"Türkiyə birdev" Azərinə mükafat verdi

Sənətçi Türk Dünyasına mədəni xidmətlərinə görə təltif olunub

Türk dövlətləri ilə mədəni əlaqələr quran "Türkiyə birdev" şirkəti azərbaycanlı sənətçi Azərinə mükafat təqdim edib. Ötən gün Türkiyədən qayıdan sənətçi bildirdi ki, bu mükafat ona Türk Dünyasına mədəni xidmətlərinə görə verilib:

"Mənim yaradıcılığımın bir qolu Türkiyə ilə bağlıdır. Orada "TRT-Avaz" telekanalında veriliş aparıram. Eyni zamanda bir çox türk kanallarında Azərbaycan musiqilərini təbliğ edir və ölkəmizin tarixi yaşantıları, adət-ənənələri haqqında tamaşaçıları məlumatlandırıram. Bu fəaliyyətimi nəzərə alan şirkət növbəti mükafatını və diplomunu mənə təqdim etdi. Bu, çox sevindirici haldır. Çünki mənim təbliğatım göz önündədir və Türkiyədə bunu qiymətləndirirlər".

Müğənni ilə söhbətdən bəlli oldu ki, onun növbəti Türkiyə səfəri yaxın günlərdə gerçəkləşəcək. "TRT-Avaz" kanalında teleaparıcı kimi çalışan sənətçi missiyasının başına dönəcək:

"Xatırladım ki, əvvəllər "Azərinlə əsintilər" adlanan veriliş hər gün mənim təqdimatımda Antalyadan canlı yayımlandı və İctimai Televiziya da bunu yerli tamaşaçılara sərgiləyirdi. Lakin Antalyadakı məkan yay studiyası olduğundan biz yer dəyişmək məcburiyyətində qaldıq. Hazırda veriliş həftədə bir dəfə efirə gedir. Yaxın aylarda isə bunun canlı və gündəlik olacağı gözlənilir. Telekanal rəhbərliyinin bildirdiyinə görə, veriliş üçün ayrıca qış studiyası tikilir".

Azərinin bildirdiyinə görə, verilişin ömrü əvvəlki aylarla müqayisədə qısaldılsa da, bu, Azərbaycan milli musiqilərinin təbliğinə mane olmayıb. Müğənni bildirdi ki, ayda bir dəfə Azərbaycandan milli musiqi ifaçılarından bir nəfər musiqi heyəti ilə Türkiyəyə dəvət alacaq və verilişdə iştirak edəcəklər".

Z.Rəhimqızı

Ayna.- 2009.- 7 oktyabr.- S.24.