“Azərbaycanşünaslığın aktual problemləri”

Mayın 1-də Bakı Slavyan Universitetində “Azərbaycanşünaslığın aktual problemləri” mövzusunda IV beynəlxalq elmi konfrans başlanıb.

Milli Elmlər Akademiyasının humanitar və ictimai elmlər bölməsinin və Bakı Slavyan Universitetinin təşkilatçılığı ilə keçirilən, mərhum prezident Heydər Əliyevin 90 illiyinə həsr edilən, 220-dən çox yerli və xarici alimin məruzələrinin qəbul olunduğu konfransda elmi institutlardan, Azərbaycanın müxtəlif bölgələrindən nümayəndələr, eləcə də 14 ölkədən 40-dan çox qonaq iştirak edir.

“Media forum” saytına verilən məlumata görə, Milli Elmlər Akademiyasının prezidenti akademik Akif Əlizadə konfransdakı çıxışında Bakı Slavyan Universitetinin azərbaycanşünaslıq üzrə yüksək ixtisaslı kadrların hazırlanmasında gördüyü işlərin təqdirəlayiq olduğunu vurğulayıb.

Bakı Slavyan Universitetinin rektoru, Milli Elmlər Akademiyasının müxbir üzvü, professor Kamal Abdulla konfransı tələbələr, eləcə də bütün iştirakçılar üçün elm bayramı kimi dəyərləndirib, xarici universitetlərdə fəaliyyət göstərən Azərbaycan dili və mədəniyyəti mərkəzlərindən söhbət açıb. O, Kiyev, Poltava, Moskva və Minskdəki azərbaycanşünaslıq mərkəzlərinin açılması və fəaliyyət göstərməsində Bakı Slavyan Universitetinin əhəmiyyətli rol oynadığını deyib.

Tədbirdə Təhsil Nazirliyinin nümayəndəsi İ.Mustafayev, Belarusun Azərbaycandakı səfiri N.Y.Paskeviç, Nəsimi Rayon İcra Hakimiyyətinin başçısı N.Məhəməliyev, Poltava İqtisadiyyat və Ticarət Universitetinin rektoru A.A.Nestulya, İstanbul Kültür Universitetinin rektoru S.S.Demir, “Marşalek Holdinq”in prezidenti A.Marşalek, Palatski Universitetinin rektoru M.Maşlan, Harvard Universitetinin professoru M.Kramer, Tbilisi Dövlət Universiteti Linqvistika İnstitutunun direktor müavini M.Mancqaladze, Litva Dili İnstitutunun direktoru İ.Zabarskayte, Misirin Ayn-Şəms Universitetinin əməkdaşı Ə.S.Elaydi, Azərbaycan Milli Elmlər Akademiyasının Fəlsəfə, Sosiologiya və Hüquq İnstitutunun direktoru İ.Məmmədzadə, Ural Federal Universitetinin professoru A.G.Nesterov, Qazıxıstan Milli Texniki Universitetinin professoru K.Beqalinova çıxış ediblər.

Sonda “Avroviziya 2011” mahnı müsabiqəsinin qalibi, Bakı Slavyan Universitetinin məzunu və əməkdaşı Eldar Qasımov “Azərbaycan” mahnısını ifa edib.

Elmi konfrans mayın 3-dək davam edəcək.

Seyidzadə Hacı Tofiq

Azad Azərbaycan.- 2013.- 5 may.- S.7.