Avropa Film Festivalı başlandı

Məqsəd - Avropa dəyərləri haqda anlayışları artırmaqdır

Bakıda Avropa Film Festivalına həsr olunmuş mətbuat konfransı və açılış mərasimi keçirilib. Festival 4-10 oktyabr günlərində davam edəcək. Mətbuat konfransında Avropa Birliyi Azərbaycan nümayəndəliyinin rəhbəri, səfir Roland Kobia, "Park Cinema" kinoteatrının rəhbəri Namik Quliyev və litvalı kinorejissor Alqimantas Puipa iştirak ediblər. Roland Kobia bildirib ki, Avropa Birliyi Azərbaycanla mədəni əlaqələrə çox böyük önəm verir və bu festival nə siyasət, nə də iqtisadiyyatdan bəhs edir, burada söhbət yalnız mədəniyyətdən gedir. Kobia deyir:

"Festival çərçivəsində 15 film nümayiş olunacaq ki, bu filmlərin 14-ü Avropa Birliyi ölkələrində istehsal olunub, biri isə Azərbaycanda çəkilib. Biz, bu istiqamətdə Azərbaycan üçün bir yenilik etmiş olduq. Ötən il, festivala çox böyük marağın olduğunu nəzərə alaraq, bu il hər film iki seansda nümayiş olunacaq".

Kobia ümidvar olduğunu bildirir ki, təqdim olunan filmlər Azərbaycan vətəndaşlarının, Avropanın kino sənayesində gedən proseslərdən daha yaxşı xəbərdar olmasına və anlamasına imkan verəcəkdir.

Festival Alqimantas Puypanın "Yatmış kəpənəklərin qəsri" filmi ilə açıldı. Filmin qəhrəmanı Monika adlı qadındır (Yanina Lapinskayte). Onun zəngin və firavan həyatı öz axarı ilə gedir. Lakin bir gün əri ilə birlikdə bir fahişə qadını maşınla vururlar və qadın xəstəxanada intihar edir. Özünü günahkar sayan Monika fahişəliyə görə Almaniyadan qovulmuş üç qızı şəhərətrafı evində saxlamaq təklifi ilə sosial sığınacağa müraciət edir. Bu qızlarla ünsiyyət onun dünyaya münasibətini dəyişir. Filmin ssenari müəllifi rejissorun özüdür. Filmin nümayişindən əvvəl mətbuat konfransında çıxış edərkən Puypa deyirdi: "Biz qadınları dünyaya göstərmək istədik. Bu gün qadın problemləri və cəmiyyətdə qadınların rolu çox artıb. Filmdə danışılan hadisələr realdır".

Alqimantas Puipa Azərbaycana ilk dəfə gəldiyini deyir. Festival çərçivəsində nümayiş olunan bu filminin necə qarşılanacağına görə həyəcan keçirdiyini söylədi. "Park Cinema" kinoteatrının rəhbəri Namik Quliyev Avropa Film Festivalının AB-nin Azərbaycan nümayəndəliyi tərəfindən hər il Bakıda təşkil olunduğunu xatırladır:

"Festivalda məqsəd Avropa Birliyi ölkələri ilə Azərbaycan arasındakı mədəni əlaqələri inkişaf etdirmək, Avropa dəyərləri haqda olan anlayışı daha da artırmaqdır. Festival Avropa Birliyinin Azərbaycan nümayəndəliyi, Avropa Birliyinə üzv dövlətlərin səfirlikləri, Azərbaycan Mədəniyyət və Turizm Nazirliyi və "Park Cinema"nın təşkilatçılığı ilə keçirilir. Festival çərçivəsində Azərbaycan ictimaiyyətinə müasir Avropa filmləri təqdim olunacaq". Avropa Film Festivalının proqramına Avropanın 14 ölkəsində və Azərbaycanda istehsal olunmuş 15 filmin nümayişi daxildir. Bu çərçivədə tamaşaçılara musiqili komediyadan (İsveçdən "Səsin Sədası"), emosional drama (İtaliyadan "Yenə Öp Məni"), psixoloji trillerdən (Britaniyadan "Kevin haqqında danışmalıyıq") tutmuş detektiv ssenarili filmədək (Belçikadan "Alsqeymer sindromu") geniş çeşidli janrlarda filmlər təqdim olunacaq. Filmlərin arasında Almaniyada yaşayan azərbaycanlı rejissor Elmar İmanovun "Qəbirqazanın yelləncəkləri" filmi (ata və oğul arasında pisxoloji dram) də var. Filmlərə giriş pulsuzdur.

Ayna.- 2012.- 6 oktyabr.- S.20.