Heydər Əliyev - dahi şəxsiyyət və qayğıkeş rəhbər

“Vətənpərvərlik ruhu hər bir insanın qəlbində yaşamalıdır. Əgər vətənpərvərlik hissiyyatı olmasa, o, ölkəsinin vətəndaşı ola bilməz”.

Heydər ƏLİYEV, Azərbaycan xalqının ümummilli lideri

Tarixi şəxsiyyətlərin zəngin, şərəfli və mənalı ömür yolu bütöv bir millətin, dövlətin salnaməsinin məhvəridir. Həyatının mənasını yalnız xalqına təmənnasız xidmətdə görən Ümummilli lider Heydər Əliyev də bu müqəddəs amal uğrunda ən çətin maneələrə mərdliklə sinə gərən millət fədaisi kimi daim böyük ehtiramla, rəğbətlə anılır.

Ulu Öndərin mənalı və şərəfli ömür yolunun hər bir parlaq səhifəsi xalqımızın yaxın tarixi ilə ayrılmaz vəhdət təşkil edir. Dünya tarixşünaslıq elmi Heydər Əliyev şəxsiyyətini öyrəndikcə, əslində, müstəqil Azərbaycan dövlətinin keçmişini, bu gününü, gələcəyini, eləcə də milli dövlət quruculuğunu, Azərbaycanın beynəlxalq nüfuzunun möhkəmləndirilməsi əzmkarlığını, mədəniyyətimizi öyrənir.

Mayın 10-u müstəqil Azərbaycan Respublikasının memarı və banisi Ümummilli lider Heydər Əliyevin anadan olmasının 97-ci ildönümü tamam olur. Bu günü xalqımız, eyni zamanda, dahi şəxsiyyəti tanıyanların hamısı böyük hörmətlə qeyd edir. Bu həm də Azərbaycanın müstəqilliyinə, Heydər Əliyevin bizə miras buraxdığı dövlətçilik ənənələrinə hörmət əlamətidir. Həmin gün Ulu Öndəri Fəxri xiyabanda ziyarət edən insan axını, onun dövlətimiz qarşısındakı əvəzsiz xidmətlərinin Azərbaycan xalqı tərəfindən nə qədər yüksək qiymətləndirildiyinin göstəricisidir. Müasir Azərbaycanın həyatında elə bir sahə yoxdur ki, onun inkişafında Heydər Əliyevin imzası və əməyi olmasın.

Ümummilli Liderin şanlı vətənpərvərlik və peşəkarlıq irsini fəxrlə davam etdirən Azərbaycan təhlükəsizlik orqanlarının əməkdaşları da Heydər Əliyev məktəbinin layiqli davamçılarıdır. Artıq 23 ildir ki, mart ayının 28-i Azərbaycan təhlükəsizlik orqanları işçilərinin peşə bayramı günü kimi qeyd edilir. Bu bayramın təsis edilməsi, bütövlükdə təhlükəsizlik orqanlarında baş vermiş bütün müsbət dəyişikliklər görkəmli dövlət xadimi Heydər Əliyevin adı ilə sıx bağlıdır.

“Heydər Əliyev yoldaşın Azərbaycan SSR Nazirlər Soveti yanında Dövlət Təhlükəsizliyi Komitəsinin sədri təyin edilməsi haqqında Azərbaycan SSR Ali Soveti Rəyasət Heyətinin Fərmanı: Heydər Əlirza oğlu Əliyev yoldaş Azərbaycan SSR Nazirlər Soveti yanında Dövlət Təhlükəsizliyi Komitəsinin sədri təyin edilsin. Bakı şəhəri, 21 iyun 1967-ci il”.

Heydər Əliyevin Dövlət Təhlükəsizlik Komitəsinə sədr təyin edilməsilə xalqımızın milli mənafelərinin qorunması istiqamətində çox işlər görüldü. Ötən əsrin 60-cı illərindən başlayaraq, Heydər Əliyevin təşəbbüsü ilə təhlükəsizlik orqanları sistemində kadrların seçilib yerləşdirilməsi işində əsas üstünlük azərbaycanlılara verilirdi ki, nəticədə bu, həmin orqanın tərkibinin keyfiyyətcə milliləşdirilməsində əhəmiyyətli rol oynadı. Ulu Öndər bununla bağlı deyirdi: “Azərbaycanda təhlükəsizlik təşkilatının milliləşdirilməsi prosesi bizim əldə etdiyimiz ən böyük nailiyyət idi. Təşkilat milliləşdikcə onun fəaliyyətinin istiqamətini də Azərbaycanın milli mənafelərinə daha çox uyğun aparmaq mümkün olurdu”.

1969-cu ilin iyulunda Azərbaycan Respublikasının rəhbərliyinə irəli çəkilən Heydər Əliyev yalnız DTK-nın sədri kimi geniş informasiyaya malik deyildi, böyük bir rəhbər dünyagörüşünə, yüksək intellektə, sarsılmaz qətiyyətə və iradəyə, ölkənin bütün sahələrini inkişaf etdirə biləcək əsaslı tərəqqi proqramına malik olan bir şəxsiyyət idi.

Ulu Öndərlə təhlükəsizlik orqanlarında uzun müddət çiyin-çiyinə çalışan veteranlar dünya şöhrətli siyasi xadim haqqında xatirələrini daim qürur və dərin ehtiramla bölüşürlər. İstefada olan polkovnik-leytenant 95 yaşlı Bəxtiyar Süleymanlı da Heydər Əliyev məktəbinin yetirmələrindəndir. O, yaxşı xatırlayır: “Heydər Əliyev kimi böyük bir şəxsiyyətin fəaliyyəti, onun dövlət başçısı kimi qeyri-adi idarəetmə məharəti, müqayisə olunmaz dərəcədə sinədəftər natiqliyi və digər ali dəyərləri barədə dövri mətbuatda çox yazılıb. Heç şübhə yoxdur ki, belə bir nadir istedad sahibinin həyat və fəaliyyəti tarixçi alimlərimiz, elm adamları, qurub-yaratmaq arzusunda olan bütün insanlar üçün uzun illər tədqiqat obyekti, gələcək nəsil üçün örnək olacaq. Bu orqanda Ulu Öndərin rəhbərliyi ilə çalışmaq mənə də nəsib olub. O, təhlükəsizlik orqanı işçilərinə çox etibar edirdi, onlara özü qədər inanırdı. Bax, bu inama, etibara görə biz bütün qüvvəmizi səfərbər edib, tapşırılan işi yüksək peşəkarlıqla yerinə yetirməyə çalışırdıq. Dahi şəxsiyyətin bizə verdiyi tövsiyələr, məsləhətlər, xidmətini təhlükəsizlik orqanlarında davam etdirən əməkdaşlar üçün həmişə ibrət dərsi və böyük məktəb olmuşdur. Hazırda Dövlət Təhlükəsizliyi Xidmətində çalışan əməkdaşlar da bu məktəbdən bəhrələnirlər. Mən Heydər Əliyev peşəkarlıq məktəbini keçməyimdən qürur duyuram və özümü daim bu orqanın sıralarında hiss edirəm”.

Təqaüddə olan polkovnik Azər Qarayev bildirir ki, “Ulu Öndər Heydər Əliyevin məktəbini keçən təhlükəsizlik orqanının hər bir əməkdaşı özünü xoşbəxt saymalıdır. 1970-ci illəri xatırlamaq istərdim...Ulu Öndər respublikaya ilk dəfə rəhbərlik etdiyi dövrdə mən Gəncə şəhərində əməliyyat müvəkkili işləyirdim. Həmin vaxtlar Heydər Əliyev tez-tez rayonlara gedərdi, regionlarda kənd təsərrüfatı işlərinin gedişatı ilə maraqlanırdı, pambıq və üzüm tarlalarını addım-addım gəzir, kolxozçularla və üzümçülərlə görüşür, onların problemləri ilə maraqlanırdı. Onun kənd adamları ilə söhbəti və ünsiyyəti biz gəncləri heyran edirdi. Sadəliyi, insanların qayğısına qalmaq, çevik qərar qəbul etmək bacarıqları bir həyat dərsi idi. Bu dahi insan yorulmaq nə olduğunu bilməzdi, bütün günü qızmar günəş altında tarlaları gəzib, axşam isə bir neçə rayonun partiya və təsərrüfat işçilərini yığıb müşavirə keçirirdi. Mövcud nöqsanları aradan qaldırmaq üçün qiymətli tövsiyələrini verərdi.

Qeyd etmək istərdim ki, bu səfərlərdə Ulu Öndəri o vaxt Moskva Dövlət Beynəlxalq Münasibətlər İnstitutunun tələbəsi olan və yay tətilinə istirahətə gələn, möhtərəm Prezidentimiz cənab İlham Əliyev də müşayiət edərdi”.

Bəli, bu gün regionun lider dövləti olan Azərbaycan Respublikası sabaha hər zaman böyük ümidlə və inamla addımlayır. Bu sarsılmaz ümidi, inamı xalqımızda ümummilli lider Heydər Əliyevin siyasi kursunu uğurla davam etdirən Azərbaycan Respublikasının Prezidenti İlham Əliyev yaradır. Dövlətimizin başçısı demişdir: “Qarşıda duran bütün vəzifələri yerinə yetirmək üçün Heydər Əliyevin siyasəti davam etdirilməlidir. Bu siyasət bu gün də Azərbaycana lazımdır, sabah da lazım olacaqdır”.

S.İBRAHİM

Azad Azərbaycan.- 2020.- 30 aprel.- S.2.