Ölümsüz qəhrəmanlar: Şəhid Gündüz Əliyev

Vətənpərvərliyin ən ali məqamı şəhidlikdir. Bu ucalığa yüksələnənlərin ömür yolu qısa da olsa, şərəfli və örnək sayılır. Bu gün mən şəhidliyin zirvəsinə ucalmış 08.02.2002-ci ildə Lerik rayon Loda kəndində zəhmətkeş bir ailədə dünyaya göz açan Əliyev Gündüz Etibar oğlu haqqında danışmaq istəyirəm.

Zəhmətkeş ailədə dünyaya göz açan qəhrəmanımız ailənin sevimli övladı idi. Ürəyi daima vətənçün döyünən Gündüz 08.05.2020-ci il tarixdə həqiqi hərbi xidmətə yollanır. Hamının sevimlisi olan Gündüz verilən tapşırıqları vaxtında yerinə yetirdiyi üçün dəfələrlə komandanlıq tərəfindən qiymətləndirilib.

Xidməti dövründə özunə çoxlu sayda dostlar qazanan Gündüz hamının sevimlisi idi.

Şəhidlik zirvəsinə ucalmaq ən böyük qürurdur. Mənfur düşmənlərin 27.09.2020-ci il tarixdə başladıqları İkinci Vətən müharibəsində, doğma Qarabağ torpaqlarımızın işğaldan azad edilməsi uğrunda gedən döyüşlərə qoşulan Gündüz Suqovuşan istiqamətində igidlik göstərərək xeyli sayda mənfur düşməni məhv etmişdir. Lakin Gündüz qələbə sevincini yaşaya bilmədi. 30 sentyabrda Füzuli uğrunda gedən döyüşlərdə qəhrəmanlıqla şəhidlik zirvəsinə ucaldı.

Nur üzlü Şəhidimiz Gündüzün ölümsüz ruhunun qarşısında dərin ehtiramla baş əyirik. Gündüz kimi Vətən yolunda canından keçən Azərbaycan oğulları xalqımızın yaddaşında əbədi yaşayacaq.

Raziyə KAMİLQIZI

Azad Azərbaycan.- 2021.- 19 avqust.- S.5.