Müasir və hesabatlı ordu yaratmaq öhdəliyi götürülüb

Aleksandr Verbşou: "Gözləntilərimizi doğrultmayanlara açıq narahatlığımızı bəyan edirik"

"Ermənistan və Azərbaycan NATO-nun uzunmüddətli və dəyərli tərəfdaşlarıdır. Biz artıq birlikdə bir çox böyük məsələlərə nail olmuşuq. Amma siyasi dialoqumuzu dərinləşdirmək və praktik əməkdaşlığımızı artırmaq üçün əhəmiyyətli imkanlar qalır". Bunu NATO baş katibinin müavini Aleksandr Verbşou "Atlantik-Community.org" portalının oxucularının çoxsaylı suallarını cavablandırarkən bildirib. Qeyd edək ki, Verbşou NATO-nun mövcud hərbi-siyasi strategiyasını dərindən bilən şəxslərdən hesab olunur və onun açıqlamaları həmişə diqqətlə izlənilir.

NATO rəsmisinin sözlərinə görə, Cənubi Qafqaz regionu böyük təhlükəsizlik qayğıları ilə rastlaşır. "Ən təxirəsalınmaz problem Dağlıq Qarabağ münaqişəsinin həllinin tapılması olaraq qalır. Ermənistan və Azərbaycan arasında münaqişəyə qayıdış olmamalıdır. Gərginliklər azaldılmalı, barışığın inkişaf etdirilməsi və regionun nəhəng imkanlarının açılması üzrə konkret addımlar atılmalıdır", - deyə o qeyd edib.

O qeyd edib ki, irəliyə doğru yeganə yol dialoq, kompromis və əməkdaşlıqdır: "NATO təşkilat kimi nizamlamanın tapılmasına birbaşa olaraq cəlb olunmayıb. Biz tərəf tutmuruq. Amma biz Minsk Prosesinə dəstək verməyi davam etdiririk və dinc nizamlamya doğru səylər göstəririk".

NATO baş katibinin müavini Ramil Səfərov olayına alyansın münasibətini bir daha açıqlayıb: "Biz Ramil Səfərovun əfvi barədə Azərbaycanın qərarından dərin narahatlıq keçiririk. Ramil Səfərovun 2004-cü ildə törətdiyi hadisə cinayətdir və şöhrətləndirilməməlidir. Bu, inama ziyan vurur və sülh prosesinə və ya regional sabitliyin saxlanılmasına töhfə vermir".

Çex Respublikasının Masarik Universitetində magist təhsili alan Daniel Pavlikin Verbşouya sualı maraqlı olub: "NATO aşkar qeyri-demokratik Azərbaycan, Bəhreyn və başqa ölkələrlə tərəfdaş olmalıdırmı?" NATO baş katibinin müavini sualı belə cavablandırıb:

"NATO hərbi alyans olmaqla yanaşı bölüşdürülən inam və prinsiplər icmasıdır. Bütün üzvlər azadlıq, demokratiya, qanunun aliliyi, insan haqlarına hörmət kimi eyni təməl dəyərləri bölüşürlər. Və bütün üzvlər bu dəyərləri zəruri olan anda müdafiə etməyə hazırdırlar.

NATO-nun güclü tərəfdaşları bizim dəyərləri bölüşənlərdir. Eyni zamanda, demokratiyaya və hüququn aliliyinə gəldikdə bu istiqamətlərdə bizim gözləntilərimizi doğrultmayan tərəfdaşlara açıq narahatlığımızı bəyan edirik.

Təhlükələrin sərhəd tanımadığı dünyada biz həmçinin bütün qitələr boyu sülh və təhlükəsizliyə konkret töhfələr verməkdə maraqlı olan tərəfdaşlarla əməkdaşlığa ehtiyac duyuruq. Biz tərəfdaşlarımızın demokratik islahatları yerinə yetirməsi öhdəliklərinə dəstək veririk və alyans təcrübələrə malik olduğu müxtəlif sahələr üzrə tərəfdaşlara yardım etməyə hazır dayanıb. Xüsusilə də müdafiədə və təhlükəsizlik sektorları islahatında. Biz həmçinin başqa beynəlxalq təşkilatlar və qeyri-hökumət təşkilatları ilə birlikdə işləyirik".

Eyni zamanda Verbşou bildirib ki, Azərbaycan da daxil olmaqla NATO-nun xeyli tərəfdaşı çağdaş təhlükəsizlik çağırışlarına müvafiq olan və çoxmillətli əməliyyatlarda öz tam iştiraklarını oynamağa qadir olan müasir və hesabatlı silahlı qüvvələri inkişaf etdirmək üzrə öhdəlik götürüblər. "NATO və Azərbaycanın Mina Agentliyi (ANAMA - red) arasındakı kənd təsərrüfatı ərazilərində minaların təmizlənməsi üzrə əməkdaşlıq misal ola bilər. İndiyə qədər yarım milyon partlamamış sursat zərərsizləşdirilmişdir. Bu, öz mahiyyəti baxımından ən nəhəng layihələrdən biridir. Nəticədə kənd təsərrüfatı üçün lazım olan yüzlərlə hektar ərazi təmizlənib və insanların həyatlarını itirmək təhlükəsi aradan qaldırılıb", - deyə o vurğulayıb.

Yeri gəlmişkən, müdafiə naziri, general-polkovnik Səfər Əbiyev oktyabrın 10-da Şimali Atlantika Şurasının Əfqanıstana həsr olunmuş ISAF formatında iclasında iştirak edib. Azərbaycan Respublikasının NATO yanında Nümayəndəliyindən verilən məlumata görə, iclas zamanı nazir Əbiyev çıxış edərək Əfqanıstanda aparılan ISAF əməliyyatının cari vəziyyətinə dair fikirlərini bölüşüb, Azərbaycanın göstərdiyi çoxtərəfli töhfələrin davam etdiriləcəyini qeyd edib. Habelə, Əbiyev Azərbaycanın ISAF əməliyyatının yekunlaşacağı 2014-cü ildən sonra da Əfqanıstana yardımlarını davam etdirəcəyini vurğulayıb. Bununla yanaşı, naziri qeyd edib ki, beynəlxalq hüquq və NATO/SNT prinsiplərinin kobud pozulması yolu ilə Azərbaycan torpaqlarının işğalının yaratdığı gərginlik ölkəmizin bu istiqamətdəki səylərini məhdudlaşdırır. O, müxtəlif bəhanələrlə "status-kvo"nun saxlanılması və işğalın davam etdirilməsinin Avro-Atlantik təhlükəsizliyə ciddi təhdid törətdiyini də vurğulayıb. Brüsselə səfəri çərçivəsində Əbiyev bir sıra dövlətlərin müdafiə nazirləri ilə görüşüb və qarşılıqlı maraq doğuran məsələlər ətrafında fikir mübadiləsi aparıb.

Qeyd edək ki, bundan öncə, oktyabrın 8-də NATO Mənzil Qərargahında Azərbaycan Respublikasının 2012-ci il Fərdi Tərəfdaşlıq üzrə Əməliyyat Planının (İPAP) Qiymətləndirmə sənədinin müzakirəsi keçirilib. "28+1" formatında keçirilmiş müzakirələrdə Azərbaycan tərəfindən Xarici İşlər Nazirliyi, Müdafiə Nazirliyi və Dövlət Sərhəd Xidmətinin rəsmiləri iştirak ediblər.

Müzakirələr zamanı NATO üzv ölkələri Azərbaycanın sadiq və etibarlı tərəfdaş olduğunu vurğulamış və ölkənin NATO cari gündəliyində duran çoxşahəli məsələlər, o cümlədən meydana gələn təhlükəsizlik çağırışları, Əfqanıstanda Beynəlxalq Təhlükəsizliyə Yardım Qüvvələri (ISAF) əməliyyatı və s. üzrə fəal əməkdaşlığını və töhfəsini yüksək dəyərləndiriblər. Görüşdə digər məsələlərlə yanaşı Azərbaycanda təhlükəsizlik sektorunun islahatı, qüvvələrin NATO ilə qarşılıqlı operativ uzlaşması, həmçinin regionda təhlükəsizlik məsələləri, o cümlədən Ermənistan-Azərbaycan münaqişəsi üzrə fikir mübadiləsi aparılıb.

Azərbaycan ilə NATO arasında bu kimi məsləhətləşmələr ildə bir dəfə keçirilir. Azərbaycan hazırda 2012-2013-cü illəri əhatə edən FTƏP-in üçüncü mərhələsini həyata keçirir.

Cəsur Sümərinli

Ayna.- 2012.- 13 oktyabr.- S.9.