FİRƏNGİZ MÜTƏLLİMOVA 50 YAŞINI QEYD EDƏCƏK

Aktrisa yubiley proqramı üzərində çalışır

Mayın 1-də Azərbaycanın xalq artisti aktrisa Firəngiz Mütəllimovanın 50 yaşı tamam olur. Bu münasibətlə sənətçi xanım geniş və maraqlı proqram hazırlayır. Lakin yubiley proqramı mayın 1-də deyil, bir neçə gün sonra həllini tapacaq. Bunu təfərrüatı ilə danışan Firəngiz xanım belə dedi: "Mayın 1-də yazıçı-dramaturq İlyas Əfəndiyevin yubileyi münasibətilə hazırlanan "Şeyda" tamaşasının təqdimatı olacaq. Azərbaycan Dövlət Akademik Milli Dram Teatrının rəhbərliyi mənim yubileyimdən xəbərsiz olduğu üçün belə bir addım atıb. Yubileyim günü mən səhnədə tamaşaçılarla bir çevrədə olacağam. Növbəti günlərdə isə haqqında danışdığım yubiley proqramı gerçəkləşəcək. Təfərrüatı ilə əvvəlcədən danışmaq istəmirəm. Çünki proqramda bəzi dəyişikliklər ola bilər. Lakin deyə bilərəm ki, bu, yubileyə yaraşan bir ssenari olacaq".

Firəngiz xanım 50 yaşının dövlət səviyyəsində qeyd olunmayacağını bildirdi: "Adətən sənətkarların 50 yaşı dövlət səviyyəsində qeyd olunurdu. Lakin son illər ənənələr bir qədər dəyişib. Artıq sənət adamlarının 60 yaşı dövlət tərəfindən silsilə tədbirlərlə qeyd olunur. Əslində, bu məni sevindirir. Bu yubileyi dostlarımla özümün planlaşdırdığım səviyyədə keçirərəm. 10 ildən sonra isə dövlət tərəfindən qeyd olunar".

Bir neçə gün əvvəl Türkiyədən qayıdan Firəngiz xanım orada çəkildiyi filmdən də danışdı: "Sərxan Kərəmoğlunun ekranlaşdırdığı "Alın yazısı" filminin bəzi hissələri Türkiyədə lentə alınıb. Bu məqsədlə mən qonşu ölkədə səfərdə olmuşam. Həmişə ekrandan izlədiyim və sənətinə hörmətlə yanaşdığım "Yaprak dökümü" serialının qəhrəmanı Halil Ergünlə tərəf-müqabil olmuşam. Onun serialda göstərdiyi insani keyfiyyətlər həyatda da ona məxsusdur. Olduqca səmimi və gözəl insandır. Səfər zamanı bir sıra film təklifləri almışam. Aktrisa Məlahət Abbasova məni bir sıra yaradıcı insanlarla tanış edib. Əgər apardığımız söhbətlər müsbət nəticə verərsə, yaxın aylarda türk filmlərində çəkiləcəyəm. Bundan başqa, Məlahətin iştirak edəcəyi kino layihələrindən birində də mənim adımın təsdiq olunması gözlənilir. Məlahət Abbasovanın bir neçə gündən sonra Bakıya səfəri olacaq. Ətraflı məlumatı ondan öyrənə bilərik".

Söhbət zamanı neçə illərdir səsi-sorağı eşidilməyən müğənni bacısı Nərgiz Mütəllimovanı xəbər aldıq. Məlum oldu ki, uzun zaman xaricdə yaşayan və yenidən Bakıya qayıdan Nərgiz xanım artıq səhnə üçün darıxıb: "Hiss edirəm ki, bacım yenidən səhnəyə can atır. Ona bu işdə köməyimi göstərəcəyəm. Belə qərara gəlmişik ki, tezliklə yeni mahnılarından birinə klip çəkilsin. Nərgizin müğənnilik sənətinə böyük marağı var. Səhnəyə çıxmadığı müddətdə məşqlər edirdi, yeni mahnılar axtarışında idi. Yaxın aylarda tamaşaçıları onu yeni ampluada izləyə biləcəklər".

Z.RƏHİMQIZI

Ayna.-2009.-18 aprel.-S.20.