Heydər Əliyev - təhlükəsizlik orqanlarında peşəkarlıq məktəbinin yaradıcısı

Ümummilli Lider Heydər Əliyev - 97

“Xüsusi xidmət orqanları üçün peşəkar kadrların hazırlanması milli təhlükəsizliyin təmin edilməsində ən başlıca məsələlərdən biridir, çünki bundan yalnız milli təhlükəsizlik orqanlarının effektivliyi deyil, həmçinin bütün ölkənin və xalqın təhlükəsizliyi asılıdır”.

Heydər ƏLİYEV

Azərbaycan dövlətçiliyini, xalqımızın müstəqilliyini əbədi yaşatmaq üçün Ulu öndər Heydər Əliyevin peşəkarlıq irsi, onun dövlət idarəçiliyi təcrübəsi misilsiz mənəvi xəzinəmizdir. Ölkəmizin hər bir vətəndaşının bu nadir xəzinədən bəhrələnməsi, dahi şəxsiyyətin zəngin dövlətçilik təcrübəsini, həyatının ən ağır anlarında belə doğma xalqına sədaqətlə xidmət etmək nümunəsini mənimsəməsi sabaha olan inamı artırır.

Dahi şəxsiyyət Heydər Əliyev Azərbaycan xalqının yaddaşında qurucu və xilaskar dövlət xadimi, milli lider və xalq məhəbbətini qazanan öndər kimi qalmışdır. Ümummilli Lider kimi onun adı Azərbaycan xalqının təxminən 40 illik bir dövrü əhatə edən tarixinin rəmzinə çevrilmişdir. “Azərbaycan tarixinin Heydər Əliyev mərhələsi” kimi qiymətləndirilən bu dövrdə Ulu Öndərimiz tərəfindən görülən böyük işlərin, onun həyata keçirdiyi xilaskarlıq və quruculuq missiyalarının məntiqi nəticəsidir ki, bu gün xalqımız demokratik və hüquqi bir dövlətdə yaşamaq imkanı əldə etmiş, xoşbəxt gələcəyi üçün bütün təminatları yaratmış, ən başlıcası isə siyasi və iqtisadi müstəqilliyə nail olmuşdur.

Ötən əsrin 50-cı illərindən etibarən başlanan dövr ümummilli lider Heydər Əliyevin Azərbaycan tarixindəki ölçüyəgəlməz rolu və xidmətləri ilə səciyyəvidir. Belə ki, Ulu Öndər uzun müddət dövlət təhlükəsizlik orqanlarında çalışmış, bu orqana rəhbərlik etmiş, daha sonra SSRİ tərkibində yüksək vəzifələrə qədər irəliləmiş və müstəqil Azərbaycanın rəhbəri vəzifəsinə qədər yüksəlmişdir.

Dahi şəxsiyyət Heydər Əliyev əks-kəşfiyyata rəhbərlik etdiyi 1956-64-cü illərdə, xüsusən də DTK rəhbərliyinə irəli çəkildiyi 1965-1969-cu illərdə artıq Azərbaycanın təhlükəsizlik orqanlarının milli prioritetlərini müəyyən etməyə başlamışdır. Ümummilli Liderin 1950-ci illərin ortalarından başlayan və sonralar da davam edən milliləşmə siyasəti ictimai-siyasi həyatın mühüm sahələrində, o cümlədən təhlükəsizlik orqanlarında milli kadrların yerləşdirilməsi, eləcə də azərbaycanlıların keçmiş SSRİ-nin müxtəlif bölgələrində təhsil almağa göndərilməsi ilə reallaşdırıldı. Bu həyati vacib prosesdə ən ümdə cəhət ondan ibarətdir ki, Heydər Əliyev milliləşdirmə siyasətini həyata keçirərkən prioritetliyi azərbaycanlıların sayca çoxluğuna deyil, onların milli mənəvi keyfiyyətlərinə verirdi. Məhz ümummilli lider Heydər Əliyevin həyata keçirdiyi bu siyasət nəticəsində təhlükəsizlik orqanlarında azərbaycanlı kadrların sayı xeyli artırıldı, milliləşdirilmənin əsası qoyuldu.

SSRİ dönəmində milliləşdirmə siyasəti aparmaq o qədər də asan məsələ deyildi. O zamanlar Azərbaycan xüsusi xidmət orqanları əməkdaşlarının sayını başqa millətlərin nümayəndələri hesabına artırmağa çalışırdılar. Azərbaycan xüsusi xidmət orqanlarının milliləşdirilməsini böyük uğur hesab edən ulu öndər Heydər Əliyev deyirdi: “Mən hesab edirəm ki, Azərbaycanda təhlükəsizlik təşkilatının milliləşdirilməsi prosesi bu təşkilatın Azərbaycana vurduğu zərərə baxmayaraq, bizim əldə etdiyimiz ən böyük nailiyyət idi, təşkilat milliləşdikcə onun fəaliyyətinin istiqamətini də Azərbaycanın milli mənafelərinə daha çox uyğun aparmaq olurdu”.

Azərbaycan xüsusi xidmət orqanlarında milliyyətcə azərbaycanlı olan kadrların yerləşdirilməsi prosesi ümummilli lider Heydər Əliyevin Azərbaycan Kommunist Partiyası Mərkəzi Komitəsinin Birinci Katibi olduğu dövrdə də davam etdirilmişdir. Ulu Öndərin Azərbaycan Respublikasına rəhbərliyi dövründə bu prosesə nəzarət daha da gücləndirilmişdi.

Ölkəmiz müstəqillik qazandıqdan sonra xalqımızın israrlı tələbi və təkidi ilə yenidən siyasi hakimiyyətə qayıdan Heydər Əliyev xüsusi xidmət orqanlarının qaşısında öz səlahiyyətlərinə daxil olan vəzifələri yerinə yetirmək üçün peşəkar kadr potensialını formalaşdırmaq, strukturu təkmilləşdirmək, təhlükəsizlik orqanlarının fəaliyyət istiqamətlərini müəyyənləşdirmək, onları xalqın maraqlarına cavab verən səviyyədə hazırlamaq və həyata keçirmək üzrə prinsipləri və vəzifələri müəyyən etdi. Mövcud daxili və xarici təhdidlərə baxmayaraq, təhlükəsizlik orqanlarının əməkdaşları öz işlərini ümummilli lider Heydər Əliyevin tapşırıq və tövsiyyələri əsasında qurmağa və həyata keçirməyə çalışırdılar. Böyük inamla demək olar ki, Azərbaycan Respublikasının hüquq mühafizə və təhlükəsizlik orqanlarının fəaliyyətinin dirçəliş və yüksəliş, sözün əsl mənasında milli maraqlara xidmət dövrü məhz ümummilli liderimiz Heydər Əliyevin Azərbaycan rəhbərliyinə qayıdışı, bu qurumların işinin yenidən təşkilinə və nizamlanmasına göstərdiyi tələbkarlıq, eyni zamanda gündəlik nəzarəti, qayğısı və diqqəti ilə bağlı idi.

Sabitlik əldə edildikdən sonra ümummilli lider Heydər Əliyevin təhlükəsizlik orqanları qarşısında yeni reallıqlardan irəli gələn vəzifələr qoyması ilə artıq qabaqlayıcı məlumatlar əsasında cinayətlərin hazırlıq, yaxud baş vermə ərəfəsində qarşısının alınmasına nail olundu. Heydər Əliyevin Azərbaycanın milli təhlükəsizlik siyasətinin aparıcı istiqamətlərini işləyib hazırlaması, Azərbaycan xüsusi xidmət orqanları qarşısında duran taleyüklü vəzifələri müəyyənləşdirməsi, respublikamızın digər dövlətlərlə təhlükəsizlik sahəsində strateji tərəfdaşlıq münasibətlərinin təşəkkülü yönümündə ardıcıl fəaliyyəti, təhlükəsizlik siyasətinin yaxın və uzaq perspektivi üçün konseptual müddəalarını açıqlaması tam məsuliyyətlə bunu deməyə əsas verir ki, müasir dövrdə Azərbaycanın təhlükəsizlik strategiyası onun adı ilə bağlıdır. Dahi siyasətçi Heydər Əliyev nəinki bu strategiyanı formalaşdırmış, eyni zamanda onun əməli surətdə həyata keçirilməsi üçün konkret istiqamətləri dəqiq müəyyənləşdirmişdir.

Zəngin və mənalı həyat yolunun 25 ilini dövlət təhlükəsizlik orqanlarında xidmətə həsr etmiş Ulu Öndər Heydər Əliyev 1 dekabr 1998-ci ildə təhlükəsizlik orqanlarının Akademiyasının təsis edilməsi haqda sərəncam imzaladı və Azərbaycanda ilk dəfə bu sahədə kadrların hazırlanmasının təməlini qoydu. Azərbaycan Respublikasının Prezidenti İlham Əliyevin Fərmanı ilə 20 dekabr 2005-ci ildə Akademiyaya dahi rəhbər Heydər Əliyevin adı verildi.

Dövlət Təhlükəsizliyi Xidmətinin Heydər Əliyev adına Akademiyası bu gün ümummilli lider Heydər Əliyev ənənələrinin yaşadılmasında, Ulu Öndərin ülvi amallarının gənc nəslə aşılanmasında mühüm rol oynayır.

Dahi rəhbər deyirdi: “Öz peşəkarlıq səviyyənizi yüksəltmək sizin vəzifəniz olmalıdır. Bu, hər bir ölkənin təhlükəsizlik orqanı üçün vacib olan amildir. Dövlətin təhlükəsizlik, yaxud kəşfiyyat orqanı o vaxt qalib gəlir, öz vəzifəsini layiqincə yerinə yetirir ki, orada peşəkar əhval-ruhiyyə olsun, peşəkar kadrlar və iş üslubu olsun. Ona görə də siz daim öz peşəkarlığınızın təkmilləşdirilməsi üzərində işləməlisiniz, oxumalı, öyrənməlisiniz, çox savadlı, bilikli insanlar olmalısınız”.

Ümummilli lider Heydər Əliyevin 23 mart 1997-ci il tarixli Sərəncamı ilə Azərbaycanın təhlükəsizlik orqanlarının peşə bayramı gününün təsis edilməsi bu orqanların tarixində yaşanan digər əlamətdar hadisə kimi tarixə düşmüşdür. Peşə bayramı gününün Azərbaycan Xalq Cümhuriyyəti dövründə ilk xüsusi xidmət orqanımızın yaradıldığı gündən - 1919-cu il 28 mart tarixindən götürülməsi də Ulu Öndərin irs-varis əlaqələrinə sədaqətinin ifadəsi idi.

Bu gün Ulu Öndərin siyasi kursunu inamla və uğurla davam etdirən, müstəqilliyimizi əzmlə möhkəmləndirən, demokratik prinsiplərə söykənərək sivil, hüquqi dövlət quruculuğu yolunda dönməzliyini sübuta yetirən Azərbaycan Respublikasının Prezidenti cənab İlham Əliyevin rəhbərliyi ilə Azərbaycanın öz dövlətçilik ənənələrini daha da inkişaf etdirərək, etibarlı və təhlükəsiz gələcəyi, əbədiyaşarlığı üçün sarsılmaz təməl yaradılmışdır.

N.Cəfərov

Azad Azərbaycan.- 2020.- 18 aprel.- S.3.