MÜBARİZ ƏSGƏR KİMİ

Möhtərəm Prezidentimiz cənab İlham Əliyevin etimadını ləyaqətlə doğruldan, Azərbaycan dövlətinə və xalqına sədaqətlə xidmət edən, ölkəmizin tərəqqisi və çiçəklənməsi naminə əməyini əsirgəməyən, asayişimizin keşiyində igidlik nümayiş etdirən Azərbaycan Respublikası Daxili işlər naziri general–polkovnik Vilayət Eyvazova.

Ən çətin peşəni özünə seçdin,

Ən çətin yollardan inamla keçdin.

Şərin, cinayətin durdun qəsdinə,

Haqqın, ədalətin yolunu seçdin.

Ölkədə olmalı əmin-amanlıq,

Kimsə düz yolunu azmamalıdır.

Hər kəs əməlinə cavab verməli,

Cinayət cəzasız qalmamalıdır.

Qanunlara sözsüz əməl olmalı,

Asayiş, intizam qorunmalıdır.

İnkişaf etdikcə gözəl ölkəmiz,

Cəmiyyət saflaşıb durulmalıdır.

Belə bir inamla döyünür qəlbin,

Yüksək etimada layiq olmusan.

Daim sədaqətli bir insan kimi,

Vəzifə borcuna sadiq olmusan.

Razılıq doğurur xalqa xidmətin,

Aydın mövqeyin var, düz məramın var.

Hamıya xoş gəlir əzmin, niyyətin,

Yox olsun ölkədən qoy cinayətkar.

Coşur ürəyində saf məhəbbətin,

Vətənə xidməti şərəf sanmısan.

Kökü kəsildikcə cinayətlərin,

Özünə sən saysız dost qazanmısan.

Yolunu azanın, cinayətkarın,

Qabağında varsan bir sipər kimi.

Sən xalqın, dövlətin mənafeyini,

Daim qoruyursan bir əsgər kimi.

Məqsədin, məramın xalqa xidmətdir,

Vətən sevgisiylə ürəyin vurur.

Güclü Azərbaycan polisi bu gün,

Öz xoş niyyətiylə zirvədə durur.

Bəxtiyar HÜSEYNOV,

Azərbaycan Yazıçılar və Jurnalistlər Birliyinin üzvü,

yazıçı-publisist

Azad Azərbaycan.- 2021.- 1 iyul. S. 3.