Muzeydə təlim seminarı

Muzey işini yaxşılaşdırmaq xətti götürülüb

Lətif Kərimov adına Azərbaycan xalçası və Xalq Tətbiqi Sənəti Dövlət Muzeyində "Muzeylərə dəstək şəbəkələrinin yaradılması və əhəmiyyəti" mövzusunda təlim-seminar keçirilib. Təlim-seminar Lətif Kərimov adına Azərbaycan xalçası və Xalq Tətbiqi Sənəti Muzeyi, Beynəlxalq Muzeylər Şurasının Azərbaycan Milli Komitəsi və Almaniya Xalq Universitetləri Birliyinin birgə təşəbbüsüdür.

Muzeyin direktoru Röya Tağıyeva layihənin əhəmiyyətindən danışıb. Sonra "başqa təşkilatlarla əməkdaşlıq" "media şəbəkəsinin yaradılması", "muzey marketinqi", "tədbirlərin təşkili və idarə edilməsi sahəsində müasir təcrübə" mövzuları ətrafında müzakirələr aparılıb. Xalq universitetləri birliyinin Azərbaycandakı nümayəndəsi İsgəndər Sadiq bildirib ki, layihənin gerçəkləşdirilməsində məqsəd həm də muzeyləri ənənəvi tədqiqat-araşdırma stereotiplərindən uzaqlaşdırmaq, muzeydən virtual istifadə imkanlarını təmin etməkdən ibarətdir.

2008-ci ildən keçirilən layihədə 4 ölkə - Azərbaycan, Gürcüstan, Ermənistan və Rusiya iştirak edir. Layihə 30 ay müddətinə keçirilir. Bu müddətdə muzey işçilərinin peşəkar cəhətdən təkmilləşdirilməsi, onların Almaniya və digər Avropa ölkələrinə səfərlərinin təşkili nəzərdə tutulub. Xaricdə əldə olunan təcrübə yerli mütəxəssislərə yeni bilik və vərdişlər qazanmağa, öyrəndiklərini ölkəmizdə tətbiq etməyə, bir sözlə, muzey işini yaxşılaşdırmağa xidmət edəcək.

Z.Rüstəm

Ayna.-2009.-17 oktyabr.-S.19.