Ulu Öndərin vətənpərvərlik və peşəkarlıq irsi

Müasir Azərbaycan tarixinin bütöv bir epoxası, önəmli bir mərhələsi Ulu Öndər Heydər Əliyevin adı və fəaliyyəti ilə ayrılmaz surətdə bağlıdır. Müstəqil Azərbaycanın əldə etdiyi uğurlar Heydər Əliyev strategiyasının təntənəsidir. Dahi siyasətçinin əvəzsiz xidmətləri nəticəsində Azərbaycan özünün geostrateji, iqtisadi və mədəni potensialından istifadə edərək, Şərqlə Qərb arasında etibarlı körpü rolunu oynamağa başlamış və dünyanın dinamik inkişaf edən ölkələrindən birinə çevrilmişdir.

Böyük və mənalı ömrünü xalqına, Azərbaycanın yüksəlişinə həsr etmiş Heydər Əliyev özünün siyasi fəhmi və müdrikliyi ilə zəngin dövlətçilik məktəbi yaratmış və Ümummilli Lider zirvəsinə yüksəlmişdir. Bu şanlı məktəb - müstəqilliyimizi qorumaq, vətənə, millətə, xalqa sədaqətlə xidmət etmək və bu yolda canını belə əsirgəməmək kimi dəyərlərdən qaynaqlanır.

Azərbaycançılıq məfkurəsinin parlaq daşıyıcısı kimi Heydər Əliyev müdrik siyasəti, dönməz əqidəsi və tarixi uzaqgörənliyi sayəsində milli dövlətçilik ideyasının gerçəkləşdirilməsinə, müasir Azərbaycan dövlətinin qurulmasına və xalqımızın müstəqillik arzusuna çatmasına nail olmuşdur. Canından çox istədiyi xalqına dünya birliyində layiqli yer tutan müasir, müstəqil və qüdrətli Azərbaycan bəxş edən Ümummilli lider Heydər Əliyevin böyük qürur hissi ilə dediyi “Azərbaycanlı kimi dünyaya gəldiyimə, Azərbaycan dilində danışdığıma, Azərbaycanı təmsil etdiyimə görə özümü çox xoşbəxt sayıram. Mən fəxr edirəm ki, mən azərbaycanlıyam” sözləri hər bir soydaşımızın qəlbində dərin iz buraxmışdır.

Ulu Öndərin vətənpərvərlik və peşəkarlıq irsinin öyrənilməsi istiqamətində ən əsas məqamlardan olan, mənalı ömrünün 25 ilini həsr etdiyi təhlükəsizlik orqanlarındakı fəaliyyəti ilə bağlıdır. SSRİ dövlət təhlükəsizlik orqanlarının vəzifə pillələrində Heydər Əliyev kimi irəliləmək hər azərbaycanlıya nəsib olmurdu. O, məhz öz əzmkarlığı, qətiyyəti, ağlı və istedadı ilə istək və arzularına doğru yol açırdı. Dahi şəxsiyyətin vəzifə yüksəlişi, atdığı bütün addımlar Azərbaycana, doğma xalqına xidmət naminə idi. Ötən əsrin 30-cu illərində repressiyaya məruz qalmış Azərbaycan ziyalılar nəslinin ən qabaqcıl nümayəndələrinin bəraət alması, partizan Mehdi Hüseynzadənin “vətən xaini” kimi damğalanmasına imkan verməyib, əksinə, ona Sovet İttifaqı Qəhrəmanı fəxri adının verilməsi, yetişməkdə olan neçə-neçə istedadlı, yaradıcı insanların sovet rejiminin siyasi təqiblərindən qorunması Ulu Öndərin göstərdiyi misilsiz xidmətlərin yalnız bir hissəsidir.

Dahi rəhbər Heydər Əliyevin Azərbaycanın təhlükəsizlik orqanlarında gördüyü ölçüyəgəlməz xidmətlər sırasında bu orqanlarda fəal milliləşmə prosesini aparması, heç şübhəsiz ən öncül yerdədir. Bununla bağlı, Ümummilli lider Heydər Əliyev deyirdi: “Mən hesab edirəm ki, Azərbaycanda təhlükəsizlik təşkilatının milliləşdirilməsi prosesi bizim əldə etdiyimiz ən böyük nailiyyət idi. Təşkilat milliləşdikcə onun fəaliyyətinin istiqamətini də Azərbaycanın mənafelərinə daha çox uyğun aparmaq mümkün olurdu”.

Azərbaycan təhlükəsizlik orqanları əməkdaşlarının peşə bayramı gününün təsis edilməsi münasibətilə 1997-ci il iyunun 28-də keçirilən yığıncaqda Ulu Öndər bu qurumun tarixi keçmişindən, milli dövlətçilikdəki rolundan və yerindən, burada çalışan insanların qarşısında duran vəzifələrdən çox dolğun nitq və qiymətli fikirlər söyləmişdir. Həmin tarixi nitqində Heydər Əliyev DTK-dakı fəaliyyətinə toxunmuş və bu orqanda milliləşdirmə barədə demişdir: “1953-cü ilin sonunda mən əks-kəşfiyyat şöbəsinə rəis təyin olundum. Bu, nadir hadisə idi. Nə qədər çətinliklər çəkdim ki, 30-cu illərdən qalmış və Azərbaycana xəyanət etmiş insanlardan - onların da əksəriyyəti azərbaycanlı deyildi, amma içərilərində belə yaramaz azərbaycanlılar da var idi, - bu orqanları xilas edək və yeni, gənc adamlar cəlb edək, orqanlarda sağlamlaşma işi aparaq. Bu, çox çətin oldu... 1953-cü ildən saflaşma, sağlamlaşma prosesi gedibdir və mən də bu prosesin bilavasitə iştirakçısı, son illərdə də təşkilatçısı olmuşam”.

Heydər Əliyev nəinki Azərbaycan SSR təhlükəsizlik orqanlarında işlədiyi müddətdə, eyni zamanda 1982-ci ildən sonra da, yəni Sovet İttifaqı rəhbərliyində çalışdığı müddətdə belə, Azərbaycanın xüsusi xidmət orqanlarına öz qayğısını əsirgəməmiş, bu təşkilata milli kadrların cəlb olunması, onların yetişdirilib həlledici iş sahələrində rəhbər vəzifələrə təyin olunmaları istiqamətində fəaliyyətini davam etdirmişdir. Ulu Öndər tərəfindən həyata keçirilən bu uzaqgörən və müdrik siyasət nəticəsində Azərbaycan SSR DTK-sında həm kəşfiyyat, həm də əks-kəşfiyyat sahəsində çox bacarıqlı, savadlı azərbaycanlı kadrlar yetişmişdi. Bunlara general-leytenant Ziya Yusifzadəni, Maqsud Məmmədovu, Adna Adnayevi, Azər Abbasquliyevi, Adil Bağırovu, Şamil Süleymanovu, Bəxtiyar Süleymanlını və digər şəxsləri misal göstərə bilərik.

Daim təhlükəsizlik orqanlarının əməkdaşlarının qarşısında mühüm tələblər qoyan Ümummilli lider Heydər Əliyev qeyd edirdi ki, peşəkarlıq səviyyəsini yüksəltmək təhlükəsizlik orqanında çalışan hər bir kəs üçün vacib olan amildir: “Təhlükəsizlik işçisi adi işçi deyil, bu işçi yüksək mədəniyyətli, keyfiyyətli işçi olmalıdır. Elə bir işçi ki, gərək şairlə də, bəstəkarla da, yazıçı ilə də, alimlə də, adi vətəndaşla da danışa bilsin. Əgər belə olmasa, o ağı qaradan, pisi yaxşıdan, cinayəti səhvdən, səhvi cinayətdən ayıra bilməz. Peşəkarlıq səviyyəsinin artırılmasının sərhədi, hüdudu yoxdur. Ona görə də siz daim peşəkarlığınızın təkmilləş-dirilməsi üzərində işləməlisiniz, oxumalı, öyrənməlisiniz, çox savadlı, bilikli insanlar olmalısınız”.

Görkəmli dövlət xadimi Heydər Əliyev təhlükəsizlik orqanlarının əməkdaşlarının fəaliyyətlərində milli-mənəvi dəyərləri uca tutmaları ilə yanaşı, xidmətdə nizam-intizama da ciddi riayət etmələrini əsas məsələ kimi önə çəkirdi: “Hərbi qulluq birinci növbədə nizam-intizam üzərində qurulur. Nizam-intizam gündən-günə möhkəmlənməlidir”.

Ulu öndər Heydər Əliyevin 23 mart 1997-ci il tarixli “Azərbaycan Respublikasının milli təhlükəsizlik orqanları əməkdaşlarının peşə bayramı gününün təsis edilməsi haqqında” Sərəncamı xüsusi xidmət orqanlarının müstəqil dövlətçiliyimiz qarşısındakı xidmətlərinə göstərilən böyük etimadın təcəssümü idi. Bu sərəncamla hər il mart ayının 28-i ölkəmizdə təhlükəsizlik orqanları əməkdaşlarının peşə bayramı günü kimi qeyd edilir.

Heydər Əliyevlə bağlı təhlükəsizlik orqanlarının tarixində baş verən əsas hadisələrdən biri də bu orqanlar üçün xüsusi ixtisaslı ali təhsilli milli zabit kadrlarının yetişdirilməsini həyata keçirən təhsil müəssisəsinin - Akademiyanın yaradılması oldu. Ümummilli lider Heydər Əliyevin 1998-ci il 1 dekabr tarixli Sərəncamı ilə yaradılmış Akademiyaya 2005-ci il dekabrın 20-də möhtərəm Prezident cənab İlham Əliyevin Sərəncamı ilə Ulu Öndərin adı verildi. 2006-ci il martın 27-də Azərbaycan Respublikasının Prezidenti cənab İlham Əliyevin iştirakı ilə bu ali təhsil ocağında Ümummilli Liderin abidəsinin və “Şöhrət" muzeyinin açılışı digər bir əlamətdar hadisə kimi tarixə yazıldı.

Bu gün Azərbaycan təhlükəsizlik orqanlarına kadrların seçilib yerləşdirilməsi zamanı dahi şəxsiyyət Heydər Əliyevin xüsusi xidmət orqanlarının qarşısında qoyduğu tələblər və prinsiplər əsas götürülür. Ali Baş Komandan cənab İlham Əliyevin dediyi kimi, “Bizə sağlam millət lazımdır, sağlam, yeni gənc nəsil lazımdır. Bilikli, savadlı, bütün dünyada gedən proseslərə bələd olan, gözəl təhsil alan, öz biliyi, savadı ilə Azərbaycanın gələcək inkişafına töhfə verəcək gənc nəsil lazımdır, vətənpərvər gənc nəsil lazımdır”.

Təməli Ulu öndər Heydər Əliyev tərəfindən qoyulmuş milli təhlükəsizlik strategiyası və Azərbaycan təhlükəsizlik orqanlarına göstərilən diqqət və qayğı onun siyasi kursunun layiqli varisi Azərbaycan Respublikasının Prezidenti cənab İlham Əliyev tərəfindən uğurla davam etdirilir.

Bu gün dövlətimizin başçısının müdrik idarəçiliyi və yüksək beynəlxalq siyasi nüfuzu sayəsində Heydər Əliyevin şah əsəri olan müstəqil Azərbaycan daha böyük nailiyyətlərə və zəfərlərə doğru inamla addımlayır. Regionun lider dövlətinə çevrilən Azərbaycan Respublikası sürətlə inkişaf edir və gündən-günə daha da qüdrətlənir. Möhtərəm Prezident cənab İlham Əliyevin milli maraqlarla bağlı məsələlərdə nümayiş etdirdiyi sarsılmaz iradə və prinsipial mövqe müasir Azərbaycanın stabil və etibarlı tərəfdaş kimi dünyada mövqelərini daha da möhkəmləndirir.

A.Rəhimov

Azad Azərbaycan.- 2020.- 25 aprel.- S.3.