbabətin qüvvəsinin tanınmadığı bir hüdud var.

Uzun sürən xəstəlikdən sonra 61 yaşında həyata vəfat edən xalq artisti Yaşar Nuri ilə Milli Dram Teatrında - onun uzun illər çalışdığı sənət məbədində vida mərasiminə qatılanlar arasında mərhumun yaxınları, sənət dostları, hökumət adamları, millət vəkilləri, sadəcə, onun sənətini bəyənənlər vardı. Yaşar Nurinin 60 illik yubileyində etdiyi çıxışın audio yazısı mərasimə qatılanları o illərə qaytardı. Belə bir ovqat hakim oldu ki, bu aktyor öz adını milli teatr sənəti tarixinə həmişəlik yazmağı bacarmışdır. Bu, ona nəsib olub.

Nazir Əbülfəs Qarayev Yaşar Nurinin həyatının 50 ilini sənətə həsr etdiyini xatırladaraq dedi:

"Yaşar Azərbaycan səhnəsinin əvəzolunmaz, təkrarsız ifaçısı, sənət fədaisi idi. Ona görə bu qədər sevilir. Son ana qədər səhnə arzusu ilə yaşadı. Burada, onun cənazəsi önündə çıxış etmək çox ağırdır. Mən Yaşarın vəfatına görə Azərbaycan xalqına başsağlığı verirəm".

Onu əbədi dünyasına uğurlamazdan əvvəl sənət dostları Yaşar Nuri barədə səmimi ürək sözlərini ifadə etdilər. Aktyor II Fəxri xiyabanda dəfn olundu.

Ayna.- 2012.- 24 noyabr.- S.20.