“Taleyimlə bağlı ssenaridə baş nazirin müavini, yaxud millət vəkili abzasları yoxdur”

Seyran Səxavət ona verilən taleyi halallıqla qəbul etdiyini söylədi

"Yazanda özümü yaxşı hiss edirəm, yüngülləşir, mehribanlaşıram. Ümumiyyətlə, mənim üçün gündəm anlayışı yoxdur, dünyada ki varam. Gündəm dünyadan böyük deyil ki? Mən şou əhli və ya diktor deyiləm ki, hər gün efirdə görünüm". Bunu deyən yazıçı Seyran Səxavətdən nə yazdığı ilə maraqlandıq. Dedi ki, həmişə bir yazını iki dəfə yazır. Birinci dəfə beynində, ikinci dəfə kağız üzərində. İkinci yazı sadəcə mirzəlikdir: "İndi mən mirzəlik etmirəm. "60 ilin kişisi" adlı üçhissəli bir roman üzərində işləyirəm. Demək olar ki, bu əsər beynimdə tam hazırdır. Gərək yazı ardınca gedəndə hər şeyi unudasan. Yazı çox eqoist bir şeydir. Yazı biləndə ki sənin qəlbində ondan başqa zərrə qədər nə isə var, heç vaxt əlinə qələm götürə bilməzsən. Bunun üçün mənəvi-psixoloji hazırlıq lazımdır. Sözün böyük mənasında iki sevən adamın yanında üçüncü həmişə artıqdır. Mən də bütün ömrüm boyu çalışmışam ki, yazı ilə mənim yanımda "qəmiş" olmasın. Yazıçı həmişə yazır, amma həmişə köçürmür".
İllərdir bu roman üzərində işləyən Seyran Səxavət əsərin mövzusu haqqında söz açdı. Dedi ki, burada keçdiyi həyat yolundan bəhs edilir. Cəmiyyətdə havayı yaşamadığını dilə gətirən yazıçı: "Dünyada hamıdan çox tanıdığım özüməm. Ən çox tanıdığım adamı qoyub niyə başqasından yazmalıyam?" - deyir.
Azərbaycan ədəbiyyatında "oxucu aclığı"ndan söz salan həmsöhbətim məsələyə bu cür yanaşdı: "Bu gün Azərbaycanda oxumamaq eşqindən doğan toxluq və harınlıq var. Mətbuatda çox az-az görünürəm. Bir dəfə mənə sual vermişdilər ki, çoxdan bəri niyə susursunuz? Demişdim ki, mənim səsim həmişə gəlir, sadəcə, xalqın qulağı bir az ağır eşidir. Mən susanda da susmağımla ədəbiyyata xidmət etmişəm. Nə üçün ədəbiyyatın ekologiyasını korlayasan? Mənim ədəbi mühitimə dünyanın görkəmli yazıçıları daxildir. Niyə mən o boyda mühiti qoyub gəlib küncə sıxılmalıyam? Azərbaycan ədəbi mühiti dünya ədəbi mühitinin yanında uzaqbaşı yataq otağına bənzəyir, biz hamımız burada yatmaqla məşğuluq. Dünyanın ədəbiyyat sarayı isə böyükdür. Bu gün 1500-dən çox yazıçı var, hərəsinin də bir iş-gücü. Yəni kimin nə işlə məşğul olduğunu hamımız bilirik. Məncə, əsl yazıçılar yazmaqla, elə-belə yazıçılar isə nə ilə gəldi onunla məşğuldurlar".
"Bəs Seyran Səxavət nə işlə məşğuldur" sualına o belə yanaşdı: "Adımın qarşısında heç bir titul yoxdur. Mən tərtəmizəm. Sovet vaxtında mənə "Komsomol" mükafatı vermək istəyirdilər, gedib imtina elədim. Hərdən adamlardan tərsinə xahiş edirəm. Hərənin bir taleyi var, kor-koranə alın yazısına inananlardan deyiləm. Elə anlar olub ki, əsasən inandığım alın yazısını da anonim hesab etmişəm. Hər halda, mənim taleyimə baş nazirin müavini olmaq yazılmayıb. "Bu tale ilə barışıram" deməyin özü də artıqdır. Mən heç tale ilə dava eləməmişəm də. Taleyimlə bağlı yazılan ssenaridə baş nazirin müavini və ya millət vəkili abzasları yoxdur. Ancaq mən bu taleyi halallıqla qəbul edirəm. Qəbul etmədiyim yalnız bir şey var. Vay o gündən ki bir əbləh bəndə Allahın Seyran Səxavət adlı ssenarisinə bir abzas əlavə edib "sən bunu da yaşamalısan" desin. Mən bu abzası heç vaxt qəbul edib yaşaya bilmərəm".

Ayna.-2009.-24 yanvar.-S.20.