AFFA ilin ən yaxşılarını mükafatlandırdı

Beynəlxalq Muğam Mərkəzində Premyer Liqanın 2011-2012-ci il mövsümünün qaliblərinin mükafatlandırma mərasimində ilk olaraq AFFA prezidenti Rövnəq Abdullayev çıxış edərək qalibləri təbrik etdi, onalara cari mövsümdə də uğurlar arzuladı. Sonra müxtəlif nominasiyalar üzrə mükafatlar təqdim olundu.

Kamran Ağayev ("Xəzər Lənkəran") "Ən yaxşı qapıçı", Ruslan Abışov ("Xəzər Lənkəran") "Ən yaxşı müdafiəçi", Adrian Pit ("Xəzər Lənkəran") "Ən yaxşı yarımmüdafiəçi", Rauf Əliyev ("Qarabağ") "Ən yaxşı hücumçu", Ceyhun Sultanov ("Kəpəz") "Ən yaxşı qol", Rəşad Abdullayev ("Qəbələ") "Ən yaxşı assistent", Nurlan Novruzov ("Bakı") "Mövsümün tapıntısı", Böyükağa Hacıyev ("Neftçi") "Ən yaxşı baş məşqçi" nominasiyasının qalibi kimi mükafata layiq görüldülər.

"Ən yaxşı futbolçu" isə Flavio Aleks Valensio ("Neftçi") seçilib. Elçin Məmmədov, Fariz Yusifov və Əliyar Ağayev "Ən yaxşı baş hakim", Mehman Mahmudov, Elman Musayev, Namiq Hüseynov, Yaşar Abbasov, Vaqif Musayev və Azər Əsgərov "Ən yaxşı köməkçi hakim" kimi mükafatlandırıldılar.

Mövsümün bombardiri Bahodir Nasimov ("Neftçi") üçün də xüsusi mükafat təqdim olundu. ARDNŞ-nin geologiya, geofizika və yataqların işlənməsi üzrə birinci vitse-prezidenti Xoşbəxt Yusifzadəyə isə "Ən sadiq azarkeş" mükafatı verildi.

Sonda AFFA-nın prezidenti Rövnəq Abdullayev 2011-2012-ci il mövsümündə ilk 3 yeri tutan komandaların nümayəndələrinə müvafiq olaraq bürünc, gümüş və qızıl medalları təqim etdi. Mərasimdə incəsənət xadimləri maraqlı çıxışları ilə iştirakçıların zövqünü oxşadı.

Ayna.- 2012.- 13 oktyabr.- S.22.