Davud Kazımovun fərdi sərgisi açıldı

Onun "səyahət coğrafiyası" genişdir

Milli İncəsənət Muzeyində Davud Kazımovun fərdi sərgisi açılıb və bu sərgi bir neçə gün davam edəcək. Sərgidə rəssamın 60-a qədər əsəri nümayiş olunur.

Xalq rəssamı Davud Kazımov (1926) ilk sənət dərslərini rəssamlıq dərnəyində məşhur rəssam Kamil Xanlarovdan alıb, 1945-ci ildə Azərbaycan Dövlət Rəssamlıq Məktəbini bitirib, 1947-ci ildən isə respublika və ümumittifaq sərgilərinin daimi iştirakçısı olub. Yaradıcılığının erkən dövrlərində çəkdiyi ilk əsərləri "Zuğulba", "Dəniz sahili" kiçik həcmli lirik mənzərələri, incə koloriti ilə seçilir.

Fırça ustasının yaradıcılığında bir vaxtlar əmək mövzusu üstün yer tutub, sonralar kənd və rayonlara səfərlərinin nəticəsində onun rəsmlərinə bölgələrdə yaşayan insanların həyat tərzi, adət-ənənələri, etnoqrafik özəllikləri, rəngarəng milli geyimləri köçmüşdür. Bu əsərlər müxtəlif sərgilərdə böyük rəğbət qazanıb. "Xəzərin təkində", "Sağıcılar", "Yollar" və s. bu kimi rəsmlərində rəssamın öz təbiətinə xas səmimiyyəti, insanlara məhəbbəti rənglərin dili ilə inandırıcı təsir bağışlayır.

Davud Kazımov milli təsviri sənətdə istedadlı qrafika ustası kimi də tanınır. Bir vaxt kitab illüstrasiyası sahəsində daha çox çalışıb. Bu sıradan Cəlil Məmmədquluzadənin, Cəfər Cabbarlının hekayələrinə, Mirzə Əli Möcüzün şeirlərinə çəkilmiş rəsmləri ayrıca qeyd olunmalıdır. Güney Azərbaycandan satirik şair Mirzə Əli Möcüzün şeirlərinə çəkilmiş rəsmlər kəskin publisistik təsvir dili, obrazların dinamikliyi, daxili gərginliyi və dramatizmi ilə seçilir.

Əfsanəvi "Neft daşları", dəniz neftçilərinin romantik həyatı, fədakar əməyi rəssamın sevimli mövzularından idi. O, dəfələrlə dəniz şəhərində müşahidələrini rəsm albomuna köçürüb, etüdlər edib. Bütün bunlar sonralar süjetli tablolara, mənzərələrə, portretlərə çevrilib.

Davud Kazımov bir vaxt Bolqarıstanda, İspaniyada yaradıcılıq ezamiyyətlərində olub (1979, 1980). "Bolqarıstan silsiləsi" və "İspaniya silsiləsi" rəsmləri beləcə yaranıb. Onun "səyahət coğrafiyası" genişdir: Almaniya, Çexoslovakiya, İtaliya, İraq, Türkiyə...

Rəssamın bir sıra əsərləri Azərbaycan Milli İncəsənət Muzeyi, Milli Azərbaycan Tarixi Muzeyi və Nizami Gəncəvi adına Milli Azərbaycan Ədəbiyyat Muzeyində nümayiş etdirilir.

Davud Kazımov Azərbaycan Dövlət Rəssamlıq Akademiyasının professorudur, boyakarlıq fakültəsində pedaqoq kimi fəaliyyət göstərir.

Zəminə

Ayna.- 2012.- 22 sentyabr.- S.20.