Onun ürəyi hər zaman Vətənlə bir döyünürdü

Vətən müharibəsində tarix yazan, doğulub boya-başa çatan Lənkəran elinin qürur, iftixar yerinə dönən İqbal Bayramovun 43 ilik ömür yolu başdan-başa saflıq dünyasına bənzəyir. Yaşadığı illərin səfində onun mənəviyyat fəlsəfəsində yalnız gözəl dünya naminə qurub-yaratmaq, hər bir işdə yurduna gərək olmaq durur. Bütün yaxşılıqlar, nəcib əməllər, insanlara təmənnasiz münasibət bu ləyaqətli dəyərli şəxsiyyətin iç dünyasından qaynaqlanırdı. Elə İkinci Qarabağ savaşında canından keçməsi canından artıq sevdiyi Vətənin yaşaması üçün oldu. Həm də onun şərəfli ölümü doğma torpağın nə qədər müqəddəs olduğunu göstərdi.

Fəqət, İqbal vaxtsız getdi aramızdan. Qaldı ki, onun sağlığında bizə yadigar qoyduğu mənəvi sərvətdə ürəkdən bağlandığı Vətən torpağının özü boyda ilahi saflıq, bütövlük, sədaqət ünvanlı günlərə yol açan nur vardır.

Qəlbində Vətən sevgisi, xalqına sonsuz məhəbbət yaşatmaqla İqbal Bayramov doğma Hirkan qəsəbəsində orta təhsilini başa vurub 1994-cü ildə Azərbaycan Dövlət Neft Akademiyasına daxil olur. Tələbəlik illərində oxuyub öyrənməkdən doymur. Həm də İqbalın gözəl əxlaqı, həyata sağlam baxışı, insanlığa sevgisi burada müəllimlərin, tələbələrin yanında onun nüfuzunu artırır. Ali məktəbi yüksək səviyyədə bitirəndə hamı onu layiqli vətəndaş, millətin səadəti üçün yaşamağı bacaran bir insan bilir...

Namərd erməni dığaları tərəfindən Qarabağ torpaqlarının əsarətdə saxlaması İqbalın ən yararlı yeri idi. Ali təhsildən sonra, yəni 2001-ci ildə öz arzusu, istəyi ilə Milli Ordu sıralarına yollanır. Leytenant rütbəsində cəbhə bölgəsində yerləşən Ağdam-Tərtər istiqamətində “N” saylı hərbi hissəyə tağım komandiri təyin olunur. O, Vətəninə vicdanla xidmət edir, onun qeyrətini hər şeydən əziz tutur, bu yolda canından belə keçməyə hazır durur. Həm də haqq-ədalətə tapınmaqla əsgərlərinə böyük qayğı göstərir, heç kəsi incitmir. Amma xain düşmənin əməllərinə heç cür dözə bilmir.

Həqiqi hərbi xidmətdən sonra İqbal baş leytenant rütbəsi ilə ehtiyata buraxılır. Üç il mülki həyatda müxtəlif işlərdə çalışır. Təbii ki, günləri rahat, gözəl keçsə də, düşmənin ədalətsiz hərəkətlərinə son qoymaqdan ötrü özünü hərbiyə bağlayır. Müxtəlif vəzifələrini tutmaqla yalnız Vətən torpaqlarının azadlığına çalışır. Anamız Azərbaycanın qeyrətli oğlu kimi sinəsini yanar od edib düşmənin bağrını çatladan günə hazırlaşır. Və ürəyi hər zaman Vətən eşqi ilə döyünür, nümunəvi xidmət göstərməklə ad qazanır. Mayor rütbəsinə qədər yüksəlir. Hələ aldığı medalları demirəm. Şəhidlik zirvəsinə ucalanda “Vətən uğrunda” medalı onlara əlavə olundu.

Vətən müharibəsi başlanan gündən mayor İqbal Bayramov döyüşə 30 il Qarabağ torpaqları murdarlayan dığalara nifrət hissi ilə atılır. Sanki düşmənin kökünü kəsməkdə Vətən sevgisi ona hər savaşda yeni qüvvə verir. Təki Azərbaycanın müqəddəs torpaqları azad olsun deyə ən ağır müharibə meydanında cəsarətlə döyüşür, öndə gedir, əsgərlərini hücuma səsləyir. Cəbrayılda da dığalara od qoyur, onların çoxlu canlı qüvvəsini məhv edir, texnikasını sıradan çıxardır. Bundan əlavə dəfələrlə çiyin yoldaşlarını mühasirədən çıxardır. 5 oktyabrda düşmən gülləsi İqbalın ömrünə son qoyur.

İqbal Bayramov ömrünü Vətəni üçün yaşadı. Elə buna görə də bütün Lənkəran camaatı öz qəhrəman oğlu ilə fəxr edir, onun şərəfli ömür yolunu özlərinə örnək bilirlər.

Zəfər ORUCOĞLU

Azad Azərbaycan.- 2021.- 15 iyun.-S.3.